Hebreos 2

1Cyja'tzun il ti'j tu'n t-xi kbi'nxix aju yol ma kbi, tu'ntzun mi'n kel txalpuj ti'j. 2Porque at tipumal ju yol cyaj cyma'n anjel ojtxi, ex tzaj jun castiw tuj tumelxix cyibaj keju e ic' tibaj ley ex minti' xi cyniman, 3¿yajtzun ke, tza'n tten tu'n kcyaj clet ka ma cyaj kcolin jun colbil ma'xix toclen? Aju colbil lu tnejelxix tzaj tpacba'n Kajaw, ex mas o cyuwsanjtz cyu'n keju e binte, ex tzaj cyma'n ke. 4Ex tzaj tchic'ba'n Dios ka ax toc ju yol tzaj cyma'n ke, tzaj tchic'ba'n cyu'n ke señ, ex cyu'n tbinchben nim cyipumal, ex cyu'n junxilchak techal, ex tu'nju cyoclen tzaj tk'o'n Xewbaj Xjan xi t-sipan Dios ic tza'nx tajbil. 5Porque minti' cyaj tma'n Dios tu'n cycawin ke anjel cyibaj xjal tuj ju tk'ijlalil tzul, aju in chin yoline ti'j. 6Pero at jun o yolin ti'j tuj Tu'jil, in tma'n: ¿Ti cyxilen xjal? ¿Tiku'n cucx in che tzaj tna'na ex cwentin ke tu'na? 7Nok te cab k'ij oc tk'o'na mas ch'in cyoclen cywitz ke anjel, pero te tibajxi xi tk'o'na cyajwalil ex nimbil cye ic tza'n jun rey. Xi tk'o'na cyoclen tibaj tcyakil tak'unbena. 8Tcyakil cyaj tk'o'na tjak' cycawbil, chi tuj Tu'jil. Cyja'tzun, tej tcyaj tk'o'n Dios tcyakil tjak' cycawbil xjal, minti' jun cyaj tk'o'n myawt tjak' cycawbil tcub; pero na'nx klonte ja'lo ka ma cyaj ten tcyakil tjak' cycawbil. 9Pero in kque'yin Jesús aju oc k'o'n mas ch'in toclen cywitz ke anjel, pero nok te cab k'ij; atzun ja'lo ma txi k'o'n nim toclen ex ma jaw nimsa'n tu'n tlaj ju c'ixc'oj ic'x tu'n tej tcyim, cyim tu'n klaj kcyakil nok tu'n t-xtalbil Dios. 10Tej tcub t-ximan Dios tu'n t-xi ti'n nimcu c'wa'lbaj tuj cya'j, ilxixtzun ti'j tu'n ttz'aket-xix aju binchalte colbil cye tu'nju c'ixc'oj ic'x tu'n, porque tete Dios tcyakil ex tu'n o bant tcyakil. 11Porque akeju ma che el tpa'n Crist tu'n cyajben o'cx te Dios, junx cyman tuc'il Crist, cyja'tzun minti' in ch'ixwi Crist tu'n cyoc tk'o'n te terman, 12porque in tma'n tuj Tu'jil: Cxel nma'ne tkanil ti'ja cye wermaniye, ex cxel nk'o'ne chjonte teya cyxol keju in cub cybuyin cyib. 13Ex juntl maj in tma'n: Ckebel nc'u'je ti'j Dios. Ex juntl maj in tma'n: Lu kine lu cyuc'ix ke nc'wa'le e tzaj tk'o'n Dios, chi tuj Tu'jil. 14Ic tza'n cye c'wa'lbaj junx cychibjal ex junx cychc'el, ax icx te Crist oc te xjal, at tchibjal ex tchc'el ic tza'n cye, tu'ntzun tnaj tipumal tajaw camic, aju tajaw il, tu'nju o cyim Crist, 15ex tu'n cytzokpet cycyakil keju tzyu'n ke te majen tu'nju cucx in che xob twitz camic tcyakil k'ij. 16Porque mya cye anjel in tzaj tk'o'n onbil, nok o'cx cye tiyjil Abraham. 17Cyja'tzun tten, ilxix ti'j tu'n toc Crist ic tza'n ke terman tuj tcyakil tza'n cyten, tu'ntzun tk'ak'anxix tc'u'j cyi'j ex tu'n toc te tnejel pal in japunxix tu'n tuj tajbebl twitz Dios, ex tu'n tchjet cyil xjal tu'n. 18Porque tu'nju ic'x tu'n Crist tej toc tuj joybil ti'j, cyja'tzun at tipumal tu'n tonin cye keju in che oc tuj joybil cyi'j.

will be added

X\