Hebreos 10

1Porque ate tley Moisés nok t-xlecumal aju tbanil attok tulel, mya acu te ley k'olte tbanil; cyja'tzun, akeju in che pon c'ulul mlay che oc tz'aklxix tu'nju aylex chojbil cucx in cyk'o'n tcyakil abk'i. 2Porque nokwit at tumel tu'n cyoc xjal te tz'aklxix tu'n ley, owtlo cyaj cycolin tu'n cyk'onte chojbil; porque bi'xwitlo cyaj sakix tuj cyanmi keju in che c'ulun, ex miwtlo in tzaj cyna'ntl ju cyil. 3Pero tu'nju cucx in cyk'o'n chojbil tcyakil abk'i, cyja'tzun, cucx in tzaj cyna'n cyil tcyakil abk'i. 4Porque mlay najset ju il tu'n cychc'el tor ex cychc'el tman chip. 5Cyja'tzun, tej tul Crist twitz tx'otx' xi tma'n te Dios: Minti' taja cyi'j alumaj in che'x k'o'n te chojbil, ex mi cyi'j ke oyaj ti'j twitz awal, pero ma tbinchaya jun nximlale. 6Minti' tzalaja cyi'j ke chojbil in che cub patit ex ke chojbil il. 7Xitzun nma'ne: Lu kine lu Dios, ma chin ule binchalte ju tajbila ic tza'n ju yol tz'iban wi'je tuj Tu'jil, chi Crist. 8Tnejel in tma'n: Minti' taja cyi'j ke chojbil ex ke oyaj ex ke chojbil in che cub patit ex ke chojbil il, ex minti' tzalaja cyi'j. Ake jlu in che k'onjtz ic tza'n in tma'n ley. 9Ex te tcabin in tma'n: Lu kine lu, Dios, ma chin ule tu'n nbinchanteye aju tajbila. Atzun jlu in tma'n, ma tz'el ti'n Dios ju chojbil aju in tma'n ojtxi ley; ex aju t-xel ma tz'oc tk'o'n, ax te Crist ma tz'oc te chojbil. 10Ex tu'nju tbincha Crist tajbil Dios, ma ko el tpa'n tu'n kajben o'cx te, tu'nju nok junx maj xi tk'on tib Jesucrist tu'n tcyim te chojbil il. 11Ax toc tcyakil k'ij in che ajben ke pal judiy, ex cucx in xi cyk'o'n axju chojbil nimcu maj, pero mlay bant tu'n tnajset il cyu'n ke chojbil lu. 12Atzunte Jesucrist nok junx maj xi tk'on tib, oc te jun chojbil tu'n tnajset il, ex cubtzun ke' tuj tbank'ab Dios, 13ex atzun in ayon ti'j ja'lo tu'n tcub cyi'j aj k'oj ti'j. 14Porque tu'n junx chojbil ma che oc tz'aklxix tu'n te jumajx akeju ma che el tpa'n Dios tu'n cyajben o'cx te. 15Ex ax in tchic'ba'n Xewbaj Xjan ke; porque nej in tma'n ju yol lu: 16Atzunju yol lu cyjel bant ti'j wu'ne cyuc'il tuj tk'ijlalil tzul, chi Kman: C'oquex nk'o'ne nleye tuj cyanmi, ex cbel ntz'ibane tuj cynabl. 17Ax icx in tma'n: Ex te jumajx mlay tzaj nna'ntle cyil tuc'ix ju cybinchben mya ba'n, chi Kman. 18Cyja'tzun, ka ma cub najset cyil, ya mya il ti'j tu'n tchjet juntl maj il. 19Cyja'tzun, erman, at koclen tu'n kocx tuj ju Lugar Mas Xjanxix nok tu'nju tchc'el Jesucrist. 20Atzun ko oquex tuj ju be ac'aj te chwinklal, aju o tbincha Crist ke tu'n kocx ti'jxi ju xbalun te makbil tcub tuj tmij tja Dios; aju xbalun te makbil atzun in yolin ti'j t-ximlal Crist. 21Ate Jesús jun kpal ma' toclen cawil kibaj, ako' etzan tu'n Dios. 22Cyja'tzun ko lak'e'x ttxlaj Dios tuc'il kanmi axix toc, ex k'uklxix kc'u'j ti'j tu'n kocslabl, ex tx'jo'maj tuj kanmi tu'n Crist tu'n mi'n ttzaj kna'ntl kil, ex tx'jo'maj kximlal tu'n a' sak. 23Cucx tke' kc'u'j ti'j Dios, ex mi'n jawje' kc'u'j ti'j, porque te Dios in japunxix tyol tu'n. 24Ko ximan ti'j tu'n kcyuwsante kib kxolx tu'n kc'ujlante kib ex tu'n kbinchante ba'n. 25Ex mi'n txi kcolin tu'n toc kbuyin kib, ic tza'n junjun ma che nak'et minti' in nno'c cybuyin cyib; pero kk'om knabl kxolx, axixpe jlu tu'n kbinchante, porque in lak'ex ttzaj tk'ijlalil tu'n tul Kajaw. 26Porque ka tu'n kex kgan cucx in ko binchan il ex otok tz'el knic' ti'j ju yol axix toc, minti' juntl chojbil tu'n tchjet il. 27Nok o'cx tzul nim xobajil kibaj, porque tzul jwisi ex ctzajel tk'oj Dios cyi'j cycyakil keju in che k'ojin ti'j Dios tu'n cynaj tuj k'ak'. 28Porque ojtxi ka at jun xjal minti' in xi tniman tley Moisés, ex ka at cab ox xjal testiw ti'j ka ax toc minti' in xi tniman xjal ley, bi'x in cub t-sentens xjal tu'n tcyim, minti' tumel tu'n tco'pj. 29¿Yajtzun ja'lo, chi toc cyu'ne? ¿Myapelo mas cyuw tcastiw xjal tzul, aju xjal nne'l ic'un Xewbaj Xjan tu'n, aju k'ol xtalbil, ex ka in cub yajan Tc'wa'l Dios tu'n, ex ka nno'c tk'o'n tchc'el Crist te minti' tajben? Porque aju tchc'el Crist atzunju in cyuwsante ju yol ma cyaj bant ti'j tu'n Dios cyuc'il xjal, ex tu'nju tchc'el Crist otok cyaj sakix tanmi xjal. 30Porque ba'n ku'n, ate Kman o k'mante: Wu'ne c'ajel t-xel, akine chin k'olte castiw, chi Kman. Ax icx in tma'n tuj Tu'jil: Ke xjal etzan ke tu'n Kman cbel cycastiw tu'n. 31Puro xobajilxix ka ma cub tz'ak jun xjal tjak' tcastiw Dios. 32Pero cyna'ntze tcyakilju o baj cyi'je c'itzketok spic'banjtz tuj cynable tu'n tyol Dios; nim e yajlanjtze cyu'n xjal, pero ic'x cyu'ne. 33At junjun maj e oc yaso'ne ex e baj yajla'ne cywitz cycyakil xjal, ex at junjun majtl tzajxix cybise cyi'j cyuc'ile tej cylonteye in che yajlanjtz. 34Tzajxix cybise cyi'j cyuc'ile e ocx tuj pres; ex tej ttzaj orden tu'n tel cyi'n xjal tcyakilju at cyeye, ic'x cyu'ne ex e tzalaje, porque ba'n cyu'ne at jun cyetzbile tuj cya'j mas tbanilxix ex mlay naj. 35Cyja'tzun, cucx ke'c cyc'u'je ti'j Dios, porque ka cucx in ke' cyc'u'je ti'j Dios, ma'xix jun oyaj ctzajel tk'o'n Dios cyeye. 36Il ti'j tu'n tten cypasense, tu'ntzun cybinchanteye aju tajbil Dios; octzun cyc'ma'ye aju ma tzaj ttziyan Dios cyeye. 37Porque in tma'n tuj Tu'jil: Aju xjal at tulel, ch'ix tul. Mlay we', tzul naj. 38Pero aju xjal ma tz'oc te tz'aklxix wu'ne, nok tu'n tocslabl cank'il. Pero ka ma cyaj tcolin tocslabl, mlay chin tzalaje ti'j, chi Dios. 39Atzun ke' mya junx ato' cyuc'il keju in cyaj cycolin cyocslabl ex in che naj. Atzun ato' cyuc'il keju junx kocslabl cyuc'il tu'n tclet kanmi.

will be added

X\