ISAÍAS 14

1Ctzajel k'ak'an tc'u'j Kman cyi'j tiyjil Jacob. Che jawil t-sc'o'n ke aj Israel juntl maj, che tzajel ti'n ke aj Israel tu'n cycub ten juntl maj tuj cytx'otx'. C'oquel cyjunin cyib stranjer xjal cyuc'il ex che najal junx cyuc'il tiyjil Jacob. 2Che tzajel xjal cyuj txkantl nasyon tu'n cyonin cyi'j aj Israel tu'n cyul meltz'aj tuj cytanmi, ex ke xjal lu che oquel te cymajen aj Israel tuj tx'otx' etzan tu'n Kman. Ke xjal otok che'x presinte cye aj Israel nej, ax icx cye che xel k'i'n pres cyu'n, ex che cawil aj Israel cyibaj keju otok che baj yajlante cye nej. 3Akeye aj Israel, tuj k'ij oc tel ti'n Kman aju c'ixbisabl cyeye tuc'ix cybise ex aju ak'untl cyuwxix cub k'o'n cyibaje jatum e tene te majen, 4cxel cyma'ne jun tkic' yol lu te xmaybil ti'j cyrey aj Babilonia: Cyque'yinxe, matzun baj tipun aju cyuwxix cawin. Cyque'yinxe, bi'x ma naj toclen aju xjal puro jawni. 5Tu'n Kman ma naj tipun aju binchal mya ba'n, ma baj ttokin tvar ju rey cyuwxix cawin, 6aju cub k'onte cycastiw ke nasyon tuc'il tk'oj ex cucx in che baj tc'ixbisa'n. Cub cyi'j ke nasyon tu'n tuc'il ttx'u'jil, e baj tyajla'n ex minti' tzaj tz'e'y tc'u'j cyi'j. 7Tcyakil twitz tx'otx' tuj txubtxaj ta', at tuj tzalajbil, ex in che sch'in xjal tu'n tzalajbil. 8Cyuc'ixpe ke tzaj ex ke wi'ten ate' twi witz Líbano in che tzalaj ti'j ju ma tzaj ti'ja ex in cyma'n cyja': Atxix tej tnaja, mi a'l juntl nnu'l tx'emil keye, che chi. 9Max cubni tuj cynajbil cyimni ma che jaw tilj ke cyimni ex in che etz c'molte teya. Ma tz'el cywatl cyxlen'tz cyimni; cycyakil nejenel ate' twitz tx'otx' nej, che eletz canul ti'ja; cycyakil cyrey ke nasyon che jawil we' tuj cyk'ukbil. 10Cycyakil ke jlu che yolil ex cxel cyma'n teya cyja': Ax icx teya ma naj tipuna, ma tz'oca ic tza'n keye. 11Max tzalu ma che naj ke tnimbil tiba ex tuc'ix cyk'ajk'ajel ke arpa at tuc'ila. Coẍliya cyibaj ẍuk', ex ẍuk' ma tz'ajben te txaybil tibaja. 12Tza'n tten saj tz'aka twitz cya'j, aya che'w jakol t-xe cya'j. Nej in cub cyi'j ke nasyon tu'na, atzun ja'lo ma cu'tz xo'na twitz tx'otx'. 13Cub t-ximana tuj tanmiya cyja': Chin jawixe max tuj cya'j; cbel nk'o'ne nk'ukbile te cawbil max cyibaj ke che'w etzan tu'n Dios; chin bel ke'ye max tuj tlugaril tbank'ab k'ij twi witz jatum nno'c cychmon cyib ke dios. 14Chin jawixe max cyibaj ke muj najchak cyjaw; chin oquele ic tza'nx te Dios ma' toclen, chitzuna. 15Atzun ja'lo ma cu'x xo'na tuj cynajbil cyimni max t-xe'pun jul jalo ponin t-xe'. 16Keju che que'yil teya ax c'oquel baj tbak' cywitz ti'ja, ex axix c'oquel cyque'yin ti'ja ex oc cyma' cyja': ¿Apetzunju xinak lu in tzaj lu'lun twitz tx'otx' tu'n ex in che baj t-xitun ke nasyon, 17aju oc k'onte tcyakil twitz tx'otx' te tzkij, aju o che baj xitj ke tnam tu'n ex minti' in che'x ttzokpin ke pres? 18Cycyakil ke rey o che ten cyuj nasyon in che ojlan tuc'il nimbil cye, teylex te junjun tuj tex tpantyón, 19atzun teya ma tz'ex xo'na ti'jxi tpantyona, ic tza'n nne'l ic'un tk'ab tze' tzkij, ic ma tz'oca ic tza'n jun t-ximlal cyimni otok baj waban cyxol ke xjal in che cub byo'n tu'n spad; ma txi xo'na junx cyuc'il tuj jul nojni tuj tu'n abj. 20Mlay cu'x maku'na ic tza'n ke mastl rey, porque tu'nxa ma naj ju tx'otx' jatum in cawina ex e cub tbyo'na ke xjal ate' tuj ttanmiya. Te jumajx mlay che tzaj na'n cyiyjil ke xjal binchal mya ba'n. 21Cybincham cytene tu'n tcub cybyo'ne ke tc'wa'l rey lu, tu'n tlaj nimxix mya ba'n o cybincha ke cyxe'chel; tu'ntzun mi'n cyximan ti'j tu'n cycawin twitz tx'otx', mi tu'n tnoj twitz tx'otx' cyu'n tnam cyu'n. 22In tma'n Kman cyja', aju Tajaw Tcyakil: Chin jawil we'ye k'ojlel cyi'j, cnajel tbi Babilonia wu'ne ex cyuc'ix ke xjal ate'x tuj, cyuc'ix cyc'wa'l ex ke tal cychman. 23Oc c'oquel wu'ne te soban ex te cyja xitx'. Cbajel ntz'iso'ne tu'n tz'isbil te xitbil. Atzun jlu in tma'n Kman aju Tajaw Tcyakil. 24Ate Kman aju Tajaw Tcyakil ma tma jun yol axix toc, chi cyja': Ax toc cbantel aju ma cub nximane, cjapunel aju ma bant ti'j wu'ne. 25Che najel aj Asiria wu'ne tuj tx'otx' etzan wu'ne, cbajel nwabane cyximlal cywi' ke witz etzan wu'ne, c'elel wi'ne ke cyyuw cycubsan cyibaj xjal etzan wu'ne, tuc'ix ju iktz toc ttzal cyi'j. 26Atzun nximbetze jlu cbantel wu'ne tuj tcyakil twitz tx'otx'. Ma txi nnukpi'ne nk'abe tu'n cynaj cycyakil nasyon wu'ne, chi Kman. 27Aju in cub t-ximan Kman aju Tajaw Tcyakil, mi jun xjal jacu tz'oc mayonte te ti'j. Ma txi tnukpi'n tk'ab tu'n tcub cycastiw xjal, mi jun jacu tz'oc mayonte te. 28Atzun yol jlu tzaj tma'n Kman te Isaías tuj abk'i tej tcyim rey Acaz. 29Akeye aj Filistey, mi'n che jaw tzalaje tu'nju o cub tokj ju var cub k'onte cycastiwoye, porque jatum etz ju lobaj nej, axtzun c'eletz jun k'anti', ex axtzun c'eletz jun lobaj ba'n lipan twitz cya'j. 30Che wa'l cyẍne'l ke xjal meba cyuj ke cojbil etzan wu'ne, ke xjal minti' at cye che ojlal tuj txubtxaj. Atzun cyiyjile che cymel tu'n we'yaj wu'ne ex keju otok che cyaj ten, che bel nbyo'ne. 31Che ok'e akeye tnam cye aj Filistey, che sch'ine tu'n ta'w c'ixc'oj, che lu'lune tu'n xobajil. Porque tuj tx'otx' tuj tbank'ab k'ij che tzajel txkan soldad ic cyten ic tza'n txkan sib in bukin; txolin cyten cycyakil xinak ex mi jun in cyaj tjilin tib. 32¿Alcye tzak'webl cxel k'ot cye ke sanjel che tzajel sama'n tuj tx'otx' lu? Atzun jlu cxel k'met cye: Tu'n Kman cub tbincha'n tnam Sión, ex tuj tnam Sión che pol ke xjal ate' tuj bis clolte cyib, akeju etzan tu'n.

will be added

X\