ISAÍAS 29

1Ay bec'bil twitz tnam Ariel, aju tnam jatum najan David tuj. E cyic'san nink'ij juntl cab ox abk'i ic tza'nx in cybincha'n, 2pero ctzajel nim c'ixbisabl ti'j tnam Ariel wu'ne ex tuj tnam lu c'oquel ok'el ex che ayil xjal. C'oquel tnam te weye ic tza'n jun altar jatum in che cub patit ke oyaj. 3Che xel nsama'ne ke nsoldadiye tu'n tbaj cytxolban cyib ti'jele tnam, c'oquel nk'o'ne jun pe'n ti'jele ex che jawil nbincha'ne ke ja te cycolbil cyib ke soldad, tu'ntzun cyoc tzokpaj ti'j. 4Che bel numj xjal oc cycyaj pale' twitz tx'otx'; aju tk'ajk'ajel cywi' c'oquel ic tza'n tbinx tk'ajk'ajel jun lab ex ic tza'n tk'ajk'ajel twi' jun xjal in jasun. 5Ke aj k'oj ti'j tnam Jerusalén nimxix cybaj che oquel ic tza'n kuk, ke aj k'oj ti'j nimxix cybaj akeju in che baj yajlante cye xjal, che xel ikan ic tza'n in xi ikan tmu'pil triw tu'n cyk'ik' minaben, te jurat naj. 6Cbel cycastiw aj k'oj tu'n Kman aju Tajaw Tcyakil, tu'n tk'ajk'ajel twi' k'ancyok, tu'n cyaknajnab, tu'n nintz tk'ajk'ajel, tu'n xcyakinpaẍ cyuwxix wen, tu'n cyk'ik' jbal ex tu'n k'ak' in baj tz'e'y tcyakil tu'n. 7Cycyakil tnam lu miban cyajlanjtz, akeju in che k'ojin ti'j Ariel, cycyakil keju in che k'ojin ti'j ex ma che oc tzokpaj cyi'j ke ja ma' cywa'l te cycolbil cyib, ax icx keju in che yajlan cyi'j che oquel ic tza'n jun witzic', ex ka ic tza'n jun in tzaj yec'un te xjal te konic'an tuj twitzic'. 8Che oquel ic tza'n jun xjal nne'l tc'u'j ex ma tz'oc twitzic' ex tuj twitz ka in wa'n, pero oc tul tnabl ttenx tc'u'j nne'l; ex ka ic tza'n jun xjal in txket ti'j tc'u'j ex ma tz'oc twitzic' ex tuj twitz ka in c'an, pero oc tul tnabl ttenx in txket ti'j tc'u'j ex puro tzkij tuj tkul. Cyja'tzun cbajel cyi'j cycyakil tnam miban cyajlanjtz, akeju in che k'ojin ti'j tnam tcub twi witz Sión. 9Cucx che tene miban tz'ocx jun yol tuj cywi'ye. Cucx che tene moẍ keye, minti' ch'in tu'n tcyile. Cucx che txacpaje'ye ic tza'n ke c'al k'e'n, masque minti' otok txi' k'e'n cyu'ne. 10Porque tu'n Kman ma tzaj t-sama'n jun watl ma'xix cyibaje. Ma tz'oc tmaksi'n cywitz ke t-sanjel ate' cyxole ex ma tz'oc tk'o'n jun xbalun te maksibl cywitz keju in cyma'n tkanil alcye tzul te yajxi. 11Tcyakilju in tzaj tyec'un Kman mer ic tza'n tuj witzic' ma tz'oc te cyeye ic tza'n ke yol tz'ibamaj tuj jun libro seyarimaj. Ka at jun ma txi k'onte aju libro lu te jun xjal ba'n sch'in u'j, ex ka ma txi tma'n te cyja': Sch'i'n jawa jlu, ka chi; atzunte xjal ctzajel ttzak'we'n: Mlay jaw nsch'i'ne tu'nju toc sey ti'j. 12Ex ka ma txi tk'o'n te jun xjal miban sch'in u'j, cxel tma'n te cyja': Sch'in jawa jlu, ka chi; atzunte xjal ctzajel ttzak'we'n: Miban chin sch'ine u'j. 13Atzun jlu tzaj tma'n Kman weye: Ke xjal lu nok tu'n cyyol in che ajben weye ex nok tu'n cytzi' in chin nimanjtze cyu'n, pero aju cyanmi najchak ta' wi'je ex aju c'ulbil in tzaj cyk'o'n weye, cymandamyent xjal ke jlu ex cyu'nx in baj cyximan. 14Cyja'tzun, cjawil naj juntl maj cynabl ke xjal lu wu'ne cyu'n ke binchben nimxix cyipumal ex ke señ. Ke xjal at cynabl ex ke xjal sec' cynabl che oquel te minti' cynabl. 15Ay bec'bil cywitz ke xjal in xi cyewan cyib twitz Kman tu'n tcub cyewan aju cyximbetz, ke xjal in cybincha'n mya ba'n tuj klolj in cyma'n: Mi jun in que'yin ki'j. Mi jun ma til alcye in bant ku'n. 16Nim in che tzpete ti'j. ¿Baka junx ta' ju xok'l ttx'otx'il c'il tuc'il ju binchalte te? Jun ti'xti mlay txi tma'n teju binchante te cyja': Mya tu'na ma chin cub tbincha'na, ex jun c'il xok'l ttx'otx'il mlay txi tma'n teju binchalte te cyja': Minti' nne'l tnic'a ti'j ju in bant tu'na. 17Ch'ix tul canun tk'ijlalil, aju nmak chc'ul c'oquel te cojbil ex aju cojbil c'oquel te nmak chc'ul. 18Tuj tk'ijlalil lu, ke xjal chcyin cbantel cybin ti'j ju yol in tma'n tuj libro, ex ke moẍ cbantel cyque'yin, mlayx che tentl tuj klolj ex tuj kxopin. 19Ke xjal mans che tzalajel juntl maj ti'j Kman, ke xjal mebaxix, che tzalajel ti'j ju Dios Xjan cye aj Israel. 20Che bel baj ke xjal jawni cywitz ex che najel ke xjal ba'n che xmayin, ex bi'x che najel keju o'cx in che ximan ti'j tu'n cybinchante mya ba'n. 21Ke xjal in xi cysi'min yol ti'j juntl xjal in cyma'n ka at til, ex in bant c'obil cyu'n ti'j jun jwes tu'n tcub tz'ak tuj jun til, ex in che nic'an yol ti'j xjal minti' til tu'n mi'n t-xi bincha'n ti'j. 22Cyja'tzun in tma'n Kman cyja', aju Cydios aj Israel, aju colpinte te Abraham: Mlay tzaj cych'ixwi ke tiyjil Jacob, ex mlay tz'oc spelin cywitz, 23porque oc cylonte ke cyc'wa'l aju otok bant wu'ne tuj cytanmi, c'elel cynic' ti'j ka Xjan kine ex ctel nchiylale cye, akine Dios Xjan cye aj Israel. 24Akeju otok tzpet cynabl, c'oquel cynabl, ex akeju otok tzaj cyyol wi'je, cxel cyniman ke nxnak'tzbile.

will be added

X\