1 Chin bel tene bil ex chin ayole ti'j twi muro te nque'ybile, tu'ntzun nbinteye alcye ctzajel tma'n Kman weye ex alcye tzak'webl tzul tk'o'n ti'j nyole tzaj ti'j. 2 Tzajtzun ttzak'we'n Kman weye cyja': Tz'iban cuba twitz tz'lom aju yol cxel nma'ne teya, tu'ntzun jurat tjaw sch'it. 3 Masque atx taj tu'n tjapun ju witzic' pero il ti'j tu'n tjapun. Masque yaj cjapunel pero ayona ti'j, porque cpol tk'ijlalil tu'n tjapun ex mlay tzic'x ti'j. 4 Tz'iban cuba cyja': Akeju binchal mya ba'n in jaw cyniman cyib, atzunju xjal tz'aklxix, tu'n tocslabl c'ank'il. 5 In cub sbu'n xjal tu'n vin in xi' tu'n, in jaw tniman tib ex minti' in cub txule', in pon tc'u'j ti'j nimcu ic tza'n cynajbil cyimni minti' in noj, minti' in noj ic tza'n camic minti' in baj tgan tu'n cycyim xjal tu'n, in che baj tchmo'n ke tnam tu'n cyten tjak' tcawbil. 6 Pero cycyakil ke nasyon otok cub cyi'j tu'n, che oquel ten xmayil ti'j, ex cxel cyma'n tuj cybitz cyja': Ay bec'bil twitza, ma tz'oca te k'inun tu'n tcyakil k'inumabl mya teya. ¿Jtoj txi tcolina tu'n tel ti'na cyk'inumabl xjal aju el ti'na cye mer ic tza'n tch'exa? 7 Aju k'ij minti' ximan tu'na, atzun che pol ke xjal kanil tch'exbena, che pol ke c'ixbisal teya ex c'elel cyi'n tcyakilju at teya. 8 C'oquel cychmon cyib ke nasyon tu'n cyk'ojin ti'ja, ex c'elel baj tcyakilju at teya cyu'n, ic tza'n el ti'na tcyakilju at cye. Cbajel yajla'na cyu'n tu'n cylaj ke xjal e cub tbyo'na, ex tu'nju tbinchaya mya ba'n tuc'il nim ttx'u'jila ti'j cytanmi ex cyi'j ke tnam ex cyi'j keju najl ke cyuj. 9 Ay bec'bil twitza tu'nju ma noj tjaya tu'n tcyakilju el telk'a'na, ma baj tcyuwsa'na tjaya tu'ntzun tcleta te tcyakilju xobajil. 10 Tu'n jlu axa ma cub k'onte cych'ixwi keju ate' tuj tjaya ex tu'nx tiba cnajela, porque o che baj naj nimcu nasyon tu'na. 11 Ja'lo, ax ke abj tocsa'n te tk'ukbil tjaya che jawil sch'in, ax icx ke vig. 12 Ay bec'bil twitza, in jaw tbincha'na ttanmiya tu'n tcyakilju el ti'na cye xjal e cub tbyo'na, ex tu'nju nim mya ba'n tbinchaya cyi'j. 13 Tu'n Kman aju Tajaw Tcyakil cnajel tu'n k'ak' tcyakil cyak'unben xjal; nokx gan otok che ak'nan ex otok che sict ke nasyon. 14 Cycyakil xjal twitz tx'otx' c'elel cynic' ti'j tajwalil Kman, ic tza'n te mar nojni tuj tu'n a'. 15 Ay bec'bil twitza tu'nju in chyo'n cywi' ke tvesina tu'na, in xi tk'o'na k'e'n smo'n twitz cye, tu'ntzun tel cych'ixwi oc cycyaj sbaje'. 16 Aya cbel nim tch'ixwiya te t-xelju tu'n tjaw nimsa'na, porque cxel k'o'n jun wik tc'aya tu'n Kman, ex tu'n jlu cyjel sbaje'ya ex cbel tch'ixwiya tu'nju otok tz'el tajwalila. 17 Jaw ttx'emina ke tze' twi witz Líbano, ax icx teya cjawil tx'emina, ctzajel nim t-xobil ti'ja tu'nju cycublen tbyo'na ke txcup twi' ju witz lu. Tzul jlu ti'ja tu'n tlaj e cub tbyo'na ke xjal ex baj t-xituna cytanmi ex tbinchaya nim mya ba'n cyi'j ke xjal najl tuj. 18 ¿Ti tajben jun tilbilal in baj tbincha'n jun xjal? ¿Ti tajben jun tilbilal ka o'cx in ajben te sbubl? Ke tilbilal mlayx bant cyyolin, ¿Tza'ntzun tten tu'n toc ke' tc'u'j xjal cyi'j, aju binchal cye? 19 Ay bec'bil twitza, nno'c tma'na te jun tilbilal binchamaj ti'j tze': Tzulx tnabla chiya, ex we'ctza, chiya te jun abj miban yolin. ¿Jacupe tzaj cyma'n jun yol? Mlay, porque minti' cyxew, masque nojni cyi'j tu'n k'an pwak ex sak pwak. 20 Atzunte Kman at tuj tja xjan: Mi'n che k'ajte twitz akeye cycyakil xjal twitz tx'otx'.
