HABACUC 1

1Atzun yol lu tzaj tma'n Kman te Habacuc aju t-sanjel. 2Nman, ¿Jte' maj chin kanile onbil teya ex minti' in chin tzaj tbi'na? ¿Jte' maj chin cubsale twitza tu'n tlaj cytx'u'jil xjal ex minti' in tzaja colpil keye? 3¿Tiku'n taja tu'n tic' nwitze ti'j yajbil ex mya ba'n in cybincha'n xjal? Nwitze in tzaj nim cytx'u'jil xjal ex nim xitbil cyxol; tuj tcyakil part in baj cyic'len cyib xjal ex in che k'ojin. 4Ya minti'tl in ajben ley cye ex minti' in xi bincha'n cyi'j xjal tuj tumel; aju xjal mya ba'n nno'c ten yajlal ti'j ju xjal ba'n, ex tu'ntzun jlu in baj cytzacun ju ley. 5Chitzun Kman cyja': Cyque'yinxe ke nasyon ate' cytxlaje; cyque'yinxe ke ex tzajx nim tchiylal cyi'je. Ch'ix woc tene binchal jun ti'xti aju mlay txi cyocsla'ne ka at jun ma tzaj k'mante cyeye. 6Che tzajel wi'ne ke aj Babilonia k'ojlel cyi'je, akeju jawni cywitz ex nok banin cyten tu'n cyxi' k'ojlel tuj tcyakil twitz tx'otx' tu'ntzun cyoc te tajwil ke tx'otx' mya cye. 7Jawni che xobtzan ex xobajilxix ke, minti' tchiylal mastl ley tuj cywitz, o'cx aju cye cyley, ex cyu'nx nno'c cyk'o'n cyoclen. 8Mas cyuw che ojkelan ke cychej cywitz ke tigre ex mas jurat in tzyet cycanb cywitz ke xo'j in che bet konic'an. Nim cybet ke cychej tjax xjal cyibaj, najchak in che tzaj ojkelan tu'n cyoc tzokpaj k'ojlel ic tza'n jun t'iw in tzaj lipan cyuw wen tzyul tcanb. 9Tcyakil in baj naj cyu'n tuj cybe ex in che jaw xob xjal cyu'n. Ke xjal in che'x cytzyu'n tu'n t-xi cyi'n pres mas nim cybaj twitz ttxa' tz'a'n ttzi mar. 10In che oc ten xmayil cyi'j ke rey ex cyi'j ke xjal ma' cyoclen. In che oc ten tze'l cyi'j ke nmak ja tjawsa'n te cycolbil cyib xjal, porque jurat naj in jaw cybuyin tx'otx' te cyxwe'tzbil tu'n cyocx tujxi ex tu'n cyoc tzokpaj cyi'j. 11Jurat naj in che ic' ic tza'n jun nintz cyk'ik'; minti' cyaj ti'j juntl dios, nok o'cx aju cyex cyipumal nno'c cyk'o'n te cydios, chi Kman. 12Nman, ¿Myapetzun cucx ttena te jumajx? Aya Ndiose ex xjana. Mlay ko cyime Nman, aya colol weye, ma txi tk'o'na cyipumal ke aj Caldey tu'n tcub cyk'o'n kcastiwoye. 13Xjanxix teya ex minti' in tzalaja ti'j ju mya ba'n, ex minti' in tzalaja ti'j oc in che yajlan xjal cyi'j cyuc'il. ¿Tza'ntzun tten minti' in k'ajta cyi'j ke xjal in cybincha'n tcyakil txcaj mya ba'n, ex tiku'ntzun in xi tk'o'na ambil cye ke binchal mya ba'n tu'n cynaj xjal cyu'n, akeju mas ba'n ke cywitz? 14¿Tiku'n in che oc tk'o'na ke xjal ic tza'n ke cyiẍ ex ic tza'n ke jil tuj mar, mi a'l jun nejenel cye? 15In cub cyi'j mastl nasyon cyu'n aj Babilonia ic tza'n ke tzyul cyiẍ in che tzyet cyiẍ cyu'n; in che tzyet cyu'n tu'n xucbil cyiẍ ex tu'n xyub, ex octzun cychmet cyu'n, nim in che jaw tzalaj ti'j. 16Tu'ntzun jlu ke xjal tzyul cyiẍ in cub cyk'o'n chojbil twitz cyxuyb ex in cub cypatun storac te nimbil te, tu'nju nok tu'n in tzaj k'o'n cychi' tbanil ex nimxix. 17¿Cucxpetzun cxe'l tu'n cycamban ke aj Babilonia ki'je ic tza'n in che tzyet ke cyiẍ tuj xyub? ¿Cucxpetzun che bel byo'n ke xjal cyu'n ex minti' tu'n ttzaj tz'e'y cyc'u'j cyi'j?

will be added

X\