OSEAS 8

1K'ajtza'nca aju chun k'i'n tu'na; ke aj k'oj che oquel tzokpaj cyi'j xjal etzan wu'ne ic tza'n nno'c tzokpaj jun t'iw ti'j tcanb. Porque ma che ic' tibaj ju yol cyaj bant ti'j wu'ne cyuc'il ex cyc'i' txi cyniman nleye. 2In jaw tk'ajk'ajel cywi' aj Israel: Kman Dios, ojtzki'na ku'ne, che chi. 3Ke aj Israel ma tz'el cyic'un aju ba'n, ex cyja'tzun che oquel lpe' ke aj k'oj cyi'j tu'n cytzyet. 4Minti' tzaj cyma'n weye tej toc cyk'o'n cyrey ex tej toc cyk'o'n nejenel cyxol, icx minti' chin bine ti'j. O tzaj cyi'n sak pwak ex k'an pwak at cyuc'il tu'n cybant ke tilbilal, ex tu'n jlu cyu'nx cyib che najel. 5Akeye aj Samaria, nne'l wic'une aju tilbilal tal tor in che c'ulune twitz. Nimxix nk'oje ma tzaj cyi'je. ¿Jtoj ban cysakixe? 6Cyu'nx aj Israel ul cyi'n tilbilal tal tor aju at tuj Samaria. Mya Dios te jlu. Bincha'maj tu'n jun xjal ba'n binchan nok alcyex tilbilal, cyja'tzun cbajel buchin. 7Ma cybincha aju minti' tajben, ex tu'n jlu ctzajel nimxix cycastiw; tuj cycojbil minti' twitz awal c'oquel ex mlay tz'el ch'in arin ti'j twitz triw porque minti' tuj, ex katzun ma tz'el cyu'n, cbajel wa'n cyu'n xjal tuj juntl nasyon. 8Ma che naj aj Israel cyu'n mastl nasyon. Ex tuj cywitz mastl nasyon ic cyten ja'lo ic tza'n jun xar minti' tajben. 9Porque o che'x aj kanil onbil cye aj Asiria, ic cyten ic tza'n jun bur te tjak' c'ul puro cyuw twi'. Xi cyk'o'n aj Efraín oyaj cye mastl nasyon tu'ntzun cycolin cyi'j. 10Masque xi cyk'o'n oyaj cye nasyon, ja'lo che oquel nchmo'ne tu'n cyyajlanjtz ch'in tjak' tcawbil rey ex ke nejenel. 11Porque ma jaw cybincha'n aj Efraín nimxix altar tu'n cybinchan il ex o'cx cyajben ke altar cye tu'n cybinchan il. 12Masque xi ntz'ibane nimcu xnak'tzbil cye, pero oc cyk'o'n ic tza'n jun ti'xti minti' ojtzki'n cyu'n. 13Nimxix cygan tu'n t-xi cyk'o'n chojbil ex in bant cyu'n, ex in xi cychyo'n cychibjal alumaj in che'x k'o'n te chojbil; atzun weye, minti' in chin tzalaje cyi'j. Ctzajel nna'ne aju cybinchben mya ba'n in cybincha'n, ex cbel nk'o'ne cycastiw tu'n tlaj cyil, ex che ajel meltz'aj wu'ne tuj Ejipt. 14Ma jaw cybincha'n aj Israel cyja rey, pero nnic' tna'l cyu'n aju Pok'sal cye. Ma jaw cybincha'n aj Judá nimcu tnam toc muro cyi'j, pero c'oquel nk'o'ne k'ak' cyi'j ex che bajel tz'e'y ke tja rey.

will be added

X\