1 Nimcu maj o yolin Dios ojtxi cye kxe'chel ex tuj nimcu tumel tzaj tk'o'n tyol cye t-sanjel tu'n ttzaj cyma'n. 2 Te mancbilxitzun tuj tk'ijlalil ja'lo ma tzaj tma'n Dios tyol te Tc'wa'l tu'n ttzaj tma'n ke, ex ma tz'oc tk'o'n Dios Tc'wa'l tu'n toc te etzal te tcyakil. Ax icx tcyakilju at, tbincha Tc'wa'l Dios, ax Dios k'mante tu'n tbant. 3 In tkoptz'a'n C'wa'lbaj t-spic'umal Dios, ax tilbilal C'wa'lbaj ic tza'n tilbilal Dios, ex tzyu'n tcyakil tu'n C'wa'lbaj tu'n tyol at tipumal. Tej tel tx'jet kil tu'n, cubtzun ke' tuj bank'abaj ttxlaj Dios tuj cya'j, aju Dios ma'xix toclen. 4 Cyja'tzun ma tz'oc Tc'wa'l Dios mas at toclen cywitz ke anjel, porque ma tz'oc jun tbi mas at toclen twitz cybi anjel. 5 Porque mya te jun anjel xi tma'n Dios ju yol lu: Aya Ncy'ajal, ma chin oque te tmana ja'lo. Ex mya ti'j jun anjel o tma ju yol lu: Akine chin oquel te tman, atzun te c'oquel te nc'wa'le, chi Dios. 6 Pero tej ttzaj tk'o'n Dios nej Tc'wa'l cyxol xjal, o tma: Cycyakil ke t-anjel Dios che c'ulun twitz, chi Dios. 7 Pero atzunju yol lu in tma'n Dios cyi'j anjel: In che oc tk'o'n ke t-anjel ic tza'n cyk'ik', ex ke ajbel te in che oc tk'o'n ic tza'n tkan k'ak', chi tuj Tu'jil. 8 Atzun ti'j C'wa'lbaj in tma'n cyja': Aya Dios, aju tcawbila cucx cyjel ten te jumajx tuj tcyakil tabk'iyil; ex tuj tumelxix in cawina. 9 Ma tzalaja ti'j ju tz'aklxix ex ma tz'el tic'una aju mya ba'n. Cyja'tzun ma jaw sc'o'na tu'n Dios, aju Tdiosa, ex mas ma tzalaja tu'n cywitz ke mastl tuc'ila. 10 Ax icx in tma'n: Aya Kman, t-xe tnejel cub tk'ukba'na tx'otx', ex tu'nxa o bant cya'j. 11 Oc che najel jlu, atzun teya cucx ctela te jumajx. Cycyakil jlu oc che bajel ic tza'n jun xbalun; 12 ex cbel tbalk'i'na ic tza'n jun xbalun, ex che ch'expetel ic tza'n jun xjal in baj tch'expu'n t-xbalun. Atzun teya, cucx ttena te jumajx, ex minti' bajsbil te tabk'iyila, chi tuj Tu'jil. 13 Pero mi jun maj tma Dios te jun anjel cyja': Kecuya ntxlaje tuj nbank'abe acutzun in cub cyi'j aj k'oj ti'ja wu'ne, chi Dios. 14 Cycyakil anjel xewbaj ke ex in che ajben te Dios, in che tzaj sama'n tu'n cyonin cye keju in che clet.
Copyright ℗ 2000 Hosanna Grabado por Producciones Cristianas Vina