1 Tejtzun cychmet xjal twitz tx'otx', ex tej cyul itz'j cyme'jel, 2 o cyil ke tcy'ajal Dios ke xu'j lu, tbanilxix ke. Etztzun cyjyo'n cyxu'jil cyxol ke txin lu ex e najan cyuc'il keju at cygan cyi'j. 3 Tmatzun Kman cyja': Mlay tzic'xtl cyil xjal wu'ne tu'nju tkukil tx'otx' ke; o'cx 120 abk'i che tel twitz tx'otx'. 4 Tuj tk'ijlalil lu ate'tok xjal ma' cywa'l twitz tx'otx', ax icx te tibajxi, tej cymoje' ke tcy'ajal Dios cyuc'il cyme'jel xjal ex tzaj cyc'wa'l cyi'j. Atzun ke jlu e oc nmak xjal ex nimxix nabl cye tuj tk'ijlalil ojtxi. 5 Tejtzun tlonte Kman Dios mya ba'ntok cybinchben xjal twitz tx'otx' ex cucx in che ximantok o'cx ti'j mya ba'n, 6 tzaj t-ximbetz ti'j cybantlen xjal tu'n, ex tzaj ta'w tuj tanmi, 7 ex tma cyja': Ke xjal o che bant wu'ne twitz tx'otx' bi'x che najel wu'ne, cyuc'ix ke alumaj, cyuc'ix ke txcup in xi cyjaku'n cyc'u'j twitz tx'otx' ex ke chyu'j ex txkantl txcup in che lipan twitz cya'j, tu'nju ma tzul tilil wu'ne cycublen nbincha'ne. 8 Atzunte Noé o tzalaj Kman ti'j. 9 Atzun tx'olbabl cyi'j tiyjil Noé. O'cx te Noé jun xinak tz'aklxix ex ba'nxix cyxol cycyakil xjal e ank'in tuj tk'ijlalil tej tten. O bet tuc'il Dios. 10 Ul itz'j ox tcy'ajal Noé, ake jlu: Sem, Cam ex Jafet. 11 Otok chmet il twitz tx'otx' tuj twitz Dios, puro tx'u'j ke xjal, ex nojni tuj cyanmi tu'n k'oj. 12 O til Dios mya ba'ntok twitz tx'otx' tu'nju cycyakil xjal in cybincha'ntok mya ba'n twitz tx'otx'. 13 Xitzun tma'n Dios te Noé cyja': Ma cub nximane tu'n cynaj cycyakil xjal tu'nju puro tx'u'j ke ex nojni tuj cyanmi tu'n k'oj. Tu'ntzun jlu che najel cycyakil xjal wu'ne, tuc'ix twitz tx'otx'. 14 Binchama jun matij barc ti'j tze' tzis, binchama ela' cwart tuj, ex lo'tzin baja tu'n k'ol tujxi ex ti'jxi. 15 Aju echbil te barc cbantel tu'na, atzun jlu: 150 var tnukbil, 25 var twitz, ex olaj var twa'l. 16 Binchama te ox col, tuc'ix ventan ti'jele te mey var twa'l, tcu'tz tjak' twi', ex aju tlamel binchama tuj ttxlaj. 17 Ctzajel nk'o'ne k'ekab twitz tx'otx', tu'ntzun cynaj cycyakil keju itz' ex at xewbaj cyuj. Tcyakilju at twitz tx'otx' cymel. 18 Atzun tuc'ila cbantel ti'j jun kyol, ex c'oquexa tuj matij barc cyuc'ix ke tcy'ajala, tuc'ix t-xu'jila ex ke tliba. 19 Ax icx che oquex tk'o'na ke txcup tuc'ila tuj matij barc, jun tman ex jun ttxu' ti'j teyle te junjun wik jnic'ju at twitz tx'otx', tu'ntzun cycyaj clet junx tuc'ila. 20 Che oquex tuc'ila tuj matij barc cabe txcup ti'j teyle junjun wik: ke chyu'j cyuc'ix txkantl txcup in che lipan twitz cya'j, ke alumaj, cyuc'ix ke txcup in xi cyjaku'n cyc'u'j twitz tx'otx', tu'ntzun cycyaj clet. 21 Chmoma tcyakil wik wabj ex c'u'nxa, tu'ntzun tajben te cywaye tuc'ix cye txcup, chi Dios te Noé. 22 Tbinchatzun Noé tcyakil ic tza'nx o tzaj tma'n Dios te.
