GÉNESIS 7

1Xi tma'n Kman Dios te Noé cyja': Tocxa tuj matij barc cyuc'ix keju ate' tuj tjaya, tu'nju ma wile o'cx aya tz'aklxix cyxol xjal ate' tuj tk'ijlalil ja'lo. 2Cyxol cycyakil wik txcup sak ke, che oquex ti'na wuk tman ex wuk ttxu'; atzun keju tz'il ke, c'oquex ti'na nok o'cx jun tman ex jun ttxu'. 3Ax icx che oquex ti'na wuk tman ex wuk ttxu' ti'j teyle junjun wik chyu'j ex txkantl txcup in che lipan twitz cya'j, tu'ntzun tcyaj clet cyiyjil twitz tx'otx'. 4Porque tbajlenxi wuk k'ij, tzul jbal wu'ne k'ijl ex konic'an tuj 40 k'ij. Che najel wu'ne cycyakil keju itz', akeju e cub nbincha'ne twitz tx'otx'. 5Tbinchatzun Noé tcyakilju o tma Kman te. 6Otok japun Noé twi' kak syent abk'i tej ttzaj nimxix a' twitz tx'otx'. 7Ocxtzun Noé tuj matij barc cyuc'ix ke tcy'ajal, tuc'ix t-xu'jil ex ke tlib, tu'ntzun mi'n cynaj tu'n a'. 8Ke txcup sak ke ex keju tz'il ke, ke chyu'j ex txkantl txcup in che lipan twitz cya'j ex keju in xi cyjaku'n cyc'u'j twitz tx'otx', 9e ocx tuc'il Noé tuj matij barc, jun tman ex jun ttxu', ic tza'nx otok tma Dios. 10Tujtzun twukin k'ij tzajtzun nimxix a' twitz tx'otx'. 11Tuj abk'i tej tjapun Noé twi' kak syent abk'i, tuj wuklaj tajlal tcabin xjaw, tujtzun k'ij lu e jaket cycyakil ke twi a' t-xe nintz mar, jaket ttzi cya'j, ex tzaj k'ekab. 12K'ijl ex konic'an tuj 40 k'ij cub k'ekab twitz tx'otx'. 13Tujx k'ij lu ocx Noé tuj matij barc, tuc'ix Sem, Cam ex Jafet, akeju tcy'ajal, tuc'ix t-xu'jil ex ke ox tlib. 14Ax icx tcyakil wik txcup at tjak' c'ul, teyle te junjun tiyjil, tcyakil wik alumaj, teyle te junjun tiyjil, tcyakil wik txcup in xi cyjaku'n cyc'u'j twitz tx'otx', teyle te junjun tiyjil ex tcyakil wik chyu'j ex txkantl txcup in che lipan twitz cya'j, teyle te junjun tiyjil, 15e ocx tuc'il Noé tuj matij barc, mojmoj cyten. 16Tman ex ttxu' te tcyakil wik keju e ocx, ic tza'nx o tma Dios te Noé. Cyocxlenxi baj ke jlu, octzun tlamo'n Kman tlamel matij barc. 17Tzajtzun nimxix a' twitz tx'otx' tuj 40 k'ij. O ch'iy a' ex jaw ikan matij barc tu'n. 18Nim jaw ch'iy a' twitz tx'otx' ex jaw lak'e' matij barc tibaj. 19Nimxix jaw ch'iy a' ex japun baj cyibaj cycyakil witz mas ma' cywa'l ate' twitz tx'otx'. 20Jaw ch'iy a' wuk var tuc'il mey cyibaj ke witz mas ma' cywa'l. 21E najtzun cycyakil keju najl twitz tx'otx': Ke chyu'j ex txkantl txcup in che lipan twitz cya'j, ke alumaj, ke txcup te tjak' c'ul, ke txcup in xi cyjaku'n cyc'u'j twitz tx'otx' ex cycyakil xjal. 22E cyim cycyakil keju ate'tok twitz tx'otx', akeju itz'tok ke ex in jatz cyxew. 23O'cx te Noé cyaj clet cyuc'ix keju ate'tok tuc'il tuj matij barc; atzun ke mastl bi'x e naj: Ke xjal, ke alumaj, ke chyu'j ex txkantl txcup in che lipan twitz cya'j ex ke txcup in xi cyjaku'n cyc'u'j twitz tx'otx'. 24Atzunte a' cyaj ten 150 k'ij twitz tx'otx'.

will be added

X\