GÉNESIS 9

1Cub cy'iwla'n Noé tu'n Dios cyuc'ix ke tcy'ajal, ex xi tma'n cye cyja': Che c'wa'line, chmet-x cybaje, ex cynojsame twitz tx'otx'. 2Che xobel cywitze cycyakil txcup twitz tx'otx', cycyakil keju in che lipan twitz cya'j, keju in xi cyjaku'n cyc'u'j twitz tx'otx' ex keju ate' tuj mar; cycyakil ke jlu che tel tjak' cycawbile. 3Tcyakil txcup itz' ex in yucch c'ajbel te cychi'ye. Ic tza'n o txi nk'o'ne awal te cynic'beble, icxtzun ja'lo tcyakil in xi nk'o'ne cyeye te cynic'beble. 4Pero mi'n txi cychyo'ne chibj atx chic' tuj, tu'nju atzun ta' chwinklal tuj chic'. 5C'oquel tuj xjel wu'ne aju cbel byonte jun xjal, ka jun txcup ma cub byonte ex ka jun xjal ma cub byonte juntl; il ti'j c'oquel tuj xjel wu'ne. 6Ka at jun ma cub byonte jun xjal, ax juntl xjal cbel byonte te, porque cub tbincha'n Dios xjal ic tza'nx te tilbilal. 7Atzun cyeye, che c'wa'line, chmet-x cybaje, ex cynojsame twitz tx'otx', chi Dios. 8Xi tma'ntl Dios te Noé ex cye tcy'ajal cyja': 9Cybintze, cyjel bant ti'j jun nyole cyuc'ile ex cyuc'il ke cyiyjile che ul itz'j te tibajxi, 10cyuc'ix cycyakil ke txcup ate' cyuc'ile, keju e je'tz tuj matij barc; ke chyu'j ex txkantl txcup in che lipan twitz cya'j, ke alumaj, ke txcup ate' tjak' c'ul, ex cycyakil txcup tuj tcyakil twitz tx'otx'. 11Cyjel bant ti'j nyole lu cyuc'ile: Mlay che najtl tu'n a' cycyakil keju at cychwinklal, ex mlay tzajtl a' tu'n tnaj tcyakil twitz tx'otx'. 12Aju techal ti'j nyole cbantel ti'j cyuc'ile te jumajx, ex cyuc'il cycyakil txcup, 13atzun t-xmacal lobaj ma cub nk'o'ne tuj muj. C'ajbel te techal ti'j nyole cyajni bant ti'j wu'ne tuc'il twitz tx'otx'. 14Oc ttzaj muj twitz cya'j wu'ne, atzun ck'ancha'lil t-xmacal lobaj tuj muj. 15Atzun ctzajel nna'ne nyole otok bant ti'j cyuc'ile ex cyuc'il cycyakil txcup, ex mlay tzajtl a' tu'n cynaj cycyakil keju at cychwinklal. 16Oc tcub ten t-xmacal lobaj tuj muj, oc wila'ye ex ctzajel nna'ne nyole cyajni bant ti'j cyuc'ile te jumajx, ex cyuc'il cycyakil keju at cychwinklal, chi Dios cye. 17Atzun techal nyole aju ma cyaj bant ti'j wu'ne cyuc'il cycyakil keju at cychwinklal twitz tx'otx', chi Dios te Noé. 18Ke tcy'ajal Noé e je'tz tuj matij barc atzun ke jlu: Sem, Cam ex Jafet. Ate Cam tman Canaán. 19Atzun ke ox lu tcy'ajal Noé. Cyu'ntzun cyiyjil o noj twitz tx'otx' juntl maj. 20Oc ten Noé ak'nal ti'j tx'otx' ex cu'x tawa'n tkan uva. 21At jun k'ij xi tc'an vin, ex chyo'n twi'. Cyajtzun coẍe' tuj tmij tja, ex minti'tok t-xbalun tocsa'n. 22Atzunte Cam tman Canaán o til minti'tok t-xbalun tman tocsa'n. Xitzun tma'n cye ke cabe terman cyetzsa'n ti'jxi. 23Atzunte Sem ex Jafet tzaj cyi'n jun xbalun ex jax cyk'o'n cywi cysemil. E ocxtzun bet tu'n ttzal cyi'j, in xi cyque'yintok juntl pac', ex cub cyk'o'n xbalun tibaj cyman. Cyja'tzun minti' o cyil cyman tej minti'tok t-xbalun tocsa'n. 24Tej tel vin tuj twi Noé, o tbi aju binchanjtz ti'j tu'n tcy'ajal aju ch'i'p, 25ex tma cyja': Ctzajel mya ba'n tibaj Canaán. C'oquel te cymajen ke terman ex ch'inxix c'oquel toclen. 26Ax icx tmatl: Nimanxwit tbi Kman aju Tdios Sem ex tz'ocwit Canaán te tmajen. 27Tz'elxwit nimax ttx'otx' Jafet tu'n Dios, najanxwit junx tuc'il Sem, ex tz'ocwit Canaán te tmajen, chi Noé. 28Ank'intl Noé 350 abk'i tbajlenxi k'ekab. 29Ten Noé twitz tx'otx' tu'n tcyakil, 950 abk'i, ex cyim.

will be added

X\