GÉNESIS 42

1Tejtzun tbinte Jacob attok triw tuj Ejipt, xi tma'n cye tcy'ajal: ¿Ti in bant cyu'ne tzalu, nok nno'c cyque'yine tuj cywitze? 2Ma nbiye at triw tuj Ejipt. Cycu'xe tuj, ex cylak'ontze triw te kwa, tu'n kank'in ex tu'n mi'n kcyim, chi Jacob. 3E cu'xtzun laj ttzic José lak'ol triw tuj Ejipt, 4atzunte Benjamín aju titz'in José, minti' xi tzokpi'n tu'n Jacob tu'n t-xi' cyuc'il ttzic, tu'nju o ximan Jacob ti'j, mya yajcu tzaj jun mya ba'n ti'j tuj be. 5Xi cyuc'in cyib ke tcy'ajal Israel cyuc'il txkantl xjal, akeju xi'ynitok lak'ol triw tuj Ejipt, tu'nju attok we'yaj tuj tcyakil tx'otx' Canaán. 6Atok José toc te gobernador tuj tx'otx' Ejipt, ex ax in c'ayintok triw cye xjal in che tzaj cyuj cycyakil tnam. Tej cypon ke ttzic, e cub ẍmeje' twitz, ex pon tacl tibaj cywitz twitz tx'otx'. 7Tej tque'yinte José ke ttzic el tnic' cyi'j, pero o tbincha ic tza'n minti' ojtzki'ntok cywitz tu'n. Cyuwxix o yolin cye ex xi tkanin cye cyja': —¿Jatum ẍe tzaje? Chi José. Xitzun cytzak'we'n: —Xko tzaje tuj tx'otx' Canaán lak'olte triw, che chi. 8El tnic' José cyi'j ke ttzic; atzun cye, minti' el cynic' ti'j. 9Ultzun ti'j tc'u'j José ke twitzic' otok che oc cyi'j, ex xi tma'n cye cyja': —At cyeye nnic' tuj cyc'u'je ma che ule tzalu. Nok ma che tzaje que'yilte jatum ba'n tu'n cyoctze k'ojlel ti'j tnam lu, chi José. 10Xitzun cyma'n te cyja': —Mi'n, tat. Akoye ajbel teya. Lak'ol triw ma ko ule tzalu. 11Kcyakile junx kmane, ex ba'n xjal ko'ye. Bajx ko que'yine jatum ba'n tu'n kocxe k'ojlel ti'j jun tnam, che chi. 12Xi tma'n José cye: —Nok tten cyu'ne. Ma che tzaje que'yilte jatum ba'n tu'n cyoctze k'ojlel ti'j tnam lu, chi José. 13Xitzun cyma'n te cyja': —Ajbel ko'ye teya, cablaj kbete kerman kibe ex junx kmane. Atzun najl ko'ye tuj tx'otx' Canaán. Aju kitz'ine mas ch'in o cyaj ten tuc'il kmane; atzun juntl nok o cub naj, che chi ke terman José. 14Xitzun tma'ntl José cye cyja': —Ic tza'n ma txi nma'ne, nok que'yil ti'j tnam ma che ule. 15Atzun c'elel nnic'e cyi'je: Cxel nma'ne jun yol ax toc cyeye twitz Faraón, mlay che exe tzalu ka na'nxtok tul cyi'ne cyitz'ine. 16E taj jun cyeye k'ilte cyitz'ine, atzun ke txkantl e cycyaj ten tuj pres. Cyja'tzun c'elel nic' cyi'je ka ax toc aju ma cymaye; katzun mi'n, at nnic' tuj cyc'u'je, chi José. 17E ocx tk'o'n José ox k'ij tuj pres. 18Tuj toxin k'ij xi tma'n cye cyja': In chin xobe twitz Dios, cyja'tzun cybinchame jlu ex che ank'ile: 19Ka ax toc ba'n xjal keye, e tcyaj ten jun cyeye tuj pres; atzun txkantl e cycyaj, ex e taj cyi'n triw te cywa keju ate' tuj cyjaye tu'nju at we'yaj ma chixin. 20Cyi'ntz naje aju cyitz'ine tu'n tel nnic'e ka ax toc cyyole, ex mlaytzun che cyime, chi José. Atzun cye, cybincha icju. 21In cyma'ntok cyxolx cyja': —Ax toc mya ba'n o kbincha ti'j kitz'in. Minti' xi kbi'n tyol tej tcubsan kwitz masque o kil yajbil te ex tbis. Tu'ntzun jlu ma tzaj mya ba'n lu ki'j ja'lo, che chi. 22Xitzun tma'n Rubén cyja': —¿Myapetzun o txi nma'ne cyeye cyja': Mi'n cybinchaye mya ba'n ti'j k'a, nchiye? Atzun cyeye minti' xi cynimane nyole. Lu ja'lo in xi kchjo'n tu'n tlaj tcamic, chi Rubén. 23Atzun cye minti'tok ba'n cyu'n ka nne'ltok tnic' José ti'j cyyol, tu'nju ajben jun xjal pjulte yol cyxol. 24Eltzun tpa'n tib José cyi'j ex oc ten ok'el. Te tibajxi ul meltz'aj jatum ate'tok, oc ten yolil cyuc'il, etz ti'n Simeón cyxol, ex cywitzx ke, baj tc'alo'n. 25Xitzun tma'n José cye majen tu'n cycu'x nojsa'n cysac tu'n triw ex tu'n taj k'o'n tpwak teyle te junjun ttzi t-sac, tuc'ix cywa tu'n tajben tuj cybe tu'n t-xi k'o'n cye. Ictzun bant cyi'j. 26Octzun cyk'o'n cyikatz cybur ex e ajtz meltz'aj. 27Tej cypon tuj lugar jatum tu'n tex ak'bil cyu'n, el tpju'n jun ttzi t-sac tu'n tjatz ti'n ch'in triw te twa tbur, ex o til tpwak tcu'xtok ttzi t-sac. 28Xitzun tma'n cye terman: Ma tz'ajtz k'o'n npwake, lu tcu'x ttzi nsaque, chi. Cycyakiltzun tzaj nim cyxobil, in che lu'luntok wen tu'n cyxobil ex in cyma'ntok cyxolx: ¿Titzun ma tbincha Dios ki'j ja'lo? Che chi. 29Tejtzun cypon tuc'il Jacob aju cyman tuj tx'otx' Canaán, xi cytx'olba'n te tcyakilju otok baj cyi'j, che chi cyja': 30—Aju xinak in cawin tuj tx'otx' ma chixin o yolin cyuwxix kuc'ile ex o ko oc k'o'ne tu'n ka nok que'yilte jatum ba'n tu'n kocxe k'ojlel ti'j ttx'otx'. 31Atzun keye xi kma'ne te cyja': Ba'n xjal ko'ye. Bajx ko que'yine jatum ba'n tu'n kocxe k'ojlel ti'j jun tx'otx'. 32Cablaj kbete kerman kibe ex junx kmane. Jun o cub naj, ex aju mas ch'in o cyaj ten tuc'il kmane max tuj tx'otx' Canaán, ko chiye. 33Atzunte xinak, aju cawil tuj tx'otx' ma chixin, tzaj tma'n keye cyja': Atzun c'elel nnic'e cyi'je ka ax toc cyyole: Cyk'oncje jun cyermaniye wuc'ile, cyi'nxe cywa keju ate' tuj cyjaye tu'nju at we'yaj ma chixin, ex cyxi'ye. 34Cyi'ntze cyitz'ine tu'ntzun tel nnic'e cyi'je ka ba'n xjal ex mya que'yil ti'j tx'otx' keye. Maxitzun c'elex ntzokpi'ne juntl cyermaniye. Ax icx cyeye, jacutzun txi k'ot ambil cyeye tu'n cybete nok jatumchak tuj tx'otx' lu, chi xinak keye, che chi. 35Tejtzun tetz cyko'n triw tuj cysac, lu tch'u'ẍil tpwak teyle te junjun tcu'xtok ttzi t-sac. Tej cyque'yinte ke tch'u'ẍil cypwak, tzaj t-xobil cyi'j, ax icx tzaj t-xobil cyman. 36Xitzun tma'n Jacob cye cyja': —Che elel baj cyi'ne ke nc'wa'le; José mi a'l kxol, ax icx Simeón. Cyajtle tu'n t-xi cyi'ne Benjamín. Tcyakil jlu mya ba'n te weye, chi Jacob. 37Xi tma'n Rubén te tman cyja': —Bix cub tbyo'na cabe ncy'ajale ka mi'n ma tz'ajtz wi'ne Benjamín tuc'ila. K'ontza tuj ncwente ex c'ajetz wi'ntle tuc'ila juntl maj, chi Rubén. 38Xi tma'n Jacob te: —Mlay cu'x ncy'ajale cyuc'ile. O cyim José ex o'cx te Benjamín atx. Ka at jun ti'xti ma tc'ulba tuj cybeye, cyu'ne chin cymele tu'n bis, porque ma chin tijine.

will be added

X\