1 Cyajtzun ten Jacob najal tuj tx'otx' Canaán jatum otok najan tman. 2 Atzun tx'olbabl cyi'j ke tcy'ajal Jacob jlu. Tej otok japun José twi' wuklaj abk'i in pastorintok ẍne'l junx cyuc'il ke ttzic, akeju tal Bilha ex ke tal Zilpa ke t-xu'jil tman. Coc'x xi tma'n José te tman aju mya ba'n in cybincha'ntok ke ttzic. 3 Mas o c'ujlanjtz José tu'n Israel cywitz ke txkantl tcy'ajal, tu'nju ul itz'j cu'xun lu tuj ttijil, ex o bant jun t-ẍjo'w tbanilxix tu'n. 4 Tejtzun tel cynic' ke ttzic José ti'j, mas c'ujla'ntok José tu'n cyman, el cyic'un ex minti' e yolin te tuj cheba. 5 At jun maj oc jun twitzic' José ex xi tma'n cye ttzic. Atzun cye, mas el ic'un José cyu'n. 6 Xi tma'n cye cyja': —Cybintze aju nwitzic'e o tz'oc: 7 Lu ko in ko c'alo'ntok junjun che'l triw tuj cojbil. Aju weye che'l ntriw jaw we' tu'nx tib ex ax cyaj we'. Atzun cyeye che'l cytriw baj cytxolban cyib ti'jele weye, ex e cub moc'e' twitz weye, chi José. 8 Xitzun cytzak'we'n ke ttzic cyja': —¿Maj c'oquela te kreye ex ccawila kibaje? Che chi. Mas el ic'un José cyu'n tu'n cylaj twitzic' ex ke tyol. 9 Te tibajxi oc juntl twitzic' José, ax icx xi ttx'olba'n cye ttzic ex xi tma'n cye cyja': —Cybintze juntl nwitzic'e o tz'oc: Lu k'ij tuc'ix xjaw ex junlaj che'w in che cub moc'e'tok nwitze, chi José. 10 Ax icx xi ttx'olba'n José te tman ic tza'nx otok baj ttx'olba'n cye terman. Bajtzun cawin tu'n tman ex xi tma'n tman te cyja': —¿Ti t-xilen twitzic'a lu? ¿Chin belpetzun moc'e'ye twitza ex tu'n tpon tacl tibaj nwitze twitz tx'otx' junx tuc'il ttxu'ya ex cyuc'ix ke termaniya? Chi tman. 11 Ke ttzic José tzaj tlo'ch cyc'u'j ti'j, atzunte tman oc ten ximal ti'j jlu. 12 At jun k'ij e je'x ttzic José pastoril ke t-ẍne'l cyman max tuj Siquem. 13 Xitzun tma'n Israel te José cyja': —In che cwentin ke ttzica ke ẍne'l max tuj Siquem. Tzaja, ex cxe'l nsama'ne cyuc'il, chi Israel. —Lu kine lu, chi José. 14 Xi tma'n Israel te cyja': —Txi'ya que'yilte tza'n ate' ke ttzica ex ke ẍne'l, ex k'intza tkanil wuc'ile, chi Israel. Tej t-xi t-sama'n, atzun najltok tuj chk'ajlaj Hebrón. Pontzun José tuj Siquem. 15 Acux in betje'tok tuj cojbil, oc noj jun xjal ti'j ex xi tkanin xjal te cyja': —¿Ti in tjyo'na tzalu? Chi xjal. 16 Xi ttzak'we'n José cyja': —In chin jyone cyi'j ke ntzique. Binchama xtalbil k'mantza jatum in che pastorin ẍne'l, chi José. 17 Xi tma'n xjal te cyja': —O che ic' tzalu. O nbiye cyyol cyja': Ko'ke tuj Dotán, che chi, chi xjal. Xi'tzun José que'yilte cye ttzic, ex e cnet tu'n max tuj Dotán. 18 Ilwaj José cyu'n najchak, cyja' ttzaj. Tej na'nxtok tcanun José cyuc'il, bant ti'j cyu'n tu'n tcub cybyo'n. 19 Cymatzun cyxolx cyja': —Cyque'yinxe, lu witzcy'al tzul. 20 Cytzaje, e tcub kbyon, e tcu'x kxo'n tuj jul, ex jacu txi kma'n te kman cyja': Jun txcup mya ba'n ma cub byonte te, ko chi cxel kma'n. Kila'tzun ka che japunel ke twitzic', che chi. 21 Tejtzun tbinte Rubén jlu, oc ten colol ti'j José ex tma cye titz'in cyja': —Mi'n cub kbyo'n. 22 Mi'n tz'el cyi'ne tchc'el. Cyk'on cu'xe tuj jul lu, aju at tuj tzkij tx'otx', ex mi'n tz'oc cyk'o'n cyk'abe ti'j tu'n tcub cybyo'ne, chi Rubén. Tma Rubén icju tu'nju tajbiltok tu'n tclet José ex tu'n taj t-sama'n tuc'il tman. 23 Tejtzun tpon canun José cyuc'il ttzic, tzyet cyu'n ex el cyi'n t-ẍjo'w tbanil, aju toctok ti'j. 24 Xitzun cyi'n ex cu'x cyk'o'n tuj jul. Aju jul lu minti'tok tuj ex tzkijtok tuj. 25 E cubtzun ke' wa'l, ex xi cyque'yin cyja'tok cytzaj txkan xjal aj Ismael, tzajni ke max tuj Galaad, k'i'ntok perjum, bálsamo ex ttxc'omil tze' mirra, cyu'n cychej camey; cyja'tok cyxi' tu'n cypon tuj Ejipt. 26 Tmatzun Judá cye terman: —¿Ti oc kcamba' ka ma cub kbyo'n kitz'in ex tu'n tcub kewan ka ku'n cub kbyo'n? 27 Mas ba'n tu'n t-xi kc'ayin cye aj Ismael, twitz tu'n tcub kbyo'n, tu'nju ax kitz'in ex ax kchibjal, chi Judá. Ba'n e'la jlu tuj cywitz ke terman, 28 ex tej cyul canun ke comersyant aj Madián, akeju aj Ismael juntl cybi, jatz k'i'n José cyu'n terman tuj jul, xi cyc'ayin cye, ex o cyc'am winkin sak pwak twi'. Xitzun k'i'n José tuj Ejipt. 29 Tej tul meltz'aj Rubén, cu'x tque'yin tuj jul, ex mi a'ltok te José tuj. Eltzun t-sbit'un t-xbalun tu'n tbis. 30 Aj meltz'aj jatum ate'tok ke titz'in ex xi tma'n cye cyja': Mi a'l cu'xun tuj jul. Atzun weye ¿jatum chin xe'le ja'lo? Chi Rubén. 31 Tzajtzun cyi'n aju t-ẍjo'w José, cub cybyo'n jun tal chip, ex cu'x cymu'n ẍjo'w tuj tchc'el. 32 Xi cyi'n ẍjo'w tuc'il cyman ex xi cyma'n te cyja': —O ko oc noje ti'j jlu. Que'yin oca ka a t-ẍjo'w tcy'ajala ex ka mya a, che chi. 33 Eltzun tnic' Jacob ti'j ex tma cyja': —Ax toc te ncy'ajale José ẍjo'w lu. Atlo jun txcup o baj chyo'nte te ex o baj tpaẍu'n, chi Jacob. 34 Eltzun t-sbit'un Jacob t-xbalun, oc tk'o'n t-xbalun ch'i'x twitz te jun techal ti'j tbis, ex o bisun nim k'ij ti'j tcy'ajal. 35 Cycyakil ke tcy'ajal ex ke tme'jel e oc ten k'ukbalte tc'u'j, atzun te minti' o cub tuj twitz tu'n tk'ukbanjtz tc'u'j; nok o'cx oc ten ok'el ti'j tcy'ajal ex in tma'ntok cyja': Cucx chin bisule ti'j ncy'ajale, ex max cxel ncoline ocxi npone tuc'il cyxol cyimni, chi Jacob. 36 Xitzun k'i'n José tuj Ejipt cyu'n aj Madián, ex xi cyc'ayin ma chixin te Potifar. Ate xjal lu ajbeltok te Faraón ex nejeneltok cye soldad cwentil te.
