Gálatas 1

1Akine Pablo apostl kine, mya cyu'n xjal ma chin oque te apostl, nok o'cx tu'n Jesucrist ex tu'n Kman Dios aju jatz ank'in Jesucrist tu'n cyxol cyimni. 2In xi ntz'ibane cyeye akeye ocslal tuj junjun tnam tuj tx'otx' Galasia, ex in che'x k'olbe'ne cyu'n cycyakil erman ate' wuc'ile. 3Awt Kman Dios tuc'ix Kajaw Jesucrist che k'onte xtalbil cyeye ex tu'n tke'xix cyc'u'je. 4Ate Jesucrist xi tk'on tib tu'n tcyim tu'n tchjet kil ex tu'n kclet tu'n tuj tk'ijlalil ja'lo mya ba'n, ic tza'nx tajbil Kman Dios. 5Nimanxwit tbi Dios tuj tcyakil tabk'iyil te jumajx. Icxwitju. 6Ma jaw naj nnable tu'nju ma tz'el cypa'n naj cyibe ti'j Dios aju txcon cyeye nok tu'n t-xtalbil Crist, ex ma che oc lpe'ye ti'j tkanil juntl colbil junxitl tten. 7Minti' juntl tkanil colbil, pero at junjun xjal nne'l tzpet cynable cyu'n, ex cyajbil tu'n tch'expet aju tkanil colbil in tzaj tk'o'n Crist. 8Pero ka at jun xjal ma txi tpacba'n junxitl tkanil colbil cyeye mya ic tten ic tza'n tkanil colbil xi kma'ne cyeye, ba'n tu'n tcub t-sentens tu'n tnaj, ka akine ex ka jun anjel in tzaj tuj cya'j. 9Ic tza'n xi nma'ne cyeye nej, icxtzun cxel nma'ne juntl maj cyeye ja'lo: Ka at jun xjal in pacban ti'j tkanil jun colbil junxitl tten ex mya ic tten ic tza'n tkanil colbil ma cybiye, ba'n tu'n tcub t-sentens xjal lu tu'n tnaj. 10¿Alcye nno'c tilil wu'ne? ¿Apeloju tu'n cyyolin xjal ba'n wi'je, ex ka aju tu'n tyolin Dios ba'n wi'je? ¿Apetzunlo nno'c tilil wu'ne tu'n cytzalaj xjal wi'je? Mi'n, porque nokwit cucx toc tilil wu'ne tu'n cytzalaj xjal wi'je, myawtlo tmajen Crist kine. 11Erman, waje tu'n cybinteye jlu, aju tkanil colbil in xi npacba'ne, mya cyu'n xjal xbant. 12Porque mya cyu'n xjal tzaj cyk'o'n weye, ex minti' in xnak'tzanjtze cyu'n xjal ti'j, nok o'cx tu'n Jesucrist tzaj tyec'un weye. 13Porque bi'maj cyu'ne tza'n ntene ojtxi tej ocsla'nxtok cyocslabl xjal judiy wu'ne; nimxix e cub nyajla'ne cycyakil ocslal etzan ke tu'n Dios ex oc tilil wu'ne tu'n cynaj. 14Tej ntene tuj cyocslabl xjal judiy, mas nejni kine cywitz nimcu nxjalile junx wabk'iyile cyuc'il, porque mas nimxix nganiye ti'j ju yol cyaj k'ma'n cyu'n nxe'chele. 15Pero ate Dios jaw sc'onte weye na'nxtok witz'je, ex in txconjtze tu'n nok tu'n t-xtalbil. 16Ex ba'n ela tuj twitz Dios tu'n ttzaj tyec'un Tc'wa'l weye, tu'ntzun t-xi npacba'ne tkanil colbil tu'n Crist cyxol ke xjal mya judiy ke. Cyja'tzun minti' xi nkanine jun consej cye xjal, 17ex minti' in jaxe tuj tnam Jerusalén cyuc'il apostl, akeju nej e oc te apostl nwitze; nok o'cx inxe tuj tx'otx' Arabia, ex in ajtz meltz'aje juntl maj tuj Damasco. 18Tbajlenxitzun ox abk'i, in jaxe tuj Jerusalén que'yilte Pedro, ex ax in tene olaj k'ij tuc'il. 19Pero minti' juntl apostl o wile, nok o'cx te Jacobo o wile, aju titz'in Kajaw. 20Aju yol ma txi ntz'ibane cyeye ax toc, in que'yin Dios ti'j minti' in chin nic'ane yol. 21Te tibajxitzun, inxe tuj tx'otx' Siria ex tuj tx'otx' Cilicia. 22Ex na'nxtok tojtzkinjtz nwitze cyu'n ke ocslal etzan ke tu'n Crist ate' tuj junjun tnam tuj tx'otx' Judey. 23O'cx otok cybi in cyma'n mastl ocslal wi'je: Aju xjal o yajlan ke ojtxi ex o k'ojin ti'j kocslabl, atzun ja'lo in xi tpacba'n tkanil ba'n ti'j kocslabl, che chi. 24Ex xi cyk'o'n chjonte te Dios wi'je.

will be added

X\