Hebreos 7

1Porque ate Melquisedec reytok tuj tnam Salem, ex paltok in ajben teju Dios ma'xix toclen. Ate Melquisedec etz canil ti'j Abraham tej tajtz Abraham tuj k'oj, tcublenxi cyi'j rey tu'n, ex cub cy'iwla'n Abraham tu'n Melquisedec. 2Tcyakilju o tzyet tu'n Abraham tuj k'oj xi tk'o'n tlaji'n te Melquisedec; tnejelxix aju tnabl tbi Melquisedec, jun rey tz'aklxix; ex juntl tbi, rey tuj Salem; atzun in tma'n ju yol lu: Aju rey k'olte cymojbabl cyib xjal. 3Minti' tz'iban alcye tman ex alcye ttxu', ex minti' in tma'n alcye ke t-xe'chel; ex minti' in tma'n jtoje tz'itz'j ex jtoje cyim; icx tten ic tza'n Tc'wa'l Dios, cucx o ten te pal te jumajx. 4Che ximane ti'j, ma'xix t-xilen ju xjal lu, porque tcyakilju el ti'n kxe'chel Abraham cye rey tej toc k'oj, xi tk'o'n tlaji'n te Melquisedec. 5Akeju tiyjil Leví in cyc'mo'n cyoclen tu'n cyoc te pal, ex k'ma'maj cye tu'n tley Moisés tu'n cyc'monte tlaji'n te tcyakil xjal, ax ke cyerman in xi cyk'o'n tlaji'n cye masque ax cyiyjil, porque ax e je'l itz'j ti'j Abraham. 6Atzunte Melquisedec, mya junx tiyjil cyuc'il tiyjil Leví, pero xi tk'o'n Abraham tlaji'n te; ex cub cy'iwla'n Abraham tu'n Melquisedec, ate Abraham o tzaj ttziyan Dios jun yol te. 7Ex clar ta' te yol, aju ch'in toclen in cub cy'iwla'n tu'nju ma' toclen. 8Akeju aj Leví in cyc'mo'n tlaji'n, pero in che cyim; atzunte Melquisedec xi tc'mo'n tlaji'n ex in tma'n tuj Tu'jil ka itz'xte. 9Jacu bant tu'n t-xi kma'n ja'lo: Ke pal tiyjil Leví masque in cyc'mo'n tlaji'n cye xjal, pero ax icx cye mer ic tza'n xi cyk'o'n tlaji'n tej t-xi tk'o'n Abraham te Melquisedec. 10Masque na'nxtok cyitz'j tej tetz Melquisedec canil ti'j Abraham, pero tu'nju ax tzaj cyiyjil ti'j Abraham, cyja'tzun mer ic tza'n cyuc'ix ke e je'x k'onte tlaji'n. 11Ke aj Israel cyc'am ju ley cyu'n ke pal tiyjil Leví, ax tiyjil Aarón. Nokwit at tumel tu'n cyoc aj Israel tz'aklxix cyu'n ke pal tiyjil Leví, entons myawtlo il ti'j tu'n ttzaj junxitl pal icx toclen ic tza'n te Melquisedec, ex myatzun toca cyxol ke tiyjil Aarón. 12Porque ka ma che ch'expet ke pal, ax icx il ti'j tu'n tch'expet ley. 13Porque junxitl tiyjil Jesucrist aju in ko yolin ti'j, mi jun cye o tz'ajben twitz altar. 14Porque clarxix ta', ate Kajaw ul itz'j ti'j tiyjil Judá, minti' o tma Moisés tu'n cyoc tiyjil Judá te pal. 15Ex aju in ko yolin ti'j mas clarxix ta', porque ma tzaj junxitl pal ax toclen ic tza'n te Melquisedec. 16Minti' ma tz'oc te pal tu'nju tiyjil ic tza'n in tma'n ley, nok o'cx ma tz'oc te pal tu'nju tipumal tchwinklal mlay naj. 17Porque in yolin Dios tuj Tu'jil ti'j: Aya c'oquel te pal te jumajx. Ax toclena c'oquel ic tza'n te Melquisedec, chi Dios. 18Cyja'tzun, aju mandamyent at ojtxi ma naj tu'nju minti' tipun ex minti' tajben. 19Porque minti' jun colbil tz'aklxix tzaj tk'o'n tley Moisés. Atzun ja'lo ma tzaj k'o'n jun mas ba'nxix jatum tu'n toc ke' kc'u'j ti'j, tu'ntzun kpon lak'e' ttxlaj Dios. 20Tej toc Jesucrist te pal tzaj tna'n Dios ax tbi ti'j tyol. 21Atzun ke txkantl pal o che oc te pal pero minti' tzaj tna'n Dios tbi cyi'j tu'n cyoc te pal; atzunte Jesucrist ma tz'oc te pal tu'nju yol tzaj tna'n Dios tbi tej t-xi k'ma'n te: Ax tbi Kman tzaj tna'n ti'j tyol ex mlay ch'expet. Chi Kajaw: Aya c'oquel te pal te jumajx. Ax toclena c'oquel ic tza'n te Melquisedec. 22Cyja'tzun, ma tz'oc Jesús te piador ti'j jun yol mas ba'nxix cyaj bant ti'j tu'n Dios kuc'il. 23Akeju txkantl pal nim cybaj e chmet, porque tu'nju in che cyimxi minti' tumel cucx tu'n cyten. 24Atzunte Jesús atx toclen te pal tu'nju cucx tten te jumajx. 25Cyja'tzun tten at tipumal tu'n cyclet te jumajx akeju in che pon lak'e' ttxlaj Dios tu'n Jesús, porque itz' te Jesús te jumajx tu'n tcubsan twitz Dios cyi'j. 26Porque atzun jlu jun tnejel pal ba'n tu'n tajben ke, xjan te, ex minti' til, ex minti' tz'il ti'j, ex tpa'n tib cyi'j aj il, ex ma tz'oc k'o'n toclen te ma'xix cywitz cycyakil keju ate' tuj cya'j. 27Mya il ti'j tu'n t-xi tk'o'n Jesús chojbil tcyakil k'ij ic tza'n in cybincha'n txkantl tnejel pal; tnejel in xi cyk'o'n ju chojbil tu'n tnajset cyil, ex te tibajxi in xi cyk'o'n chojbil tu'n tnajset cyil xjal. Pero mya ic tten te Jesús, porque nok junx maj xi tk'o'n ju chojbil tej t-xi tk'on tib tu'n tcyim. 28Porque tu'n tley Moisés in che oc k'o'n te tnejel pal ke xjal minti'xix cyipun; atzunju yol tzaj tna'n Dios tbi ti'j, o tzaj k'ma'n tu'n Dios te tibajxi ju ley; tzaj k'ma'n tu'n toc aju Tc'wa'l te tnejel pal, aju tz'aklxix te jumajx.

will be added

X\