OSEAS 10

1Ic cyten ke aj Israel ic tza'n jun tkan uva nim twitz, pero tej toc nim twitz cyawal, cub cybincha'n mastl cy-altar; tej toc cytx'otx' tbanilxix, ax icx tbanilxix e oc ke abj cyu'n, akeju in che cub ten c'ulul cywitz. 2Cabe tten cyximbetz aj Israel, atzun ja'lo cxel cychjo'n cyil. Che bel t-xitun Kman cy-altar ex che bel tbuchin ke abj, akeju in che cub ten c'ulul cywitz. 3Atzun ja'lo oc cyma' ke xjal lu: Minti' kreye porque miban ko nimane te Kman. Pero ¿alcye jun ba'n jacu tbincha jun rey keye? Che chi. 4Nok o'cx in che yolin wen, in xi cytziyan jun yol mya ax toc oc tbant ti'j jun cyyol tuc'il juntl. Aju castiw ctzajel cyibaj ic tten ic tza'n jun tal c'ul puro venen in ch'iy cyxol ke surc tuj cojbil. 5Ke xjal ate' tuj Samaria che tzajel lu'lun, che jawil ok' tu'nju otok naj tilbilal tal tor aju in che c'ulun twitz tuj lugar Bet-avén. Ti'jtzun jlu che jawil ok' tnam xjal ex ke pal, tu'nju otok naj tajwalil. 6Ex tuc'ix ju tilbilal tal tor cxel k'i'n tuj Asiria tu'ntzun t-xi k'o'n teju nintz rey. Cyja'tzun che elel aj Efraín tuj cych'ixwi: Ctzajel cych'ixwi aj Israel ti'j tilbilal in che c'ulun twitz. 7Cbel naj ju rey te Samaria ic tza'n jun ttx'i'lil tze' in xi ikan tu'n a'. 8Che bel xitun ke ja in che ajben te cyc'ulbil xjal cywi witz jatum in bant il cyu'n xjal aj Israel. Che tzajel ch'iy ke ch'i'x c'ul cyuc'ix ke mastl ch'i'x cyibaj cy-altar, ex cxel cyma'n xjal cye nmak witz: Ko cyewan cube, ex cxel cyma'ntl cye ke tal witz: Cytzaj tz'ake kibaje, che chilo. 9Chi Kman in tma'n: Na'nx t-xi cycolin aj Israel tu'n cybinchan il atxix tzaj ke' cyu'n tuj Gabaa; ax ma che cyaj ten tuj cyil. Cyja'tzun cpol canun k'oj tuj Gabaa cyi'j ke binchal mya ba'n. 10Cbel cycastiw tnam xjal lu wu'ne nok jtoj waje. Cjawil cychmon cyib ke nasyon k'ojlel cyi'j oc tcub cycastiw wu'ne tu'n tlaj ju nintz mya ba'n otok cybincha. 11Ke aj Efraín ic cyten ic tza'n jun tal vac mansimaj at tgan tu'n tbet tibaj triw tu'n tel ttxc'omil. Atzun ja'lo ma cub nk'o'ne yuw tibaj cykul tbanilxix, tu'n t-xi cyjawo'n carret; ke aj Judá cxel cyjawo'n punt tu'n cych'oquin ex ke tiyjil Jacob che pa'l k'uban. 12Xi nma'ne cye cyja': Cyawan cu'xe aju tz'aklxix ex cychmon jawe aju c'ujlalil ic tza'n twitz awal. Cybinchame tten cyanmiye tu'n tch'expet cymodiye ic tza'n in jaw k'u't ac'aj tx'otx' tu'n tcu'x awet awal, porque ma pon tk'ijlalil tu'n cyjyone ti'j Kman ocxi tul ex tu'n ttzaj tk'o'n xnak'tzbil cyeye tu'n cbinchanteye aju tz'aklxix. 13Atzun cyeye ma cu'x cyawa'ne ju mya ba'n, ma jaw cychmo'ne aju mya tz'aklxix ex ma tzaj xitbil cyi'je tu'n tlaj oc ke' cyc'u'je ti'j nic'aj yol. Tu'nju ma tz'oc ke' cyc'u'je ti'j cyeye cynable ex cyi'j nimcu xinak at cyuc'ile cyuw cyc'u'j tuj k'oj, 14cyja'tzun nimxix tk'ajk'ajel cywi' aj k'oj che ul k'ojlel cyi'je, ex cycyakil ja te cycolbil cyibe che bel xitun ic tza'n tej tcub xitun aju lugar Bet-arbel tu'n rey Salmán, tej toc ten k'ojlel ti'j ex tej cybaj paẍu'n ke txuybaj cyuc'ix cyal. 15Chin ajele tuj nlugare ex max chin eletze ocxi tel cynic' ti'j cyil ex ocxi cyul jyol weye. Oc ttzaj yajbil cyibaj, che oquel ten jyolte weye, chi Dios.

will be added

X\