HAGEO 2

1Tuj 21 tajlal twukin xjaw tzaj yolin Kman juntl maj te Hageo aju t-sanjel, 2ex xi tma'n te tu'n t-xi tma'n te Zorobabel, te Josué ex cye xjal otok che ul meltz'aj tuj cytanmi: 3Ka at jun cyxole o que'yinte aju tbanilxix binchben te tja Dios nej, ba'n tu'n ttzaj tma'n ka junx ta' tuc'il ju niban tbant ja'lo. ¿Myape ax toc a jlu minti' ma pon binchben te ic tza'n aju bant nej? 4Pero tenx tipuna, aya Zorobabel; tenx tipuna Josué, aya nejenel cye pal, ex tenx cyipune cycyakile akeye xjal ate'ye tuj tx'otx' lu; che ak'nane porque chin tele cyuc'ile. Akine Cymane, aju Tajaw Tcyakil in xi nma'ne jlu cyeye. 5Ic tza'n xi ntziyane cyeye tej cyetze tuj Ejipt, aju Nxewe cucx at cyuc'ile. Mi'n che xobe. 6Ch'ix tpon tk'ijlalil tu'n ttzaj yucch cya'j ex enter tx'otx' wu'ne, tuc'ix mar ex tx'otx'. 7Che tzajel lu'lun cycyakil nasyon wu'ne ex ctzajel cyi'n cyk'inumabl, ex cnojel njaye tu'n wajwalile. Akine Cymane aju Tajaw Tcyakil in chin k'mante jlu: 8Weye aju sak pwak ex k'an pwak chi Kman, aju Tajaw Tcyakil. 9Aju njaye lu mas tbanil c'oquel ic tza'n tnejel ex wu'ne che tel xjal tuj tzalajbil tuj lugar lu. Akine Cymane aju Tajaw Tcyakil in chin k'mante jlu. 10Tuj 24 tajlal tbelajin xjaw te tcabin abk'i ttzyetlen tcawin rey Darío, tzaj yolin Kman tuc'il Hageo aju t-sanjel, chi cyja': 11Atzun jlu in tma'n Kman aju Tajaw Tcyakil: Kaninxa cye pal junjun xjel ti'j ley cyja': 12Ka at jun xjal ma txi k'inte chibj xjansamaj balk'i'n tuj t-ẍjo'w, ex ka ma tzic' tacl ttxa'n t-ẍjo'w ti'j pan, chibj, ta'l twitz uva, chibj aseyt, ex ka juntl wik chibj, ¿Jacupe che xjanset ke jlu icju? Atzun cye pal tzaj cytzak'we'n, mlay, che chi. 13Xi tkanin Hageo juntl xjel cyja': Pero ka at jun otok tz'ilix tu'nju toclen tmaco'n t-ximlal jun cyimni ex ka ma tz'oc tmaco'n ke ti'xti lu: ¿Mlaype che oc ke jlu te tz'il? Atzun cye pal tzaj cytzak'wen, jacu, che chi. 14Xitzun tma'n Hageo: Chi Kman in tma'n: Ictzun in baj cye ke xjal lu: Tcyakil aju in cybincha'n ex tcyakil aju in tzaj cyk'o'n weye, puro tz'il ke. 15Textzun ja'lo che ximane ti'j jlu, na'nxtok ttzyet tu'n tjaw binchet njaye, 16¿Alcyetok in baj cyi'j xjal? Ka at jun ma txi' jatum ta' jun byuj twitz awal te winkin malbil, oc tpon k'ilte nok laj malbil in bant, ex oc t-xi' jun jatum nne'l ta'l twitz uva tu'n tjatz ti'n 50 ẍok' ta'l twitz uva, oc tpon k'ilte nok winkin ẍok' in bant. 17O naj tcyakil cyak'unbene wu'ne tu'n cyk'ik', yabil ex sakbakun, atzun cyeye minti' e ajtz meltz'aje wuc'ile. Akine Cymane in chin k'mante jlu. 18Cyk'o'nque cwent ti'j, ja'lo 24 tajlal tbelajin xjaw ma cub ke' t-simyentil njaye, ex tz'elx cynic'e ti'j. 19Masque ja'lo minti' twitz awal cyuj tx'utx', ex na'nx ttzaj cyk'o'n cywitz ke tkan uva, mi ke tkan higo, mi ke tkan carnad ẍok', mi ke tkan olivo, pero texju ja'lo che bel ncy'iwla'ne, chi Dios. 20Tuj 24 tajlal tbelajin xjaw tzaj yolin Kman juntl maj tuc'il Hageo, 21ex xi tma'n te tu'n t-xi tma'n te Zorobabel aju gobernador te Judá akeju yol lu: Ctzajel lu'lun cya'j ex tx'otx' wu'ne; 22che elex nxo'ne ke k'ukbil te cawbil, cnajel cyipumal ke cawbil te twitz tx'otx' wu'ne, che jawil ntoline ke carwaj in che ajben tuj k'oj, cyuc'ix keju ate'jx cyuj, che najel ke chej cabay ex ke xjal cyjax cyibaj cbel cybyon cyib cyxolx tu'n spad. 23Ex tuj tk'ijlalil lu, aya Zorobabel, c'oquel nk'o'ne toclena ic tza'n nxmulk'abe in ajben te sey, porque akine ma chin jaw sc'onte teya. Akine Cymane, aju Tajaw Tcyakil in chin k'mante jlu.

will be added

X\