GÉNESIS 34

1At jun tal Lea Dina tbi, tme'jel Jacob. Xi' visitaril cye k'apoj akeju ax najltok ke. 2O ilwaj tu'n Siquem tcy'ajal Hamor, aju aj Hevey ex nejenel cye xjal tuj tx'otx' lu. Cub tan Siquem tuc'il k'apoj ex lajwers oc ten ti'j. 3T-xo'tzun tgan Siquem ti'j ex oc ten xmoxil ti'j. 4Xi tma'n Siquem te Hamor aju tman: K'intza k'apoj lu te nxu'jile, chi Siquem. 5O tbi Jacob otok cub tan Siquem tuc'il Dina aju tme'jel, ex lajwers otok tz'oc ten ti'j. Tu'nju ate'tok ke tcy'ajal Jacob tuj cojbil cyuc'il ke talun, minti' o k'ajt, maxitzun xi tma'n cye tejxi cyul meltz'aj. 6Xi' Hamor aju tman Siquem, tuc'il Jacob tu'n tyolin tuc'il. 7Tej cyul meltz'aj ke tcy'ajal Jacob tuj cojbil o cybi aju otok baj. Tzajtzun nim cybis ex nim cyk'oj, tu'nju otok tbincha Siquem jun il matij cyxol aj Israel; otok cub tan Siquem tuc'il tme'jel Jacob, aju mya ba'ntok tu'n tbinchanjtz. 8Oc ten Hamor yolil cyuc'il tcy'ajal Jacob, ex chi cyja': —Aju ncy'ajale Siquem o t-xo' tgan ti'j cyanbe. Cybinchame xtalbil, cyk'ontze tu'n toc te t-xu'jil. 9E cyoque at kxilen cyuc'ile. Cyk'ontze cyme'jele keye, ex cyi'nxe ke keye kme'jel. 10Ax che tene kuc'ile. Lu tx'otx' tcub cywitze. Che ank'ine twitz, cybetin baje twitz, ex cylak'om cytx'otx'e, chi Hamor. 11Xi tma'n Siquem te tman Dina ex cye t-xiban: —In chin cubsane cywitze tu'n cybinchanteye xtalbil weye. Jacu txi nk'o'ne nok alcye ma tzaj cykanine weye. 12Cykanintze nok jte'x twi k'apoj ex nok nic'punx oyaj; jacu txi nk'o'ne. Nok o'cx cyk'ontze k'apoj tu'n toc te nxu'jile, chi Siquem. 13Xi cytzak'we'n ke tcy'ajal Jacob te Siquem ex te Hamor aju tman cyuc'il yol te sbubl, tu'nju lajwers otok tz'oc ten Siquem ti'j Dina, 14ex xi cyma'n cye cyja': —Mlay txi kk'o'ne kanbe te jun xinak mya sircunsidarimaj, tu'nju ic'bilxix jlu kxole. 15Ka ma che sircunsidarinjtz cycyakil ke xinak cyxole ic tza'n keye, jacutzun cub tuj kwitze icju. 16Jacutzun txi kk'o'ne kme'jele te cyxu'jile ex jacu che jaw kxu'jla'ne cyme'jele, jacu ko ank'in junx, ex junx c'loj xjal ko oquel. 17Katzun mi'n ma txi cynimane aju ma txi kma'ne cyeye tu'n cysircunsidarinjtze, ko ic'eltzune tzalu, ex cxel ki'ne kanbe kuc'ile, che chi. 18Cub tuj twitz Hamor tuc'ix Siquem aju tcy'ajal tcyakilju tzaj k'ma'n cye. 19Jurat naj baj t-sircunsidarin tib cu'xun Siquem, tu'nju otok t-xo' tgan ti'j tme'jel Jacob. Ate Siquem mas xo'n cyxol txkantl terman. 20Xi'tzun Hamor tuc'ix Siquem ttzi tlamel tnam ex xi cyma'n cyja' cye cycyakil xinak aj tnam: 21Ke xinak lu ma che oc te kamiw. Ax che ank'il kxol, ax che betel kxol, ex at nim tx'otx' jatum tu'n cyten tuj. Jacu ko moje' cyuc'il ke cyme'jel; ax icx cye, jacu che moje' cyuc'il ke kme'jel. 22Ka kaj tu'n koc te junx tnam cyuc'il ex tu'n cyank'in kuc'il, il ti'j tu'n t-xi kniman aju in cyma'n, atzun jlu: Tu'n cysircunsidarinjtz cycyakil xinak ate' kxol, ic tza'nx cye in cybincha'n. 23Tcyakilju at cye, cyuc'ix ke cyalun che oquel te ke. Nok o'cx kbincham aju in cyma'n, ex che ank'iltzun kxol, chi Hamor. 24Cycyakil ke xinak najltok tuj tnam xi cyniman tyol Hamor ex tyol tcy'ajal aju Siquem tbi, ex e baj sircunsidarin cycyakil. 25Tuj toxin k'ij, tej cyna'nte nimxix ta'w sircunsisyón, e pon cabe tcy'ajal Jacob tuj tnam, akeju t-xiban Dina, ate Simeón ex Leví; k'i'ntok cyspad, ex cub cybyo'n cycyakil xinak. Minti'tok ximan cyu'n ka cyja'tok cypon ke t-xiban Dina k'ojlel cyi'j. 26Tu'n spad cub byo'n Hamor cyu'n, tuc'ix Siquem aju tcy'ajal. Jurat naj etz cyi'n Dina tuj tja Siquem ex cub be cyu'n. 27E ultzun txkantl tcy'ajal Jacob tuj tnam, e ic' bet cyxol ke xinak otok che cub byo'n, ex xi cyi'n tcyakilju attok tuj tnam, tu'nju otok binchanjtz il ti'j cyanb. 28Xi cyi'n ke ẍne'l, ke wacẍ, ke bur ex tcyakilju attok tuj tnam ex tuj cojbil, 29tuc'ix tcyakil cyk'inumabl, ex xi cyi'n cycyakil ke c'wa'l ex ke xu'j, ex xi cyelk'a'n tcyakilju attok tuj cyja xjal. 30Xitzun tma'n Jacob te Simeón ex te Leví cyja': —Ma tzaj cyi'ne jun xobajil wibaje, ex chin elel ic'une cyu'n ke xjal ate' tuj tx'otx' lu, ke aj Canaán ex ke aj Ferezey. Cjawil cychmon cyib wi'je, che k'ojlel wi'je, ex chin bel byo'ne cyu'n cyuc'ix keju ate' tuj njaye, tu'nju nic'xi xjal ate' wuc'ile, chi Jacob. 31Xitzun cytzak'we'n: —¿Ba'npetzun ma tbincha xjal lu ti'j kanbe, ma tz'oc tk'o'n ic tza'n jun xu'j jawni twitz cyuc'il xinak?

will be added

X\