ISAÍAS 15

1Atzun yol jlu tzaj tma'n Kman cyi'j aj Moab: Tuj junx konic'an ma naj tnam Ar tuj cytx'otx' aj Moab, ex bi'x ma baj xitj; tuj junx konic'an ma naj tnam Kir tuj cytx'otx' aj Moab, ex bi'x ma baj xitj. 2Ke xjal tuj tnam Dibón ma che jax ok'el tuj tja cydios, aju tcub twi' tal witz. Ma che jaw ok' aj Moab tu'nju ma naj tnam Nebo, tuc'ix tnam Medeba. Cycyakil ma tz'el c'o'ẍin ti'j cywi', ma tz'el matzo'n cyxmaltzi'. 3In che bet xjal cyuj cay toc cyxbalun ch'i'x twitz; in che sch'in xjal cywi ja tu'n ta'w c'ixc'oj. Nimxix in che ok' cycyakil xjal cyuj plas. 4Ke xjal tuj tnam Hesbón ex keju ate' tuj tnam Eleale in che sch'in wen; in binjtz tk'ajk'ajel cywi' max tuj tnam Jahasa. Cyja'tzun in tzaj baj cyc'u'j ke xinak aj Moab, akeju elni ke twitz k'oj, ex nimxix cyxobil in tzaj. 5In bisun wanmiye ti'j Moab; ke xjal najl tuj in che etz ok, in che pon max tuj tnam Zoar ex max tuj tnam Eglat-selisiya. In che ok' oc cyjaw twitz jawl tuj Luhit; tuj be in pon tuj tnam Horonaim in che sch'in tu'n ta'w c'ixc'oj tu'nju xitbil otok tzaj cyibaj. 6Ma che aj tzkij ke twi a' tuj lugar Nimrim, ma tzkij ch'im ex ma cub motx'j cha'x c'ul, minti' jun t-xak tze' cha'x ma cyaj ten. 7Cyja'tzun in xi cyi'n xjal cyk'inumabl aju otok jaw cychmo'n, xi cyi'n ti'jxi tk'ab xak jatum ate' ke tze' chjaj. 8Aju tk'ajk'ajel cywi xjal in che sch'in ma pon baj tuj tcyakil tx'otx' Moab; aju tk'ajk'ajel cywi' te ok'el ma pon baj max tuj tnam Eglaim ex max tuj tnam Beer-elim. 9Masque che noj ke nima tu'n chic', akeju ate' tuj tnam Dimón, pero ctzajel nsama'ne mastl mya ba'n cyibaj aj Dimón; cxel nsama'ne jun balun tu'n t-xi chyonte cye keju otok che clet tuj Moab, cyuc'ix keju otok che cyaj ank'in tuj cytx'otx' aj Moab.

will be added

X\