OSEAS 11

1Chi Kman in tma'n cyja': Tej matok c'wa'lx ke aj Israel, ten nim nc'ujlalile cyi'j, ex e jaw nsc'o'ne ma tuj Ejipt tu'n cyoc te nc'wa'le. 2Pero tej cucxtok in chin txocone cyi'j, nok nne'l cypa'n cyib wi'je. Ke xjal etzan wu'ne xi cyk'o'n chojbil cye Baal akeju cydios, ex cub cypatun storac cywitz ke tilbilal. 3Masque icju, akine inx xnak'tzante cye aj Efraín tu'n tbant cybet ex akine inx ẍaklunte cye, pero minti' el cynic' ti'j ka akine cwentil cye. 4Tu'n tk'ak'bil nc'u'je ex tu'n nc'ujlalile e tzaj wi'ne tu'n cyul wuc'ile; el wi'ne aju iktz al tcubsa'ntok cyibaj, ic tza'n nne'l k'i'n yuw tibaj cykul wacẍ ex in cub tene c'a'chal cye. 5Pero minti' cyajbe tu'n cyajtz wuc'ile. Cyja'tzun che ajel juntl maj tuj Ejipt ex aju cyrey aj Asiria ccawil cyibaj. 6Tu'n spad che bel byo'n ke xjal cyuj cytanmi ex bi'x che bajel naj ke tlamel tnam, che najel xjal tu'n tlaj ju cyximbetz mya ba'n. 7Ke xjal etzan wu'ne cucx tel cypa'n cyib wi'je, in jax cysch'i'n twitz cya'j, pero mi a'l jun in onin cyi'j. 8¿Tza'n tten tu'n cycyaj ntzokpi'ne, akeye aj Efraín? ¿Tza'n ten tu'n cycyaj ncoline, akeye aj Israel? ¿Jacupe che naje wu'ne ic tza'n naj aju tnam Adma, ex ka tu'n nbinchanteye cyi'je ic tza'n o bant wu'ne cyi'j aj Zeboím? In tzaj nim ta'w tuj wanmiye, tu'nju at nim tk'ak'bil nc'u'je cyi'je. 9Mlayx cub cycastiwoye wu'ne ic tza'nx nk'oje; ex mlay che naj juntl maj aj Efraín wu'ne porque Dios we kin ex mya xjal. Akine xjan atine cyxole, ex mlayx chin ule xitul cyeye. 10Ke xjal etzan wu'ne che tzajel lpe' wi'je ex chin jawil tzanune cyi'j ic tza'n jun balun. Chin jawil tzanune, ex atzun ke xjal etzan wu'ne che tzajel tuj telex k'ij in che lu'lun wen. 11Che ajetz tuj Ejipt in che kelan wen mer ic tza'n ke chyu'j; che tzajel tuj Asiria mer ic tza'n ke palom; ex che tzajel wi'ne tu'n cynajan juntl maj cyuj cyja. Akine Dios in chin k'mante jlu. 12Txolin wi'je tu'n nic'aj yol cyu'n aj Efraín; txolin wi'je tu'n sbubl cyu'n aj Israel. Ma tz'el cypa'n cyib aj Judá wi'je, akine Xjan ex tz'aklxix.

will be added

X\