OSEAS 4

1Akeye aj Israel cybintze aju yol in tma'n Kman cyeye: Cxtisil Kman cyuc'il xjal najl tuj tx'otx' lu, porque minti' in japun cyu'n aju in cyma'n, minti' cyc'ujlalil ex minti' cyojtzkibl ti'j Dios. 2Nok o'cx in xi cytziyan jun yol, pero minti' in japun cyu'n, in che nic'an yol, in che cub byo'n xjal cyu'n, in che elk'an, aj pajil ke, in che oc tzokpaj cyi'j xjal ex cucx in che cub xjal cyu'n. 3Cyja'tzun, aju cytx'otx' aj Israel puro bis ta' ex in baj cyipun keju najl tuj, in che cyim ke jil te tjak' c'ul ex ke chyu'j ex ke cyiẍ tuj mar. 4Chi Kman: Mi jun tz'oc ten k'malte ka at til juntl ex mi jun tz'oc ten ic'lelte juntl. Aju nk'oje o'cx toc cyi'je, akeye pal. 5Tujxix tkan k'ij che jawil tz'ake, ax icx te konic'an che bel tz'ak keju nno'c cyk'o'n cyib te nsanjele, ex che najel cycyakil aj Israel wu'ne. 6Ke xjal etzan wu'ne minti' cyojtzkibl, cyja'tzun ma che naj. Atzun cyeye akeye pal, tu'nju ma tz'el cyic'une aju ojtzkibl, c'elel wi'ne cyoclene te pal. Tu'n tlaj ma tzic' tna'l nxnak'tzbile cyu'ne, akine Dios, icxtzun weye c'ic'el cyna'l ke cyc'wa'le wu'ne. 7Oc in chmet mas cyajlal ke pal, mas in che binchan il nwitze; cyja'tzun, c'elel wi'ne ju nimbil cye ex c'elel cych'ixwi. 8In che ank'in ti'j chojbil cyil xjal etzan wu'ne, tu'ntzun jlu cyaj cucx tu'n cybinchan xjal il. 9Tu'nju mya ba'n in cybincha'n, cycabil cbel cycastiw, tza'nx ke xjal ax icx ke pal. 10Tu'nju minti'tl in che ajben weye, che wa'l pero mlay noj cyc'u'j, ex che yaẍil pero mlay chmet cybaj. 11Aju yaẍbil ex ju c'aj k'e'n bi'x nne'l ti'n cynabl xjal. 12Ke xjal etzan wu'ne in xi cykanin cynabl cye tilbilal banimaj ti'j tze', ex in ajben jun piẍ tze' cyu'n tu'n cyk'ijin. Tu'nju ma txi cytzokpin cyib tu'n cyyaẍin, ma che el tzpet ti'j cybe; in che yaẍin ex nne'l cypa'n cyib wi'je, akine Cydios. 13In xi cyk'o'n chojbil cywi' ke nmak witz ex in cub cypatun storac cywi' ke tal witz, ax icx in cybincha'n tjak' cyxlecumal ke tze' c'ol, ke chjaj ex ke sic'l. Cyja'tzun in che yaẍin cyme'jele, ex ke cylibe ma che oc te aj pajil. 14Pero mlay cub nk'o'ne cycastiw ke cyme'jele tu'nju in che yaẍin, mi ke cylibe tu'nju ma che oc te aj pajil, porque ax keye xinak in che'xe cyuc'il xu'j jawni cywitz cyuc'il xinak ex oc t-xi cyk'o'ne jun oyaj cye tilbilal, nno'c cyjunin cyibe cyuc'il ke xu'j in che yaẍin, akeju ate' cyuj cyja cydios. Cyja'tzun cyja' txi' tnam lu tuj najen tu'nju minti' cynabl xjal. 15Akeye aj Israel, ma tz'el cypa'n cyibe wi'je tu'n cyc'ulune cywitz tilbilal, cuchiwt mi'n tz'oc lpe' Judá cyi'je tu'n tbinchan il. Mi'n che'xe c'ulul cywitz tilbilal tuj lugar Gilgal, ax icx mi'n che jaxe tuj lugar Bet-avén, ex mi'n tzaj cyna'ne nbiye ti'j jun yol in xi cytziyane. 16Ke aj Israel miban che bin, ic cyten ic tza'n jun tor tx'u'j twi'; tu'n jlu mlay che oc ncwentine tuj tbanil c'ul ic tza'n in che oc cwentin ke tal ẍne'l. 17Ke aj Efraín jumajx ma txi cyk'on cyib tu'n cyc'ulun cywitz tilbilal. E tbant cyu'n. 18Cycyakil ma che cub tz'ak ic tza'n txkan c'al k'e'n. Cucx in cybincha'n ic tza'n jun xu'j jawni twitz cyuc'il xinak ex mas cyajbil tu'n tcub cych'ixwi twitzju tu'n cyjaw nimsa'n. 19Che xel k'i'n tu'n tipumal cyk'ik', ex cbel cych'ixwi tu'nju in che c'ulun cywitz tilbilal.

will be added

X\