OSEAS 7

1O wajbeye tu'n cyoc nk'anine ke aj Israel, akeju aj Efraín ex ke aj Samaria, pero o cnet nimxix cyil wu'ne tuc'ix cybinchben mya ba'n, porque cycyakil ba'n che nic'an yol, in che ocx tuj cyja xjal ic tza'n ke elek' ex in che oc tzokpaj cyi'j xjal tuj cay. 2Minti' in che ximan ti'j ka cucx na'n tcyakil cyil wu'ne. Ja'lo pe'nin cyi'j tu'n cyex cybinchben ex k'ancha'l tcyakil jlu nwitze. 3Nok tu'nju mya ba'n in bant cyu'n ke xjal etzan wu'ne ex tu'nju cynic'aj yol, in jaw tzalaj ju rey ex ke nejenel. 4Cycyakil ke jlu bi'x ma tz'el cypa'n cyib wi'je; ic cyten ic tza'n jun jorni, nok o'cx oc tjaw c'ant k'ak' tuj minti'tl nno'cx tyucun aju in ak'nan ti'j, acux in bant tten tk'otjil pan. 5Tuj nink'ij te rey bi'x yabt tu'n vin xi cyk'o'n nejenel te. Ex junx ela cyuc'il keju in che xmayin. 6In baj cyximan xjal lu nimcu mya ba'n tuj ewaj, ic cyten ic tza'n jun jorni cheba in c'ant te konic'an, atzun prim te juntl k'ij in c'ant-xix wen. 7Ax toc, cycyakil in che c'ant ic tza'n jun jorni ex keju in che cawin cyibaj o che cub cyu'n. Cycyakil ke cyrey o che cub cybyo'n ex mi a'l jun cyxol ma tzaj kaninte onbil weye. 8Ma baj cysmon cyib aj Efraín cyuc'il txkantl tnam. Ic cyten aj Efraín ic tza'n jun wabj nok junx pac' in tzk'aj. 9Ma tz'el baj cyipun cyu'n xjal cyuj mastl nasyon ex minti' ma tz'el cynic' ti'j. Aju ttzmal cywi' ma sakix tu'n tijin ex minti' nne'l cynic' ti'j. 10Ax ju cynimbil cyib aj Israel ma tz'oc te testiw cyi'jx. Masque icju, pero minti' ma che ajtz meltz'aj tuc'il Kman aju Cydios, ex minti' ma che jyon ti'j. 11Ic cyten aj Efraín ic tza'n jun palom otok tz'e'lel tuj twitz ex minti' tnabl. In xi cykanin onbil cye aj Ejipt ex jurat in che'x kanil onbil cye aj Asiria. 12Octzun cyxi' ma chixin, cxel nxo'ne nxuybe cyibaj, che bel tz'ak wu'ne ic tza'n ke chyu'j in che lipan twitz cya'j; cbel cycastiw wu'ne tu'n tlaj cybinchben mya ba'n. 13Ay bec'bil cywitz tu'nju ma tz'el cypa'n cyib wi'je. Ctzajel xitbil cyibaj tu'nju ma jaw cyi'n cyib wi'je. Wajbile tu'n ncoline cyi'j, atzun cye in che nic'an yol wi'je. 14Masque in che ayayan oc cycub ten twitz watbil, pero minti' in che cubsan nwitze tu'n tcyakil cyanmi. Oc t-xi cykanin triw ex vin, in baj cykesin cyximlal ic tza'n ke xjal mya nimal Dios, ex ma jaw cyi'n cyib wi'je. 15Akine in xnak'tzante cye, ex wu'ne xi nk'o'ne tipun cyk'ab, atzun cye cub cyximan tu'n cybinchante mya ba'n wi'je. 16E aj meltz'aj c'ulul cywitz ke tilbilal; ic cyten ic tza'n jun xobl plech ẍo'c ti'j, oc in xi xo't jun plech, txuc nne'x ti'jxi aju otok txi umlet. Tu'nju cyyol te cynimbil cyib che najel ke nejenel cye tu'n spad, ex cycyakil aj Ejipt che oquel ten xmayil cyi'j.

will be added

X\