Hebreos 11

1Tu'n kocslabl in ke'xix kc'u'j ti'j tu'n kc'monte aju in ko ayon ti'j, ex tu'n kocslabl in ke'xix kc'u'j ti'j ka axix toc aju minti' k'ancha'l. 2Ke xjal e ten ojtxi, nok tu'nju at cyocslabl o yolin Dios cyi'j ka ba'n ke. 3Tu'n kocslabl nne'l knic' ti'j, tcyakilju at o bant tu'n tyol Dios; cyja'tzun tten, tcyakilju k'ancha'l ja'lo minti' ajben jun ti'xti k'ancha'l tu'n tbant. 4Tu'n tocslabl Abel xi tk'o'n jun oyaj te Dios, mas ba'n oyaj lu twitzju oyaj xi tk'o'n Caín; ex tu'n jlu o yolin Dios ti'j ka tz'aklxix Abel, ex ba'n e'la tuj twitz Dios aju oyaj xi tk'o'n; cyja'tzun, masque o cyim Abel pero cucx tyolinjtz ti'j tu'nju at tocslabl. 5Tu'n tocslabl Enoc aj k'i'n ex minti' cyim, ex minti' cnet porque ax Dios aj k'inte; ex na'nxtok taj k'i'n in tma'n tuj Tu'jil ka o tzalaj Dios ti'j. 6Pero ka minti' kocslabl mlayx tzalaj Dios ki'j, porque ka taj xjal tu'n tpon lak'e' ttxlaj Dios, ilxix ti'j tu'n tocslan ka at Dios, ex ka a Dios in tzaj k'onte jun oyaj cye keju in che jyon ti'j. 7Tu'nju at tocslabl Noé tzaj k'ma'n te tu'n Dios ti'j ju na'nxtok tyec'unjtz, ex tu'nju at tchi Dios tuj twitz tbincha Noé jun matij barc jatum tu'n cyclet keju ate' tuj tja. Ex tu'n tocslabl Noé cub cysentens cycyakil xjal, ex oc k'o'n Noé te tz'aklxix tu'n Dios nok tu'n tocslabl. 8Tu'nju at tocslabl Abraham xi tniman ju txocbil te tu'n Dios tu'n tetz tuj ttanmi, tu'n tpon tuj jun lugar jatum tu'n tc'monte jun tetzbil. Etztzun minti' ba'n tu'n jatum tu'n tpon. 9Tu'nju at tocslabl Abraham o ten tuj ju tx'otx' tzaj ttziyan Dios te, ic tza'n nok te tposad tuj cytx'otx' junxitl xjal, ex o ten tuj jun ja xbalun ja tuc'ix Isaac ex tuc'ix Jacob, ax icx cye at cyoclen ti'j ju tx'otx' tzaj ttziyan Dios. 10Porque in ayontok Abraham ti'j ju tnam at ke t-simyentil, ax Dios ximal ti'j ex ax binchalte. 11Ax icx te Sara, masque otok tijin ex minti' tal, pero nok tu'nju at tocslabl tc'am tipumal tu'n toc ten tal, ex itz'j jun tal porque xi tocsla'n ka ax toc tu'n tjapun tyol Dios tzaj k'ma'n te. 12Cyja'tzun tten, masque otok tijin Abraham wen, pero nim xjal e je'l pok'l ti'j ic tza'n cyajlal ke che'w twitz cya'j, ex ic tza'n ttxa tz'a'n ttzi mar mlay bant tajlanjtz. 13Cycyakil ke jlu e cyim tuj cyocslabl, minti' cyc'am aju tzaj ttziyan Dios cye; nok o'cx xi cyque'yin ic tza'n najchak, xi cyocsla'n ex e tzalaj ti'j. Cyja'tzun tzaj cychic'ba'n ka stranjer xjal ke ex betin xjal ke twitz tx'otx'. 14Porque akeju in che yolin icju in cychic'ba'n ka in che jyon ti'j jun cytanmi. 15Nokwit cucx e ximan ti'j ju tnam jatum e je'tz, owtlo che aj meltz'aj juntl maj jatum e je'tz. 16Pero aju cyajbil tu'n cypon tuj jun tman mas ba'n, atzun ta' tuj cya'j; tu'ntzunju minti' in chi'ixwi Dios tu'n toc te Cydios, porque ma bant jun tnam te cye tu'n. 17Tej tprobarinjtz Abraham tu'n Dios, xi tk'o'n Abraham Isaac ic tza'n jun chojbil nok tu'nju at tocslabl. Masque otok tc'am Abraham ju yol tzaj ttziyan Dios te, pero bant tten tu'n t-xi tk'o'n o'cxcu jun tc'wa'l ic tza'n jun chojbil. 18Ex otok tzaj k'ma'n te tu'n Dios: O'cx ke tc'wa'l Isaac che oquel te tiyjila, chi Dios. 19Cub t-ximan Abraham ka at tipumal Dios tu'n cyjaw ank'in xjal tu'n cyxol cyimni; ex o tc'am tc'wa'l juntl maj, mer ic tza'n otok jaw ank'in cyxol cyimni. 20Tu'nju at tocslabl Isaac cub tcy'iwla'n Isaac Jacob tuc'ix Esaú tu'n cyc'monte jun cy'iwbil cyja'tok ttzaj. 21Ax icx te Jacob tej ch'ixtok tcyim, cub tcy'iwla'n cycabil tc'wa'l José tu'nju at tocslabl, ex o c'ulun twitz Dios moc'l tibaj tcy'ako'ch. 22Atzunte José, tej ch'ixtok tcyim o yolin ti'j ka attok cyeletz aj Israel tuj tx'otx' Ejipt, ex cyaj tma'n cye tu'n cyetz k'i'n ke tbakil. O yolin ti'j jlu tu'nju at tocslabl. 23Tej titz'j Moisés xi ewan tuj ox xjaw cyu'n ke tman tu'nju at cyocslabl, porque o cyil mejortok que'yin ju tal ne' Moisés. Ex minti' e xob masque otok txi tk'o'n rey orden tu'n cycub byo'n ke tal k'a. 24Tej tch'iy Moisés minti'tl o tajbe tu'n toc tbi tal tme'jel rey tuj Ejipt, porque at tocslabl Moisés. 25Mas o tajbexix Moisés tu'n tyajlanjtz cyuc'il ke xjal etzan tu'n Dios, ex mya tu'n ttzalaj ti'j ju achbil in tk'o'n il aju nok te cab k'ij. 26Cub t-ximan Moisés tu'n tyajlanjtz tu'n tlaj tbi Crist porque mas k'inumablxix jlu twitzju cyk'inumabl aj Ejipt; porque atzun toc tc'u'j ti'j ju oyaj ctzajel tk'o'n Dios te. 27Tu'nju at tocslabl Moisés etz tuj tx'otx' Ejipt, minti' o xob twitz ju tk'oj rey, porque tcyuwsa tib, mer ic tza'n in que'yin ti'j ju Dios minti' k'ancha'l. 28Tu'nju at tocslabl Moisés cub tic'sa'n ju Xjan K'ij, ex xi tma'n cye aj Israel tu'n toc chitet chic' ttzi cyja, tu'ntzun mi'n cynaj ke nej c'wa'lbaj tu'nju anjel byol xjal. 29Tu'nju at cyocslabl aj Israel, e ic'tz tuj Mar Cyak Que'yin ic tza'n in che bet twitz tx'otx' tzkij; ax icx cye aj Ejipt o cyajbe tu'n cyic'tz, pero e baj naj tuj a'. 30Tu'nju at cyocslabl aj Israel, e cub tz'ak ke ma tij muro ti'j tnam Jericó tbajlenxi cybetin wuk k'ij ti'jele. 31Ate xu'j Rahab, aju jawni twitz cyuc'il xinak, minti' o naj cyuc'il ke xjal miban che bin, tu'nju at tocslabl xu'j, porque ba'n e c'monjtz ke que'yil tx'otx' tu'n. 32¿Ex alcye mastl cxel nma'ntle? Porque mlaylo canun k'ij tu'n t-xi ntx'olba'ne ti'j Jedeón, ti'j Barac, ti'j Sansón, ti'j Jefté, ti'j David, ti'j Samuel ex cyi'j ke t-sanjel Dios. 33Tu'nju at cyocslabl cub cyi'j mastl nasyon cyu'n, ex e cawin tuj tumelxix, ex o cyc'am aju tzaj ttziyan Dios cye. O makset cytzi' balun cyu'n, 34ex ju k'ak' in julin wen o yupj cyu'n, ex e colpaj tu'n mi'n cycyim tu'n spad. Masque minti' cyipun pero o cyc'am cyipumal, e oc nim cyipumal tuj k'oj, e je'l ok ke soldad stranjer xjal cyu'n. 35Ke xu'j cyc'am juntl maj cycyimni tej cyjaw ank'in. Atzun ke txkantl xjal e baj c'ixbisa'n tu'n cycyim, minti' cub tuj cywitz tu'n cytzokpet, tu'ntzun cycambante jun ank'ibl mas ba'nxix. 36Ex txkantl e oc yaso'n ex e baj asyalin, ax icx e oc c'alo'n tu'n caden ex e ocx k'o'n tuj pres. 37At junjun e oc xo'n tu'n abj, ex at junjun e cub tu'n sier, ex at junjun e oc tuj joybil cyi'j, ex at junjun e cyim tu'n spad; ex at junjun nok in che betje' toc cyxbalun ttz'umal ẍne'l ex ttz'umal chip, meba xjal ke, e c'ixbisanjtz ex e yajlanjtz. 38Ba'n ke jlu, pero minti' tumel tu'n cyten cyxol ke mastl xjal mya ba'n, cyja'tzun nok in che betje' cyuj lugar minti' cynajbil xjal tuj ex cywi witz ex t-xe pic, ex t-xe jul. 39Cycyakil ke jlu tma Dios cyi'j ka ba'n ke tu'nju at cyocslabl, pero minti' o cyc'am aju tzaj ttziyan Dios cye. 40Porque at juntl mas ba'n banin tu'n Dios te ke, tu'ntzun cyoc tz'aklxix junx kuc'il.

will be added

X\