Hebreos 6

1Cyja'tzun tten, kk'o'nc tilil tu'n tocxix knabl ic tza'n jun tij xjal, ex mya nok o'cx tu'n kyolin ti'j tuj tnejel xnak'tzbil ti'j Crist. Ex mi'n ko aj meltz'aj juntl maj tu'n ttzaj ke' kocslabl ti'j Dios, ex tu'n tajtz ti'j kanmi ti'j kbinchben minti' tajben. 2Ex mya ax tu'n kcyaj ten ti'j ju xnak'tzbil ti'j byabl, ex ti'j ju xnak'tzbil tu'n tcub kk'o'n kk'ab tibaj cywi' ocslal, ex ti'j ju xnak'tzbil ti'j ank'ibl cyxol cyimni, ex ti'j ju xnak'tzbil ti'j jwisi tzul te jumajx. 3Cyja'tzun c'oquel tilil ku'n tu'n toc mastl knabl, ka tajbil Dios. 4Porque akeju ma spic'banjtz tuj cynabl ex ma tz'el cynic' ti'j ju oyaj tzaj tuj cya'j, ex ma cyc'am cyoclen ti'j Xewbaj Xjan, 5ex ma tz'el cynic' ti'j tyol Dios tbanilxix, ex ma cyil ke tbinchben nim cyipumal ctzajel tyec'un tuj tk'ijlalil tzul, 6ka ma che cub tz'ak jlu, mlayx bant tu'n tajtz juntl maj ti'j cyanmi, tu'nju in jaw cyk'o'n Tc'wa'l Dios twitz crus juntl maj, ex in tzaj tch'ixwi cywitz xjal cyu'n. 7Porque ic tza'n jun piẍ tx'otx' in ac' tu'n jbal cucx in cub tibaj, ex in tk'o'n tawal tu'n tajben cye keju in che ak'nan twitz, in cub tcy'iwla'n Dios tx'otx' lu; 8atzunju tx'otx' in tk'o'n ch'i'x ex ch'i'x c'ul, minti'tl tajben; ex jaculo tma Dios tu'n tnaj, ex aju bajsbil te tu'n toc tk'ak'al. 9Erman at nc'u'je cyi'je, masque in chin yoline icju, atzun cyeye, in ke'xix nc'u'je cyi'je oc cybincha'ye aju mas ba'n; atzun jlu jun yec'bil ka ax toc ma che clete. 10Porque ate Dios tz'aklxix, mlay tzic' tna'l tu'n aju cyak'unbene; xi cyyec'une ka at cyc'ujlalile ti'j Dios tu'nju e ajbene cye ocslal ex cucx in che ajbene cye. 11Pero wajbile teyle junjun cyeye cucx tu'n toc tilil cyu'ne tu'ntzun tke'xix cyc'u'je ti'j ju in che ayone ti'j. 12Mi'n waje tu'n cyoque cy'aj, nok o'cx tu'n cyoc lpe'ye cyi'j keju ma cyc'am aju yol tzaj ttziyan Dios, ma cyc'am tu'nju at cyocslabl ex at cypasens. 13Porque tej ttzaj ttziyan Dios tyol te Abraham, ax tbi tzaj tna'n ti'j tyol, porque minti' juntl mas ma' toclen twitz tu'n ttzaj tna'n tbi ti'j tyol. 14Tzaj tma'n te Abraham: Ax toc nimxix cbel ncy'iwla'na, ex cchmetelxix tiyjila wu'ne, chi Dios. 15Cyja'tzun o tc'am Abraham aju tzaj ttziyan Dios te, porque at tpasens tu'n tayon ti'j. 16Ax toc oc in xi cytziyan xjal jun yol axix toc, in tzaj cyna'n tbi juntl mas ma' toclen cywitz; ex ka ma jaw jun yol cyxol, atzun in tzaj cyna'n tbi Dios ti'j cyyol ex tu'n tcyaj segurxix. 17Cyja'tzun tzaj tna'n Dios ax tbi ti'j tyol, porque atzun taj Dios, tu'n ttzaj tyec'unxix ka mlay ch'expet aju cub t-ximan; tzaj tyec'un Dios jlu cye keju at tu'n cyc'monte aju tzaj ttziyan cye. 18Tzaj tna'n Dios ax tbi ti'j tyol tu'n tk'ukbanjtzxix kc'u'j tu'nju cabe yol mlay ch'expet, ex mlay bant tu'n tnic'an Dios yol ti'j jlu; cyja'tzun ma ko pon ok tuc'il Dios tu'n kclet ex tu'n kcambante aju in ko ayon ti'j. 19Aju oybil lu ic tten ic tza'n tak'al barc, in ajben te tzuybil te kanmi tu'n tten kanmi segurxix ex tu'n mi'n kyucch; aju oybil atzun tzajni tuj ju Lugar Xjanxix ti'jxi ju xbalun te makbil tcub tuj tmij tja Dios tuj cya'j. 20Atzun ocx nej Jesús tu'n tjaket kbe. Cyja'tzun ma tz'oc Jesús te tnejel pal te jumajx, ax toclen ic tza'n te Melquisedec.

will be added

X\