OSEAS 13

1Tej cyyolin ke aj Efraín tzaj tchi cyi'j xjal, o nimanjtz cyyol cyu'n mastl c'loj cyiyjil aj Israel, pero e naj ke aj Efraín tu'n cyex cyil tu'nju e c'ulun twitz tilbilal Baal. 2Ex cucx cybinchan il. Nno'cx cyk'o'n sak pwak tuj k'ak' tu'n tcub ulj ex in cub cybincha'n ke tilbilal ti'j ic tza'nx cyajbil; cycyakil jlu cybinchben xjal at cynabl tu'n cybinchante. Ex in cyma'n cye xjal: Cyk'onxe ke chojbil cye ex cytz'uban ele cywitz ke tilbilal ic che que'yin ic tza'n jun tal tor, che chi. 3Cyja'tzun, ic che oquel ic tza'n muj in cub juque' prim, ic tza'n tk'ab che'w in cub twitz tx'otx' te prim, jurat in cub naj, ic tza'n ch'im in xi tikan cyk'ik' ex ic tza'n sib in bukin. 4Chi Kman: Akine Cydiose aju Cymane atxix tej cytene tuj Ejipt. Mi'n txi cynimane juntl dios, o'cx kine, ex o'cx akine clol cyeye. 5Akine in cwentin cyeye tuj tzkij tx'otx' jatum at nim ta'w cyak. 6Pero tej tnoj cyc'u'je jaw cyniman cyibe ex ic' nna'le cyu'ne. 7Tu'ntzun jlu ic chin oquele te cyeye ic tza'n jun balun, ex ic tza'n jun tigr chin c'oquel tzokpaje cyi'je tuj be. 8Chin oquel tzokpaje cyi'je ic tza'n jun ttxu oso otok che'x elk'a'n ke tal, ex bi'x cbajel npaẍu'ne cyanmiye. Ex ic tza'n in bant tu'n jun balun, ax che najel wu'ne ma chixin; che najel wu'ne ic tza'n tu'n jun txcup. 9Akeye aj Israel, che najele wu'ne ex ¿alcye jacu onin cyi'je? 10¿Jatum ta' cyreye ja'lo tu'n tcolin cyi'je tuj tcyakil cytanmiye? ¿Jatum ate' ke nejenel cyxole? Ax keye e tzaj kaninte weye tu'n toc nk'o'ne jun cyreye ex ke nejenel cyxole. 11Tej toc nk'o'ne cyreye tzaj nk'oje cyi'je, ax icx tzaj nk'oje cyi'je tej tel wi'ne cyreye. 12Aju cybinchben aj Efraín mya ba'n, c'alo'n tuj potzbil te ex c'u'n aju cyil. 13Ma pon tk'ijlalil tu'n cyoc aj Israel ic tza'n jun c'wa'l cyja' tul itz'j, pero aju c'wa'l lu minti' tnabl, tc'i' tu'n ttzaj pich'e' tu'n tul itz'j. 14Che colpetel wu'ne tu'n mi'n cypon tuj cynajbil cyimni ex che cletel wu'ne te camic. Aya camic, ¿jatum ta' tipumala aju in baj naj nimcu tu'n? Aya cynajbil cyimni, ¿jatum ta' ju xitbil tu'na? Mlay tzaj tz'e'y nc'u'je cyi'j ke xjal lu. 15Masque ic ma che oc aj Israel ic tza'n ajlaj in ch'iy naj, tzul jun cyk'ik' tuj tjawitz k'ij, aju cyk'ik' lu in xumin wen, in tzaj tuj lugar tzkij tx'otx', ex tcyakil a' ex tcyakil twi a' c'ajel tzkij ex cbel baj tu'n. C'elel k'i'n cyk'inumabl tuc'ix tcyakilju wi'yilxix at cye. 16Cbel cycastiw aj Samaria tu'nju ma jaw cyi'n cyib tu'n cyk'ojin ti'j Cydios. Che bel byo'n tu'n spad, ex che bel pek'cha'n ke cyc'wa'l twitz tx'otx' ex ke cyxu'jil ch'ix tul cyal cbajel jako'n cyc'u'j tu'n spad, chi Kman.

will be added

X\