Gálatas 5

1Ma ko tzokpet tu'n Crist tu'n kten tzokpi'n ko'. Cyja'tzun che we'xixe tu'n mi'n cyyucche, ex mi'n txi cyk'on cyibe juntl maj tjak' yuw tu'n cyoque te majen. 2Akine Pablo, lu cxel nma'ne cyeye, ka ma che sircunsidarinjtze, minti'xlo tajben Crist cyeye. 3Cxel ncyuwsa'ne juntl maj cyeye, ka at jun xjal ma sircunsidarinjtz, entons il ti'j tu'n tjapun tu'n tcyakilju in tma'n tley Moisés. 4Jumajx ma tz'el cypa'n cyibe ti'j Crist, akeye cyajbile tu'n cyoque te tz'aklxix twitz Dios nok tu'nju in cybincha'ne aju in tma'n ley; ma tz'el cypa'n cyibe ti'j t-xtalbil Dios. 5Porque ako' nok tu'nju Xewbaj Xjan k'ukl kc'u'j ti'j tu'n koc k'o'n te tz'aklxix tu'n Dios nok tu'n kocslabl. 6Porque tu'nju ma ko oc mojba'n tuc'il Jesucrist, junx ta' ka sircunsidarimaj ko' ex ka mya sircunsidarimaj ko', minti' toclen jlu. Aju mas ilxix ti'j, tu'n tten kocslabl in tyec'un tib tu'n kc'ujlalil. 7Nej in che bete ba'n. ¿Alcyetzun ma makonte cyeye tu'n mi'n t-xi cynimane aju yol axix toc? 8Ma cub ti'j cynable pero cyu'n xjal, mya tu'n Dios aju txconte cyeye. 9Che ximane ti'j jlu: Aju tk'otjil pan in jaw mal tc'u'j tcyakil nok tu'n ch'in t-samel. 10Tu'nju ocslal ko' ti'j Crist, ma ke' nc'u'je cyi'je, ctel cyximbetze ic tza'n weye; atzun teju xjal in xitunte cynable, tzul tcastiw tu'n Dios, nok alxcye. 11Atzun weye erman, nokwit cucx t-xi nma'ne tu'n tbant sircunsisyón, myawtlo cucx nyajlanjtze cyu'n xjal judiy. Nokwit cucx t-xi nma'ne tu'n tbant sircunsisyón, minti'wtlo in tzaj cyk'oj xjal ti'j ju yol in xi nma'ne ti'j tcrus Crist. 12Pero akeju in che xitunte cynable ka il ti'j sircunsisyón, ba'nwt tel cycaparin cyib. 13Porque erman, o che txconjtze tu'n cytene tzokpi'n keye; pero mya tu'nju tzokpi'n keye tu'n cybinchanteye tajbil cychibjale, nok o'cx tu'n cyajbene cyxolxe ex tu'n cyc'ujlante cyibe. 14Porque tcyakilju in tma'n tuj ley in japun tu'n junx yol lu: Cyc'ujlame ke cyuc'ile ic tza'nx cyeye in cyc'ujlan cyibe, chi tuj ley. 15Katzun ma tz'oc cytx'an cyibe cyxolxe, ex ka ma baj cychyon cyibe ic tza'n ke jil, cyk'onque cwent cyi'je, mya yajcu jacu che naje cycyakile cyu'nx cyibe. 16Cyja'tzun in xi nma'ne: Che bete ic tza'n tajbil Xewbaj Xjan tu'ntzun mi'n t-xi cynimane aju tajbil cychibjale. 17Porque aju tajbil kchibjal minti' in cub tuj twitz aju in tma'n Xewbaj Xjan, ax icx te Xewbaj Xjan minti' in cub tuj twitz aju tajbil kchibjal, ex akeju cabe lu cyajk'oj cyib. Cyja'tzun minti' tumel tu'n cybinchanteye ba'n aju cyajbile tu'n tbant. 18Pero ka ẍaklu'n keye tu'n Xewbaj Xjan, myatzun ate'ye tjak' ley. 19K'ancha'lxix aju in cybincha'n xjal in xi cyniman tajbil cychibjal. Atzun jlu in cybincha'n: In cybincha'n aj pajil, in che yaẍin, in cybincha'n aju ttz'ilil, in che achin, 20in che c'ulun cywitz ke tilbilal, aj cy'a' ke, cyajk'oj cyib, in che k'ojin, nno'c tx'a'l ti'j cyc'u'j ti'j juntl, in che jaw cyakpaj, in baj cyic'len cyib, in cub ten pabl tib cyxol, ex in che oc lpe' ti'j jun xnak'tzbil mya ba'n. 21In tzaj tlo'ch cyc'u'j, byol xjal ke, c'al k'e'n ke, in che achin tuj nink'ij, ex at mastl in cybincha'n ic tza'n jlu. Ba'n tu'n cybinteye jlu: Akeju cucx cybinchante tcyakil jlu, mlay che ocx tuj tcawbil Dios, ic tza'n o txi nma'ne cyeye. 22Atzunju in tk'o'n Xewbaj Xjan atzun jlu: Tu'n tten kc'ujlalil, tu'n ktzalaj, tu'n tten kmojbabl kib, tu'n tten kpasens, tu'n kbinchante xtalbil te juntl, tu'n tten kbanil, tu'n kwe'xix tuj kocslabl, 23tu'n koc mans, ex tu'n kjac'unte kib. Minti' jun ley mayolte ke ti'j jlu. 24Ex akeju ocslal ke ti'j Crist, o jaw cyk'o'n twitz crus aju tajbil cychibjal tuc'ix ju cyachbil, tuc'ix ju in pon cyc'u'j ti'j. 25Ka at kchwinklal tu'n Xewbaj Xjan, ax icx ko bet ic tza'nx in tma'n Xewbaj Xjan. 26Mi'n jaw kniman kib. Mi'n tz'oc kic'len kib kxolx. Mi'n tzaj tlo'ch kc'u'j ti'j juntl.

will be added

X\