Hebreos 3

1Erman, ma che el pa'ne tu'n Dios tu'n cyajbene o'cx te, ex ma che txconjtze tu'n Dios cyuc'il mastl tu'n cyoque tecuxix. Cyja'tzun che ximane ti'j Jesucrist aju apostl ex tnejel pal ocsla'n ku'n. 2Porque ate Dios oc k'onte Jesús te tnejel pal, ex japunxix tcyakil tyol Dios tu'n Jesús, ic tza'n te Moisés japunxix tcyakil tu'n cyxol ke xjal etzan ke tu'n Dios. 3Porque ba'n tu'n tc'monte Jesús jun toclen mas ma' twitz ju te Moisés, ic tza'n jun xjal binchal ja, mas at toclen twitz ju ja. 4Porque tcyakil ja at jun o binchante; pero atzunju o binchante tcyakil, ate Dios. 5Cyja'tzun, ate Moisés majen, ex japunxix tu'n tuj tcyakil tajbebl cyxol xjal etzan tu'n Dios, porque atzun tak'un Moisés tu'n ttzaj tchic'ba'n ju yol ctzajel tma'n Dios. 6Atzunte Crist C'wa'lbaj te, ex japunxix tu'n cyxol xjal etzan tu'n Dios, ex atzun ko' etzan tu'n Dios ka cucx tke'xix kc'u'j ti'j, ex ka cucx ktzalaj tu'n kayon ti'j ju ctzajel k'o'n ke. 7Cyja'tzun cyna'ntze aju in tma'n Xewbaj Xjan tuj Tu'jil: Ka ma cybiye aju in tma'n Dios ja'lo, 8mi'n cub cycyuwsa'ne cyanmiye ic tza'n tej toc ic'le'n Dios cyu'n aj Israel tuj tk'ijlalil tej toc tuj joybil ti'j cyu'n tuj lugar minti' cynajbil xjal tuj, chi tuj Tu'jil. 9Porque chi Dios: Atzun in oque tuj joybil wi'je cyu'n cyxe'chele ojtxi, ex in probarinjtze cyu'n, masque o cyil nbinchbene tuj 40 abk'i. 10Tu'ntzun jlu tzaj nk'oje cyi'j ke xjal lu ex o nmaye: Cucx in che txalpuje' tuj cyanmi ex mi cyaj tu'n t-xi cyniman nyole. 11Cyja'tzun tzaj nk'oje cyi'j, ex xi nma'ne jun nyole axix toc cye, tu'n mi'n cyocx tuj tx'otx' jatum tu'n cyojlan wu'ne, chi Dios. 12Cycwentin oc cyibe erman, tu'n mi'n toc cyanmiye mya ba'n, ex cycwentin oc cyibe tu'n mi'n tcyaj cycoline cyocslable, ex tu'n mi'n tel cypa'n cyibe ti'j ju Dios itz'. 13Nok o'cx cyk'om cynable cyxolxe junjun k'ij, atxcu ambil ja'lo; tu'ntzun mi jun cyeye cyuwix tanmi tu'n t-sbubl il. 14Porque ma kc'am koclen tuc'il Crist, ka cucx tke'xix kc'u'j ti'j ic tza'n nej, ex ka minti' ma ko yucch. 15Cucx tk'manjtz ju yol lu: Ka ma cybiye aju in tma'n Dios ja'lo, mi'n cub cycyuwsa'ne cyanmiye ic tza'n tej toc ic'le'n Dios cyu'n aj Israel. 16¿Alcyetzun keju oc ic'le'n Dios cyu'n, ex otok cybi tyol? ¿Myapetzun cycyakil keju e je'tz tuj Ejipt tu'n Moisés? 17¿Ex alcyetzun keju tzaj tk'oj Dios cyi'j tuj 40 abk'i? ¿Myapetzun akeju e binchan il ex e cyim tuj lugar minti' cynajbil xjal tuj? 18Ex tej t-xi tma'n Dios jun yol axix toc tu'nx tib, ¿al etzun xi tma'n tu'n mi'n cyocx tuj tx'otx' jatum tu'n cyojlan tu'n? ¿Myapetzun cye keju minti' xi cyniman tyol? 19Cyja'tzun ma kil, minti' bant tu'n cycanun aj Israel tuj ojlabl tu'n tlaj minti' xi cyocsla'n tyol Dios.

will be added

X\