1 Tzyettzun be tu'n Israel tuc'ix tcyakilju attok te. Tej tul tuj Beerseba, xi tk'o'n chojbil te Tdios Isaac aju tman. 2 Tuj konic'an lu o yolin Dios tuc'il Israel mer ic tza'n tuj witzic' ex chi cyja': —Jacob, Jacob, chi Dios. Xitzun ttzak'we'n Jacob: —Lu kine lu, chi Jacob. 3 Tzajtzun tma'n Dios te cyja': —Akine Dios aju Tdios tmana. Mi'n xoba tu'n t-xi'ya tuj Ejipt, porque tuj tnam lu che chmetel tiyjila wu'ne, ex che oquel te jun nintz nasyon. 4 Chin xe'le tuc'ila tuj Ejipt, ex ax kine chin ajetz k'intle cye tiyjila. Ax icx cbel ten José ttxlaja oc tcyima, chi Dios. 5 Ic'tzun Jacob tuj Beerseba. Cyuj ke carwaj otok che tzaj t-sama'n Faraón te k'ilte te, jax cyk'o'n ke tcy'ajal Israel aju cyman Jacob tbi, cyuc'ix ke cyc'wa'l ex ke cyxu'jil. 6 Xi'tzun Jacob tuj Ejipt cyuc'ix keju ate'tok tuj tja, ax icx xi ti'n ke twacẍ, ke t-ẍne'l ex tcyakilju otok cnet tu'n tuj tx'otx' Canaán. 7 E je'x ti'n ke tcy'ajal tuj Ejipt, ke tme'jel, ke tal tchman ex cycyakil ke tiyjil. 8 Atzun cybi aj Israel jlu, akeju e pon tuj Ejipt; ate Jacob ex ke tiyjil: Rubén aju tnejel tcy'ajal Jacob. 9 Ke tcy'ajal Rubén, atzun ke jlu: Hanoc, Falú, Hezrón ex Carmi. 10 Ke tcy'ajal Simeón, atzun ke jlu: Jemuel, Jamín, Ohad, Jaquín, Zohar, ex Saúl aju tal ju xu'j aj Canaán. 11 Ke tcy'ajal Leví, atzun ke jlu: Gersón, Coat ex Merari. 12 Ke tcy'ajal Judá, atzun ke jlu: Er, Onán, Sela, Fares ex Zara; atzunte Er ex Onán otok che cyim tuj tx'otx' Canaán. Ke tcy'ajal Fares, atzun ke jlu: Hezrón ex Hamul. 13 Ke tcy'ajal Isacar, atzun ke jlu: Tola, Fúa, Job ex Simrón. 14 Ke tcy'ajal Zabulón, atzun ke jlu: Sered, Elón ex Jahleel. 15 Atzun ke tcy'ajal Jacob jlu, akeju e tzaj ti'j Lea tej attok tuj Padan-aram, ex attok jun tme'jel Jacob Dina tbi. Japun 33 xjal tu'n tcyakil ke xinak ex ke xu'j. 16 Ke tcy'ajal Gad, atzun ke jlu: Zifión, Hagui, Esbón, Suni, Eri, Arodi ex Areli. 17 Ke tcy'ajal Aser, atzun ke jlu: Imna, Isúa, Isúi ex Bería; ex attok jun cyanb, Sera tbi. Ke tcy'ajal Bería, atzun ke jlu: Heber ex Malquiel. 18 Atzun ke tcy'ajal Jacob jlu, akeju e tzaj ti'j Zilpa, aju tmajentok Labán ex tzaj tk'o'n te Lea aju tme'jel. Japun kaklaj xjal tu'n tcyakil. 19 Ke tcy'ajal Jacob e tzaj ti'j Raquel aju t-xu'jil, atzun ke jlu: José ex Benjamín. 20 Ke tcy'ajal José e tzaj ti'j Asenat aju tme'jel Potifera, aju pal tuj tnam On, atzun ke jlu: Manasés ex Efraín; ake jlu e ul itz'j tuj Ejipt. 21 Ke tcy'ajal Benjamín, atzun ke jlu: Bela, Bequer, Asbel, Gera, Naamán, Ehi, Ros, Mupim, Hupim ex Ard. 22 Atzun ke tcy'ajal Jacob jlu, akeju e tzaj ti'j Raquel, cyuc'ix ke tal tchman. Japun cyajlaj xjal tu'n tcyakil. 23 Aju tcy'ajal Dan, atzun jlu: Husim. 24 Ke tcy'ajal Neftalí, atzun ke jlu: Jahzeel, Guni, Jezer ex Silem. 25 Atzun ke tcy'ajal Jacob jlu, akeju e tzaj ti'j Bilha, aju tmajentok Labán ex tzaj tk'o'n te Raquel aju tme'jel. Japun wuk xjal tu'n tcyakil. 26 Tu'n tcyakil japun 66 cyajlal xjal e je'x tuc'il Jacob tuj Ejipt, akeju ax tiyjil, ex mya cyuc'ix ke cyxu'jil tcy'ajal e oc tajlal. 27 Cabe cybet tcy'ajal José e ul itz'j tuj Ejipt. Japuntzun 70 cyajlal tiyjil Jacob e je'x tuj Ejipt. 28 Xi sama'n Judá tu'n Jacob tu'n tpon tuc'il José, tu'n ttzaj José canul ti'j tuj tx'otx' Gosén. Tejtzun cypon tuj Gosén, 29 xi tma'n José cye tmajen tu'n tbant tten tcarwaj, ex xi' canul ti'j Israel aju tman. Tejtzun tpon twitz tman, tzaj tchle'n, oc ten ok'el twi' t-semil, ex nim tuj o tz'ok'. 30 Xitzun tma'n Israel te José cyja': Ja'lo ba'n tu'n ncyime tu'nju ma wile twitza, ex ba'n wu'ne luya itz'x, chi Israel. 31 Xitzun tma'n José cye terman ex cye txkantl xjal ate' tuj tja tman: Ma chinxe k'olte tkanil te Faraón ex cxel nma'ne te cyja': Ma che ul ke wermaniye wuc'ile, cyuc'ix ke txkantl xjal ate' tuj tja nmane, akeju najltok tuj Canaán, 32 ex ma che ul cyi'n cyẍne'l, tuc'ix cywacẍ ex tcyakilju at cye, porque pastoril ẍne'l ke, ex ch'isal alumaj ke, nchiye, cxel nma'ne te. 33 Oc cytxconjtze tu'n Faraón ex oc ttzaj tkanin cyeye alcye cyak'une, 34 cxeltzun cytzak'we'ne: Pastoril ẍne'l ko'ye ktzajlenxe tej matok c'wa'lx ko'ye ic tza'nx ke kxe'chele, che chicuye te, tu'ntzun cycyaj tene najal tuj Gosén, porque mya ba'n tuj cywitz aj Ejipt tu'n cyten junx cyuc'il ke pastoril ẍne'l, chi José cye.
