ISAÍAS 21

1Aju yol o k'manjtz ti'j ju attok ttzajel tuj lugar tzkij tx'otx' ttzi mar: Ic tza'n cyk'ik' jbal in tzaj tuj tnayaj k'ij, ictzun che tzajel aj k'oj tuj tzkij tx'otx' tuj lugar xobajilxix. 2Xobajilxix aju ma tzaj tyec'un Dios weye; aju xjal sbul cucx t-sbun, aju xjal xitul cucx t-xitun. Cyjaxe aj Elam, atzun cyeye aj Media, cyoc tzokpaje cyi'j aj k'oj. Mlay txi nk'o'ne ambil tu'n cucx cyyajlanjtz xjal cyu'n aj Babilonia. 3In lu'lun nximlale tu'n ta'w c'ixc'oj, in baj nẍocpin wibe tu'n ta'w c'ixc'oj ic tza'n jun xu'j nnu'l itz'j tal, aju bis minti' in tk'o'n ambil tu'n t-xi nbi'ne, aju xobajil in chin tmayo'n tu'n mi'n t-xi nque'yine. 4Tzpetni ta' nnable, in chin lu'lune tu'n xobajil. Aju wojlable te kale oc tchewix k'ij, aju in chin tzalajtoke ti'j, ma tz'oc te jun xobajil te weye. 5Aju mes ma bant tten, ma cub lic'un ke xbalun te cyk'ukbil xjal, ma tzyet nintz wa'n. Akeye capitán che we'ctze, cyk'o'nque aseyt cyi'j ke makbil in che ajben tuj k'oj. 6Porque ma tzaj tma'n Kman weye cyja': Txi'ya ex k'on cyaja jun xk'ukil tu'n ttzaj tma'n tcyakil aju ctila'. 7Ka ma til ke carwaj jawo'n cyu'n cabchaj chej cabay ex ka ma til ke xjal cyjax cyibaj ke bur ex ka ke chej camey, ba'n tu'n t-xi tque'yinxix wen. 8Ex aju xjal tcyajsa'n xk'ukil jaw sch'in: Nman, ax atine tuj nlugare tcyakil k'ij, ex tcyakil konic'an in chin xk'ukine. 9Lu tzul jun carwaj jawo'n cyu'n cabe chej cabay ex ma nbiye jun tk'ajk'ajel wibaj cyja': Ma cub xitj, ma cub xitj Babilonia. Cycyakil cyilbilal cydios ma che cub tz'ak twitz tx'otx' ex bi'x ma che cub buchj, chi xjal. 10Akeye nxjalile o che baj wabane ic tza'n triw, cxel nma'ne cyeye aju ma nbiye te Kman aju Tajaw Tcyakil, aju Cydios aj Israel. 11Aju tkanil o k'manjtz ti'j ju attok ttzajel ti'j tnam Edom: At jun xjal ma tzaj k'ajt wi'je max tuj tnam Seir: Aya xk'ukil, ¿nic'pun atx taj tu'n tcub k'ij? Aya xk'ukil, ¿nic'pun atx taj tu'n tcub k'ij? Chi xjal. 12Ex atzunte xk'ukil ma tzaj ttzak'we'n: Ch'ix tcub k'ij, pero ax icx ch'ix ttzaj konic'an. Ka cyaje tu'n cykanine ti'j, ba'n tu'n t-xi cykanine ex tu'n cyajtz meltz'aje juntl maj. 13Aju yol o k'manjtz ti'j ju attok ttzajel ti'j Arabia: Akeye xjal aj Dedán in che bete tuj c'lojin, nne'x ak'bil cyeye tjak' chc'ul tuj tzkij tx'otx' tuj Arabia: 14Cyexe canul cyi'j keju at txketle'n cyi'j ex cyk'onxe cyc'a a'. Akeye xjal najl tuj tx'otx' Tema, cyexe canul cyi'j keju in che el ok ex cyk'onxe cywa. 15Porque in che el ok twitz spad, aju spad banin ttzi' wen, ex twitz ju xobl plech banin tten tu'n t-xi t-xo'n plech, ex twitz ju k'oj xobajilxix. 16Tzaj tma'n Kman weye cyja': Tuj juntl abk'i ja'lo, mlay tzic' tibaj, tloktzun otok baj tcyakil aju toclen Cedar ma'xix wen. 17Ex nic'xi cybet ke xjal che cyjel ten, akeju ba'n che xo'n plech tu'n xobl plech ex elni ke twitz k'oj, akeju najl tuj Cedar. Ate Kman aju Cydios aj Israel ma k'mante jlu.

will be added

X\