1 Porque tcyakil tnejel pal in jaw sc'et cyxol xjal, ex nno'c k'o'n tu'n tyolin cyi'j xjal twitz Dios, atzun tak'un tu'n t-xi tk'o'n oyaj ex chojbil tu'n tchjet cyil xjal. 2 At tpasens cyi'j ke xjal minti' ch'in ba'n cyu'n ex o che el txalpuj, porque icx te minti'xix tipun; 3 ex tu'n tlaj minti'xix tipun, ilxix ti'j tu'n t-xi tk'o'n chojbil tu'n tchjet til, ax icx tu'n tchjet cyil xjal. 4 Ex mya tu'nx te xjal nno'c tk'o'n toclen tu'n toc te tnejel pal; nok o'cx tu'n Dios in txconjtz ex nno'c k'o'n toclen, ic tza'n te Aarón. 5 Ax icx te Crist, minti' jaw tniman tib tu'n toc te tnejel pal, nok o'cx xi k'o'n toclen tu'n Dios tej t-xi k'ma'n te: Aya Ncy'ajale, ma chin oque te tmana ja'lo. 6 Ax icx in tma'ntl tuj Tu'jil: Aya c'oquel te pal te jumajx. Ax toclena c'oquel ic tza'n te Melquisedec, chi tuj Tu'jil. 7 Tuj tk'ijlalil tej tten Crist twitz tx'otx' o na'n Dios ex o cubsanxix wen, ex jaw tk'ajk'ajel twi' cyuw, ex jaw ok' twitz Dios, porque at tipumal Dios tu'n tclet Crist tuj camic tu'n; ex tzaj tbi'n Dios tkanbetz tu'nju niman Dios tu'n. 8 Masque Tc'wa'l Dioste, pero bant tu'n tu'n t-xi tniman tyol Dios tu'nju nimcu ic'x tu'n. 9 Ex tej ttz'aket-xix tuj tcyakil, cyja'tzun oc te colol te jumajx cye cycyakil keju in che niman te. 10 Porque ax Dios o k'mante tu'n toc te tnejel pal, ax toclen ic tza'n te Melquisedec. 11 At nimcu tu'n nyoline ti'j jlu, pero mlay pujet naj porque minti' nno'cx naj tuj cywi'ye. 12 Porque mawtlo che oque te xnak'tzal ja'lo, porque ma bet-xi k'ij t-xilen cyocsla'ne, pero jlu nok o'cx cyajbile tu'n cyxnak'tzanjtze juntl maj ti'j ju tnejel xnak'tzbil ti'j tyol Dios; ex ma che oque ic tza'n tal ne' cucx tu'n t-xi' cych'u'ye ex mlay txi' wabj cyu'ne. 13 Porque alcye cucx tch'u'n, mlay tz'el tnic' ti'j ju yol tz'aklxix, porque ne'x ta'. 14 Atzunju wabj in ajben cye keju ma che ch'iy, ex ma tz'oc cynabl tu'nju nimxi tzic' cywitz ti'j, cyja'tzun nne'l cynic' ti'j alcyeju ba'n ex alcyeju mya ba'n.
Copyright ℗ 2000 Hosanna Grabado por Producciones Cristianas Vina