ISAÍAS 26

1Tuj tk'ijlalil tzul cxel bitzan ju bitz lu tuj cytx'otx' aj Judá: Ato'ye tuj jun tnam nimxix tipun; ma che jaw tbincha'n Kman ke muro ti'jele ex ke ja ma' cywa'l te kcolbil kibe. 2Cyjakome ke tpwertil tnam tu'n tocx jun nasyon tz'aklxix ex in japunxix tyol Kman tu'n. 3Nman, akeju wa'lxix tuj cyocslabl in che oc tcwentina tu'n cyten tuj txubtxaj porque nno'c ke' cyc'u'j ti'ja. 4Toc ke'xix cyc'u'je ti'j Kman, porque ic tten Kman ic tza'n jun pic jatum tu'n kclonte kib te jumajx. 5Akeju in jaw cyniman cyib in che cub tz'ak tu'n, ex aju tnam in jaw tniman tib in cub t-xitun, ex bi'x cbel tilj tu'n twitz tx'otx', 6cbajel waban cyu'n ke xjal meba ex cyu'n ke xjal otok che baj yajla'n. 7Aju cybe ke xjal tz'aklxix jikun ti'j, ex tu'na Nman in baj ttz'umsa'na cybe. 8Ax icx keye Kman, in ko bete tuj ju be ic tza'nx in tma'n tleya ex k'ukl kc'u'je ti'ja. Aju tajbil kanmiye, o'cx tu'n kximane ti'ja. 9Tu'n tcyakil wanmiye in chin ayone ti'ja konic'an, tu'n tcyakil nc'u'je in chin jyone ti'ja. Oc in cub tk'o'na cycastiw xjal najl twitz tx'otx', nne'l cynic' ti'j tu'n cybinchante aju tz'aklxix. 10Masque tzaj k'ak'an tc'u'ja cyi'j ke xjal mya ba'n, atzun cye mlayx bant cyu'n tu'n cybet tuj tumelxix; masque najl ke cyxol ke xjal ba'n che niman, pero cucx in cybincha'n mya ba'n ex minti' nne'l cynic' ti'j ju ma'xix toclena, Kman. 11Nman, banimaj tten aju castiw tu'na, atzun cye cyc'i' tz'oc cyk'o'n cycwent ti'j; oc cylonte tc'ujlalila nimxix cyi'j ke xjal etzan tu'na, ctzajel cych'ixwi ti'j, ex ke aj k'oj ti'ja che bajel tz'e'y tu'n k'ak'. 12Nman, ato'ye tuj txubtxaj tu'na, axix toc tcyakil ak'untl in bant ku'ne, tu'na in bant. 13Kman ex Kdiose, ma bant-xi nim abk'i junxitl ke cawil ma che cawin kibaje, atzun ja'lo o'cx aya cxel knimane. 14Ake jlu o che cyim ex mlay che jaw ank'intl juntl maj, ex mlay che jaw we'tl ke cyxlen'tz, porque o cub tk'o'na cycastiw, o che naj tu'na ex tu'na ma tzic' cyna'l cyu'n xjal. 15Nman, tu'na ma ch'iy ju nasyon; ma ch'iy tu'na tu'ntzun tjaw nimsa'n tbiya tu'n, ex tu'na ma tz'el lak'e' tcyakil tmojonil tx'otx'. 16Nman, tuj c'isbisabl keye in ko jyone ti'ja ex oc tcub kcastiwoye tu'na, in ko yoline tuc'ila tuj na'j Dios. 17Nman, ictok ktene twitza, ic tza'n jun xu'j ch'ixtok tul itz'j tal, in jaw t-xkutz'in tib ex in sch'in tu'n ta'w. 18Ax icxtzun keye, mer ic tza'n oc ten kale, o kna'ye ta'w mer ic tza'n cyja'tok tul itz'j kale, pero minti'x jun ul itz'j ku'ne. Minti' ma tzul ki'ne colbil tuj ktanmiye, ex minti' ma che ul itz'j ke xjal tu'n cynajan twitz tx'otx'. 19Pero ke xjal etzan tu'na, akeju o che cyim, che jawil ank'in juntl maj. Che jawil itz'j cyximlal ex tzul cynabl keju in che tan tjak' tx'otx' ex che jawil sch'in tu'n tzalajbil. Porque in tzaj t-sama'na t-spic'umala, mer ic tza'n tk'ab che'w, ex ke cyimni che jawil itz'j juntl maj twitz tx'otx'. 20Akeye xjal etzan wu'ne, cyxi'ye, cyocxe tuj cyjaye ex cylamo'n etze ke tlamel ja cywitze. Cyewanx ch'in cyibe, acux nnic' ttx'u'jil Kman. 21Porque c'eletz Kman tuj tja tu'n tcub cycastiw ke xjal najl twitz tx'otx' tu'n tlaj cyil; mlayx txi tewan tx'otx' aju cychc'el ke cyimni cub kojl twitz, ex mlayx txi tewan ke cyimni e cub byo'n twitz.

will be added

X\