OSEAS 9

1Mi'n che tzalaje akeye aj Israel, mi'n che jaw t'icpaje tu'n tzalajbil ic tza'n cye mastl tnam, porque ma cyaj cycoline aju Cydiose tu'n cyc'ulune cywitz tilbilal. Cyuj ke lugar jatum nne'l ttxc'omil triw, atzun cyganiye tu'n ttzaj cyc'mo'ne aju twi cyc'u'je ti'j ju cyyaẍbile. 2Mlay canun triw te cywa xjal ex mi ta'l twitz uva, ex aju ac'aj ta'l twitz uva nok cbel naj. 3Che ajel meltz'aj ke aj Efraín tuj Ejipt ex che chyo'l cyi'j ke chibj tuj Asiria, akeju mayo'n tu'n tley Dios. Mlay che najantl tuj tx'otx' etzan tu'n Kman; 4mlay cub cyko'ntl ta'l twitz uva tibaj altar te jun oyaj te Kman, ex mlay txi cyk'o'n ke chojbil ma chixin. Aju pan cxel cywa'n ic tten ic tza'n pan te bis ti'j jun cyimni, ex alcye oc t-xi wa'nte, bi'x ctz'ilixtel. Ax ke che wa'l ti'j pan lu, ex mlay txi cyi'n tuj tja Kman. 5¿Ti oc cybincha'ye oc tul canun nink'ij, aju nink'ij ma' toclen te Kman? 6Ma che el ok twitz ju xitbil, che oquel chmo'n cyu'n aj Ejipt ex atzun che belex maku'n tuj tnam Menfis. Aju cyk'inumabl aju sak pwak cnajel tu'n ch'i'x c'ul, ex tuj lugar jatum otok che cub ten ctzajel ch'iy ch'i'x. 7Ma pon tk'ijlalil tu'n ttzaj cycastiw. Ma pon tk'ijlalil tu'n tcub k'ot cycastiw ti'j cybinchben. C'elel cynic' aj Israel ti'j oc tul canun jlu. Atzun cyeye in cyma'ne: Minti' tnabl t-sanjel Dios, ex aju xinak in yolin ti'j ju in tzaj tma'n Dios, tzcajte, che chiye. In cyma'ne icju tu'nju nimxix cybinchbene mya ba'n ex nimxix in che ic'une cyi'j. 8Ma cub tk'o'n Dios t-sanjel te xk'ukil cye aj Efraín, atzun cyeye in cub cyk'o'ne c'obil tuj tbe, ax icx in che ic'une ti'j oc tocx tuj tja Dios. 9Ma che naj aj Efraín te jumajx, ic tza'n tuj cyk'ijlalil ke aj Gabaa. Ctzajel tna'n Kman aju cybinchben mya ba'n ex cbel cycastiw tu'n tlaj cyil. 10Chi Kman in tma'n: Tej cycnet aj Israel wu'ne in jaw tzalaje cyi'j mer ic tza'n jun xjal in cnet twitz uva tu'n tuj lugar tzkij tx'otx'. Ke cyxe'chele ic e ela tuj nwitze ic tza'n ke tnejel twitz higo. Pero tej cypon tuj lugar Baal-peor, xi cyk'on cyib te juntl dios ch'ixbajilxix, ex e oc te ic'bilxix ic tza'nx ju tilbilal c'ujla'nxix cyu'n. 11Aju cyajwalil ke aj Efraín cbel naj ic tza'n jun chyu'j in xi lipan ex in cub naj. Mlay che itz'j mastl c'wa'l, ex mlay tz'oc tentl cyal ke xu'j. 12Ex masque che ch'iy ke cyc'wa'l, pero akine chin elel k'inte cye ex mi jun cyjel nk'o'ne. Ay bec'bil cywitz ke xjal lu oc tel npa'n wibe cyi'j. 13Ke aj Efraín ic tza'nx in wile ic cyten ic tza'n tnam Tiro tcubsan tuj jun chk'ajlaj tbanilxix, pero c'eletz cyi'n cyc'wa'l tu'n cycub byo'n. 14Nman, k'onxa aju at tu'n t-xi tk'o'na cye. Binchama tu'n mi'n ttzaj cyal ke xu'j ex tu'n mi'n tten ta'l cyim. 15Chi Kman in tma'n: Tuj Gilgal cybincha tcyakil mya ba'n, ex atzun tzaj ke' tu'n ttzyet wic'une cyi'j. Tu'nju cybinchben mya ba'n che elex wi'ne tuj njaye; mlay che oc nc'ujla'ntle, porque cycyakil ke nejenel cyxol miban che niman. 16Ke aj Efraín at ẍil cyi'j, ic cyten ic tza'n jun wi' tze' tzkij tloc' ex minti'tl twitz nno'c. Masque tzaj cyc'wa'l, pero che najel wu'ne. 17Ke xjal lu cyc'i' tu'n t-xi cyniman tyol Ndiose; cyja'tzun che elel ic'un tu'n, ex nok che betjebel cyuj mastl nasyon.

will be added

X\