GÉNESIS 29

1Cubtzun be tu'n Jacob ex pon tuj cytx'otx' xjal tuj tjawitz k'ij. 2O til Jacob jun xoch tuj cojbil, in che ojlantok ox c'loj ẍne'l nikayin ttzi' tu'nju atzun in che c'an ke alumaj a'. Tcubsa'ntok jun abj matij te maksibl ttzi xoch. 3Oc toc cyjunin cyib cycyakil ke ẍne'l ttzi xoch, in jawtzun cyi'n pastor aju abj tcub te maksibl ttzi' tu'ntzun cyc'an ẍne'l a'. Octzun cybaj c'an ẍne'l, in cubtl cyk'o'n abj te maksibl ttzi xoch. 4Xitzun tkanin Jacob cye pastor: —¿Jatum tzajni keye, nxjalil? Xi cytzak'we'n pastor: —Aj Harán ko'ye. 5Xi tkanintl Jacob: —¿Ojtzki'npe Labán cyu'ne, aju tiyjil Nacor? Xi cytzak'we'n pastor: —Ojtzki'n. 6Xi tkanintl Jacob: —¿Ba'npe ta' Labán? Ex cymatzun pastor: —Ba'n ta'. Que'yinxa, lu Raquel aju tme'jel tzul cyuc'ix t-ẍne'l. 7Xitzun tma'n Jacob cye pastor: —Atx k'ij ex junya'x. Na'nx tpon or tu'n cyoc chmet alumaj. Cyk'onxe cyc'a ẍne'l a' ex cyxi'tle pastoril cye. 8Xi cytzak'we'n pastor: —Mlay bant icju, maxitzun cjawil k'it abj tcub ttzi xoch ocxi cyul baj cycyakil ẍne'l tu'ntzun cyc'an a'. 9Cucxtok tyolin Jacob cyuc'il pastor tej tul Raquel cyuc'il t-ẍne'l tman, tu'nju atok Raquel toc te pastor cye ẍne'l. 10Tej t-xi tque'yin Jacob lu Raquel aju tme'jel Labán aju t-xiban ttxu', cyuc'ix t-ẍne'l Labán, xi'tzun naj Jacob ex jaw ti'n aju abj tcubtok ttzi xoch ex e c'an ke t-ẍne'l Labán tu'n, aju t-xiban ttxu'. 11El ttz'uban Jacob twitz Raquel ex oc ten ok'el. 12Xi tma'n Jacob te Raquel cyja': Akine Jacob, tal Rebeca aju tanb tmana, chi Jacob. Xi'tzun kelan Raquel k'malte te tman. 13Tej tbinte Labán tkanil ti'j Jacob aju tal tanb, etz kelan c'molte te, baj tchle'n, el ttz'uban twitz ex xi ti'n tja. Octzun ten Jacob k'malte tcyakilju otok baj ti'j. 14Xitzun tma'n Labán te cyja': Ax toc, at nxilene tuc'ila, chi Labán. Cyaj ten Jacob tuc'il Labán jun xjaw. 15Xitzun tma'n Labán te Jacob: —Mlay tz'ak'nana wuc'ile nok cucx. Baka tu'nju at nxilene tuc'ila c'ak'nala wuc'ile nok cucx. K'mantza weye jte' twi tc'u'ja. 16Attok cabe tme'jel Labán: Aju tzicbaj Lea tbi; atzunte tz'inbaj Raquel tbi. 17Ate Lea myaxix ba'n che que'yin ke tbak' twitz, atzunte Raquel tbanilxix que'yin twitz tuc'ix tcyakil t-ximlal. 18Tu'nju otok t-xo' tgan Jacob ti'j Raquel, tma: —Chin ak'nale wuk abk'i tuc'ila ti'j Raquel aju tme'jela tz'inbaj, chi Jacob. 19Xi ttzak'we'n Labán cyja': —Maslo ba'n tu'n t-xi nk'o'ne teya twitzju tu'n t-xi nk'o'ne te junxitl xjal. Tencja wuc'ile, chi Labán. 20Cyja'tzun ak'nan Jacob wuk abk'i ti'j Raquel, ex aju wuk abk'i mer ic tza'n nok jte' k'ij e'la tuj twitz Jacob, tu'nju at nimxix tgan ti'j. 21Xitzun tma'n Jacob te Labán cyja': —K'ontza nxu'jile tu'n nmoje'ye tuc'il, tu'nju ma japun baj tyemp wu'ne, aju xi nma'ne teya. 22E tzajtzun ttxco'n Labán cycyakil ke tvesin, ex oc jun nintz wa'n cyu'n tej tbant mejeble'n. 23Te konic'an tzaj ti'n Labán tme'jel aju Lea tbi, xi tk'o'n te Jacob, ex cub tan Jacob tuc'il. 24Xi tk'o'n Labán jun tmajen xu'j te Lea te ajbel te, Zilpa tbi. 25Tejtzun t-skix te juntl k'ij, el tnic' Jacob ti'j atok Lea. Xitzun tma'n te Labán: —¿Ti ma tbinchaya wi'je? ¿Baka mya ti'j Raquel o chin ak'nane tuc'ila? ¿Tiku'ntzun ma chin cub t-sbu'na? 26Xi ttzak'we'n Labán: —Minti' in bant ku'ne icju, tu'n tmoje' jun kme'jele tz'inbaj nej twitz tzicbaj. 27E tjapun baj wuk k'ij nink'ij tu'na te mejeble'n ti'j Lea, ex ba'ntzun t-xi nk'o'ne Raquel teya, ka ma cub tuj twitza tu'n tak'nana wuktl abk'i wuc'ile. 28Cubtzun tuj twitz Jacob icju, ex japun baj wuk k'ij nink'ij tu'n ti'j mejeble'n. Xitzun tk'o'n Labán tme'jel aju Raquel tbi, tu'n toc te t-xu'jil Jacob. 29Ax icx xi tk'o'n Labán jun tmajen xu'j te Raquel tu'n tajben te, Bilha tbi. 30Moje'tzun Jacob tuc'il Raquel, ex o tc'ujla nimxix wen, mas o tc'ujla twitz Lea, ex ak'nan tuc'il Labán wuktl abk'i. 31O til Kman myaxix c'ujla'ntok Lea tu'n Jacob, ex o onin ti'j tu'n ttzaj tal; atzunte Raquel mibantok alin. 32Octzun ten tal Lea. Tej tul itz'j tal, Rubén tbi oc tk'o'n, ex tma cyja': Ma tzaj tque'yin Kman atine tuj bis. Tu'ntzun jlu chin c'ujlanjtzele ja'lo tu'n nchmile, chi Lea. 33Oc ten juntl tal Lea. Tej tul itz'j tmatl cyja': Tu'nju ma tbi Kman myaxix c'ujla'n kine, ma tzaj tk'o'n juntl wale, chi Lea. Tu'ntzun jlu, Simeón tbi oc tk'o'n. 34Oc ten juntl tal Lea. Tej tul itz'j tmatl cyja': Atzun ja'lo ctel mas tmojbabl tib nchmile wuc'ile, tu'nju ma che tzaj ox tcy'ajal wi'je, chi Lea. Tu'ntzun jlu, Leví tbi oc tk'o'n. 35Oc ten juntl tal Lea. Tej tul itz'j tmatl cyja': Atzun ja'lo cjawil nnimsa'ne tbi Kman, chi Lea. Tu'ntzun jlu, Judá tbi oc tk'o'n. We'tzun tu'n ttzaj tal.

will be added

X\