OSEAS 2

1Cye cyermaniye xinak cymanxe cyja': Etzan keye tu'n Dios, ex cye cyermaniye xu'j cymanxe cyja': Ma tzaj k'ak'an tc'u'j Dios cyi'je. 2Chi Kman in tma'n: Cymanxe te cytxu'ye aju il in bant tu'n, cymanxe, porque aju xu'j lu ya mya nxu'jile ex ya mya akine tchmil. Ba'n tu'n tch'expet tmod, tu'n mi'n toc tk'on tib te jun xu'j jawni twitz cyuc'il xinak, ex ba'n tu'n cycyaj tcolin ke tyaẍ. 3Katzun mi ma tbincha icju, bi'x cyjel nskitba'ne ti'j: C'oquel wu'ne ic tza'n tej tul itz'j, c'oquel nk'o'ne ic tza'n jun lugar minti' cynajbil xjal tuj ex ic tza'n tzkij tx'otx', ex cymel wu'ne tu'n txketle'n. 4Mlay tzaj k'ak'an nc'u'je cyi'j ke tal, porque sic'aj c'wa'l ke. 5Aju cytxu' ma yaẍin cyuc'il xinak, ma tzaj ti'n tch'ixwi porque o tma: Ma chinxe jyol cye ke xinak at nim cygan wi'je, akeju in che tzaj k'onte nwaye ex aju a' in ajben wu'ne, ex in tzaj cyk'o'n nlane ex nnok'e lino, tuc'ix nchi'ye aseyt ex nc'a'ye, chi cytxu'. 6Cyja'tzun cmaksetel tbe wu'ne tu'n ch'i'x, ex cbajel nbincha'ne pe'n ti'j tu'n mi'n tcnet be tu'n. 7C'oquel lpe' cyi'j ke xinak at nim tgan cyi'j, pero mlay pon canun cyi'j; c'oquel ten jyol cye, pero mlay che cnet tu'n. Ex octzun tma': Chin ajel meltz'aje juntl maj tuc'il nej nchmile, porque mas ba'n in tene tuc'il twitzju in baj wi'je ja'lo, chilo. 8Pero ate xu'j lu minti' el tnic' ti'j ka akine inx k'onte triw te, tuc'ix ta'l twitz uva, tuc'ix tchi' aseyt, ex minti' el tnic' ti'j ka wu'ne chmet sak pwak ex k'an pwak, akeju e ajben tu'n tu'n tbaj tbincha'n ke tilbilal Baal. 9Tu'ntzun jlu c'ajetz wi'ne juntl maj ntriwoye ex ta'l twitz n-uvaye tuj tk'ijlalil oc tjaw tchmo'n twitz tawal, ex c'ajetz wi'ne juntl maj nlane ex nnok'e lino aju otok txi nk'o'ne te tu'n cybant t-xbalun. 10Cbel nskitba'ne ti'j cywitz ke xinak at nim tgan cyi'j ex misicyer jun ccolpilte te tuj nk'abe. 11Cbajel ttzalajbil wu'ne ex ke tnink'ij ex ke nink'ij oc ttzaj que'yin ac'aj xjaw ex ke k'ij te ojlabl ex tcyakil mastl nink'ij. 12Cbajel naj tkan t-uva ex tkan t-higo wu'ne, aju in tma'n ti'j: Atzun chojbil weye jlu tzaj cyk'o'n ke xinak at nim cygan wi'je, chi xu'j. Pero c'oquel nk'one jlu tu'n ttzaj ch'iy c'ul tuj, ex che lo'l ke jil te tjak' c'ul ti'j. 13Cbel nk'o'ne tcastiw tu'nju nim k'ij cub tpatun storac cywitz ke tilbilal, ex tu'nju baj tbinchan tib tu'n xmulk'abaj ex uwj tu'n t-xi lpe' cyi'j ke xinak at nim tgan cyi'j, ex atzun weye ic' nna'le tu'n. Akine Dios in chin k'mante ju yol lu. 14Che oquel nxmoxine ke aj Israel tu'n cyxi wi'ne tuj lugar minti' xjal tuj ex tu'n tcyakil nc'ujlalile chin xel yoline cye. 15Ctzajel ch'iy juntl maj tkan cy-uva wu'ne, ex aju chk'ajlaj Acor jatum tzaj yajbil cyi'j, c'oquel nk'o'ne te jun oybil cye tu'n tke' cyc'u'j ti'j. Atzun ctzajel cyk'o'n cyyol weye ic tza'n tej k'apojxtok ke, tuj k'ij tej cyetz tuj Ejipt. 16C'oqueltzun cyma'n weye cyja': Aya Kchmile che chilo, ex ya mlay tz'oc cyk'o'n nbiye Baal (ex ka patrón). Akine Dios in chin k'mante ju yol lu. 17Ex mlay txi nk'o'ne ambil cye tu'n cyyolin mastl cyi'j cydios xjal baal cybi. 18Tuj tk'ijlalil tzul cbantel ti'j jun nyole cyuc'il ke jil te tjak' c'ul ex ke chyu'j ex ke lobaj, tu'n mi'n cybinchan mya ba'n cyi'j aj Israel; che bel ntokine ke xobl plech ex ke spad tuj tnam lu ex bi'x cwebel k'oj, tu'ntzun cyten xjal tuj txubtxaj, akeju etzan wu'ne. 19Akeye aj Israel, axix toc che oquele te nxu'jile te jumajx ic tza'nx in tma'n ley, porque c'ujla'n keye wu'ne ex at tk'ak'bil nc'u'je cyi'je. 20Che oquele te nxu'jile ex cjapunel nyole cyuc'ile, octzun c'elel cynic'e wi'je, ka akine Cymane. 21Akine Cymane in chin k'mante yol lu: Tuj tk'ijlalil tzul ctzajel ntzak'we'ne aju cyna'j Dios aj Israel ex ctzajel nk'o'ne jbal tibaj tx'otx', 22tu'n ttzaj tk'o'n triw ex twitz uva ex twitz olivo nne'l aseyt ti'j. 23Ke xjal etzan wu'ne che cyjel nk'o'ne tuj tx'otx' te jumajx tu'n cyoc te weye; ctzajel k'ak'an nc'u'je cyi'j aj Israel. Minti' tzaj k'ak'an nc'u'je cyi'j nej. Nej xi nma'ne cye: Mya etzan keye wu'ne, nchiye, atzun ja'lo cxel nma'ne cye: Etzan keye wu'ne, ex atzun cye ctzajel cyma'n weye: Aya Kdiose.

will be added

X\