ISAÍAS 18

1Bec'bil twitz ju tx'otx' jatum in che ranin ke tal jil tu'n cyxic', aju max ta' cyi'jxi ke nima tuj Etiopía, 2aju in che'x t-sama'n ke t-sanjel tu'n cybet tuj barc tibaj nima Nilo, ke cybarc binchamaj ti'j sim. Cyxi'ye akeye sanjel cyuw che bete, cyxi'ye cyuc'il ke xjal ma' cywa'l ex in koptz'aj ti'j cyximlal, atzun jun nasyon xo'nxix wen tuj tcyakil part ex atzun tnam lu at-xix tipun ex in cub cyi'j mastl tnam tu'n ex tcubsa'n tuj jun tx'otx' cyxol ke nima. 3Cycyakile akeye najl twitz tx'otx' oc cyila'ye oc tjaw jun techal cywi witz, ex oc cybi'ye tk'ajk'ajel twi chun oc toc k'ajtza'n. 4Ma tma Kman weye: Max tuj lugar jatum atine ctzajel nque'yine tuj txubtxaj, ic tza'n tkan k'ij tuj jun k'ij te coresma, ex mer ic tza'n ch'in muj tu'n tk'ab che'w tuj tk'ijlalil ta'w cyak oc tjaw chmet twitz awal. 5Oc tcub baj t-xmacal tkan uva ex matok in k'anax twitz, pero na'nxtok tu'n tpon tk'ijlalil tu'n tjaw chmet twitz, cbajel cypodarin ke tk'ab tu'n cchil, c'elel cytx'e'min ex c'elex cyxo'n. 6Cycyakil cyximlal ke cyimni cyjel ten te cychi' ke c'utz ate' twi witz ex te cychi' txcup te tjak' c'ul. Ax che tel ke c'utz ma chixin tuj enter coresma ex cycyakil txcup te tjak' c'ul che tel ma chixin tuj jbalil. 7Tuj tk'ijlalil tzul ctzajel cyi'n ke oyaj te Kman aju Tajaw Tcyakil; akeju che tzajel k'inte, atzun ke xjal ma' cywa'l ex in koptz'aj ti'j cyximlal, atzun jun nasyon xo'n wen tuj tcyakil part, ex atzun tnam lu nimxix tipun ex in cub cyi'j mastl tnam tu'n, tcubsa'n tuj tx'otx' cyxol ke nima. Ctzajel cyi'n ke oyaj tu'n cyul twi witz Sión, jatum in na'njtz tbi Kman aju Tajaw Tcyakil.

will be added

X\