ISAÍAS 2

1Atzun yol lu tzaj tma'n Dios te Isaías aju tcy'ajal Amoz, in yolin cyi'j aj Judá ex ti'j tnam Jerusalén. 2Tuj tk'ijlalil tzul, aju witz jatum tcub tja Kman ma'xix toclen c'oquel. Aju witz lu ma'xix twa'l cywitz ke mastl witz. Cycyakil nasyon che ul baj twi', 3ex nimcu cyajlal tnam che ul ex oc cyma' cyja': Cytzaje ex ko jax twi' ju witz etzan tu'n Kman, tuj tja Tdios Jacob, tu'ntzun ttzaj t-xnak'tza'n ke aju tajbil tu'n tbant ku'n ex tu'ntzun kbet tuj be ma tzaj tma'n ke. Porque tuj tnam Sión ctzajel k'o'n xnak'tzbil ke, ex tuj Jerusalén ctzajel tma'n Kman tyol. 4A c'oquel te jwes cyibaj nasyon ex cxel tbincha'n cyi'j nimcu tnam tu'n mi'n cyk'ojin. Cbajel cybincha'n cyspad tu'n cyoc te punt ex cylans cbajel cybincha'n tu'n cyoc te jobl tk'ab uva. Mlayx tzaj cytzyu'n ke tnam juntl maj cyspad tu'n cyk'ojin cyi'j mastl tnam, ex mlayx cyc'am juntl maj xnak'tzbil tu'n tbant cyk'ojin. 5Akeye tiyjil Jacob, koke ja'lo tu'n kbet tuj t-spic'umal Kman. 6Nman, ma che cyaj tcolina ke xjal etzan tu'na, akeju tiyjil Jacob; ma noj tuj cytanmi cyu'n ke xjal ba'n che k'ijin tzajni ke tuj tjawitz k'ij, ex cyu'n aj nabl ic tza'n keju ate' cyxol aj Filistey, ex in bant ti'j cyyol cyuc'il xjal cyuj mastl nasyon. 7Nojni tuj cytanmi tu'n k'an pwak ex sak pwak ex at nimxix k'inumabl tuj; nojni tuj cytanmi cyu'n chej cabay ex at nimxix carwaj mlay bant cyajlanjtz. 8Ax icx nojni tuj cytanmi cyu'n ke tilbilal nno'c cydiosin xjal ex in che c'ulun cywitz ke cydios cyu'nx in che bant. 9Ma che oc te ch'in cyoclen, jumajx ma tz'el cyoclen. Mi'n cub tnajsa'na cyil. 10Cylamon ocx cyibe cyuj toy' pic, ex cyewanx cyibe tjak' tx'otx'; cyewanx cyibe twitz Kman tu'nju xobajilxixte ex in koptz'aj tajwalil wen. 11Ake xjal in jaw cyniman cyib cbel cych'ixwi; ex akeju nno'c cyk'on cyib te ma' cyoclen che oquel te ch'in cyoclen. O'cxte Kman cjawil nimsa'n tbi tuj tk'ijlalil tzul. 12Tuj k'ij lu cjawil ti'n tib Kman tu'n tk'ojin cyi'j cycyakil xjal in jaw cyniman cyib, ex cyi'j cycyakil keju nno'c cyk'on cyib te ma' cyoclen, ex bi'x cbel cych'ixwi, porque ate Kman aju Tajaw Tcyakil cbinchalte jlu. 13Ax icx cjawil ttx'emin cycyakil ke tze' wi'ten ma'xix cywa'l ate' twi witz Líbano, ex cycyakil ke tze' c'ol ate' tuj tx'otx' Basán; 14ax icx cbel t-xitun ke nimak witz ex ke tal witz ma'xix cywa'l, 15cyuc'ix ke ja ma' cywa'l ex ke muro cyuw cyten. 16Ax icx cbel t-xitun cycyakil cybarc aj Tarsis cyuc'ix cycyakil ke barc tbanilxix che que'yin. 17Ake xjal in jaw cyniman cyib ex nno'c cyk'on cyib te ma' cyoclen, bi'x cbel cych'ixwi. O'cx te Kman cjawil nimsa'n tbi tuj tk'ijlalil lu, 18ex bi'x che najel cycyakil ke tilbilal tu'n, akeju nno'c cydiosin xjal. 19Oc ttzaj Kman tu'n tcub cycastiw xjal tu'n, c'oquex cylamon cyib xjal cyuj toy' pic ex cbelex cylamon cyib cyuj ke tpa'xil tx'otx'; c'elel cyewan cyib twitz Kman tu'nju xobajilxixte ex in koptz'aj tajwalil wen. 20Tuj tk'ijlalil tzul c'elex cyxo'n xjal ke tilbilal k'an pwak ex sak pwak cytx'otx'il, akeju cyu'nx cub cybincha'n tu'n cyc'ulun cywitz; c'elex cyxo'n jatum ate' ke ich' ex ke sotz', 21ex c'oquex cylamon cyib cyuj ke toy' xak ex cyuj ke toy' pic tu'n tel cyewan cyib twitz Kman, tu'nju xobajilxixte, ex in koptz'aj tajwalil wen oc ttzaj Kman tu'n tcub cycastiw xjal tu'n. 22Mi'n tz'oc ke' cyc'u'je ti'j jun xjal, porque nok ch'in toclen ex minaben jacu jatz baj t-xew.

will be added

X\