ISAÍAS 16

1Max tuj tnam Sela tuj lugar tzkij tx'otx', cysamanxe ke ẍne'l tuc'il ju cawil tuj tx'otx' Judá, tu'n cypon max twi witz Sión. 2Oc cyic'x ke xu'j aj Moab tuj xajbil a' tuj nima Arnón, ic cyten ic tza'n ke chyu'j otok che etz sec'pu'n ex in che el ok ti'j cyk'u'. 3In xi cyma'n cye aj Sión cyja': Cybinchame ki'je tu'n kclete, cyk'ontze cyxlecumale te chilcuk'ij tu'n toc ic tza'n konic'an, tu'ntzun mi'n kilwaje; cyk'ontze ambil tu'n tocx kclon kibe cyxole, mi'n ko'x cyk'o'ne tuj cyk'ab aj k'oj ki'je, tu'nju ma ko ul oke cyxole. 4Ma ko etz oke tuj Moab, cyk'ontze ambil keye tu'n kclonte kibe cyxole. Cyoque te colol ki'je cywitz keju in che cub byonte keye, che chi. Cbajel aju yajbil tuc'ix ju xitbil, che ajel meltz'aj ke xjal otok che oc tzokpaj ti'j tx'otx' lu. 5Jun tiyjil David c'oquel te cawil; ccyuwsetel tcawbil ex ccawil tuc'il xtalbil. C'oquel te jwes in japunxix tu'n, cbel tk'o'n jun ley tuj tumelxix ex jurat naj cxel tbincha'n cyi'j xjal. 6Bi'n ku'ne aju cynimbil cyib aj Moab ma'xix wen, nno'c cyk'on cyib te ma'xix cyoclen ex jawni ke, pero nokx gan in baj cyyolin cyib. 7Cyja'tzun, cycyakil xjal najl tuj Moab che jawil ok' ti'j cytanmi; nimxix che bisul, ctzajel ta'w tuj cyanmi cyi'j cylo' twitz uva tzkijsamaj at tuj tnam Kir-hareset. 8Ma che tzkij ke cojbil tuj tnam Hesbón cyuc'ix ke tkan uva tuj tnam Sibma, ma che baj naj cyu'n ke nejenel cye mastl nasyon. Ke cyk'ab tkan uva, ponin ke nej max tuj tnam Jazer, xi'ynix tuj tzkij tx'otx' ex ponin baj ti'jxi mar. 9Cyja'tzun, in chin ok'e cyi'j ke tkan uva tuj tnam Sibma, icx tza'n in che ok' aj Jazer, ex nne'tz ta'l nwitze cyi'je akeye aj Hesbón, ax icx cyi'je akeye aj Eleale, porque ke chmol twitz awal ya minti'tl in che tzalaj. Ma jaw sich' te k'oj ti'j twitz cyawale cyu'n aj k'oj. 10Aju tzalajbil cbajel tuc'ix tk'ajk'ajel cywi xjal in jaw tuj cojbil; mlay che sch'intl xjal tu'n tzalajbil ex mlay che bitzantl cyxol ke tkan uva, mlay tz'el cyyatz'o'ntl ta'l twitz uva tu'n tbantl vin ti'j. Minti'tl in che sch'in ke xjal yatz'ol ta'l twitz uva. 11Nim in bisun wanmiye, mer ic tza'n tk'ajk'ajel twi' jun chnab bisbajilxix, in bisun cyi'j aj Moab ex ti'j tnam Kir-hareset. 12Masque che'x aj Moab cywi' ke tal witz ex masque che sict oc cyoc ten cubsal cywitz ma chixin, ex masque che'x tuj tja cydios tu'n cycubsan cywitz, pero nokx gan tcyakil jlu. 13Atzun ke yol lu tma Kman cyi'j aj Moab atxix ojtxi. 14Atzun ja'lo in tma'n Kman cyja': Tuj ox abk'i ja'lo, mlay tzic' tibaj, cnajel aju toclen Moab ma'xix, cyuc'ix cycyakil xjal ate' tuj nim cyajlal; nok nic'xi che cyjel ank'in ex minti' cyipun.

will be added

X\