Hebreos 4

1Cyja'tzun atxcu ju yol tzaj tma'n tu'n kcanun tuj ju ojlabl in tk'o'n Dios, kcwentin oc kib, mya yajcu at jun ke mi'n canun tuj ojlabl. 2Porque icx ke ma tzaj k'ma'n tkanil colbil ke, ic tza'n tzaj k'ma'n cye; pero aju yol cybi aj Israel minti' ajben cye porque minti' xi cyocsla'n tej cybinte. 3Pero akeko' ma kocsla ex ma ko canun tuj ojlabl ic tza'nx o tma Dios: Cyja'tzun tzaj nk'oje cyi'j, ex xi nma'ne jun nyole axix toc cye, tu'n mi'n cyocx tuj tx'otx' jatum tu'n cyojlan wu'ne, chi Dios. Tma Dios jlu masque otok bant tak'un atxix tej tbant twitz tx'otx'. 4Porque tuj Tu'jil at jatum in tma'n ti'j twukin k'ij cyja': Ex ojlan Dios tuj twukin k'ij tej tbaj bant tcyakil tak'un. 5Ex ma cybiye jatum in tma'n: Mlay che ocx tuj tx'otx' jatum tu'n cyojlan wu'ne, chi tuj Tu'jil. 6Atx te yol tu'n cycanun junjun tuj ojlabl in tk'o'n Dios, pero akeju o k'manjtz tkanil colbil cye ojtxi, minti' e canun tuj ojlabl tu'n tlaj minti' xi cyniman tyol Dios. 7Cyja'tzun tten in tzaj tk'o'n Dios juntl k'ij: Tuj k'ij ja'lo, chi tuj Tu'jil. Aju yol lu in tzaj tma'n Dios ke, otok txi tma'n ojtxi, ex tbajlenxi nimcu abk'i o tma juntl maj nok tu'n ju tyol David, ic tza'n ma cybiye in tma'n tuj Tu'jil: Ka ma cybiye aju in tma'n Dios ja'lo, mi'n cub cycyuwsa'ne cyanmiye. 8Porque nokwit xi tk'o'n Josué ojlabl cye aj Israel, miwtlo o yolin Dios ti'j juntl k'ij. 9Cyja'tzun, atx jun ojlabl cye ke xjal etzan tu'n Dios, ic tza'n te Dios tej tojlan tuj twukin k'ij. 10Porque aju ma canun tuj ojlabl in tk'o'n Dios, ax icx ma tz'ojlan tu'n mi'n tak'nantl, ic tza'n te Dios o tz'ojlan tej tbant tak'un. 11Kk'o'nctzun tilil tu'n kcanun tuj ju ojlabl lu, tu'ntzun mi'n kcub tz'ak ic tza'n cye, ex tu'n mi'n koc ic tza'n cye minti' xi cyniman ju yol. 12Porque aju tyol Dios itz'te ex at tipumal, ex mas at ttzi' twitz jun spad cab pac' ttzi'; ex in pon xuyl max tujxi kanmi, ex ti'j kxew, ex ti'j tyakamil kximlal, ex max tujxi kbakil, ex nne'l tnic' ti'j kximbetz ex aju kaj tu'n kbinchante. 13Ex minti' jun tch'isben Dios miwt k'ancha'l twitz, ex minti' jun maksi'n; tcyakil k'ancha'l twitz Dios jatum tu'n kpon k'ol tajlal. 14At jun tnejel pal ke ma' toclen, ma tz'ocx max tuj cya'j, ate Jesús aju Tc'wa'l Dios, cyja'tzun tten, ktzyumxix aju yol ma kocsla. 15Porque at jun tnejel pal ke ba'n k'ak'an tc'u'j ki'j tu'n tlaj minti' kipun, porque tuj tcyakil oc jlu tuj joybil ti'j ic tza'n ke, pero minti' binchan il. 16Ko lak'extzun ttxlaj Dios ex ke'c kc'u'j ti'j tu'n kpon twitz tk'ukbil jatum ta' t-xtalbil, tu'ntzun ttzaj k'ak'an tc'u'j ki'j ex tu'n kc'monte jun xtalbil tuj tk'ijlalil oc tul tajbenxix ke.

will be added

X\