ESDRAS 9

1Tejtzun tbaj tcyakil jlu, e ul lak'e' ke nejenel cye xjal judiy ntxlaje, ex tzaj cyma'n weye cyja': Ke aj Israel, cyuc'ix ke pal ex ke aj Leví, minti' pabl tib cyxol cyuc'il ke xjal ax najlke tuj tx'otx' lu, akeju aj Canaán, aj Hetey, aj Peresey, aj Jebusey, aj Amón, aj Moab, aj Ejipt ex aj Amorrey, nok o'cx ma che'x lpe' ti'j cycostumr ke xjal lu puro ic'bilxix. 2Acu ke ex ke cyc'wa'l ma che jaw moje' cyuc'il cyme'jel ke xinak te lugar lu; cyja'tzun tten ma baj cysmon cyib ke xjal etzan tu'n Dios cyuc'il ke xjal mya Judiy ke. Ex akeju ma che binchante il lu tnejel, ake nejenel ex ke gobernador, che chi weye. 3Tejtzun nbinteye tkanil lu, el nsbit'une nxbalune wi'je, jatz nbako'ne ttzmal nwi'ye ex nxmatze te jun yec'bil te ta'w nbise tuj wanmiye, in cub ke'ye ex tzaj nimxix nbise. 4Cycyakil keju in che xobtok twitz Dios, aju Cydios aj Israel, ul baj cychmon cyib wuc'ile tu'n tlaj il cybincha keju otok che'x k'i'n pres ex otok che ul meltz'aj; atzun weye cucx k'ukl kine tu'n nim nbise tejxi tpon or tu'n tcub patit chojbil te kale. 5Tujtzun or lu in jaw we'ye jatum k'ukl kintoke tu'n bis, ex tocxtok nxbalune sbit'umaj, in cubtzun ẍmeje'ye twitz Kman aju Ndiose, 6ex xi nma'ne te cyja': Aya Nman Dios, in chin ch'ixwiye ex tzpetni ta' nnable, minti' in cnet ttxolil nyole tu'n nyoline tuc'ila; ma chmet nimxix kpaltile twitza, aju kile nimxix ma japun tuc'ila tuj cya'j. 7Atxix tuj tk'ijlalil tej cyten ktzan kxe'chele ax icx ja'lo cucx in ko binchane nimxix il. Tu'n tlaj kbinchbene mya ba'n o ko'x k'o'ne tuj cyk'ab ke rey cye mastl nasyon, tza'nx keye, cyuc'ix kreye ex ke pal. At o che cub byo'n tu'n spad ex o ex k'i'ne tuj ktanmiye tu'n kxi'ye tuj juntl tnam, el k'i'n aju at keye ex o el ic'une, ax icx in baj ki'je ja'lo. 8Pero ax icx ja'lo, aya Kman ex Kdiose, tu'nju tc'ujlalila ma tzaj tk'o'na ambil keye tu'n kcyaj tene jun byuj kbete tu'n kule najal tuj tx'otx' xjan; tu'na ma spic'e' tuj kwitze juntl maj, ex masque majentok ko'ye, ma tzaj tk'o'na tzalajbil tuj kanmiye. 9Masque majen ko'ye, pero minti' ma ko cyaj tcolina; ma tzaj tyec'una tc'ujlalila keye cywitz ke rey cye aj Persia, ma tzaj tk'o'na ac'aj kchwinklale tu'n tjaw kbincha'ne juntl maj tjaya aju o cub xitj, ma tzaj tk'o'na colbil keye tuj Judá ex tuj Jerusalén. 10Atzun ja'lo Kman Dios ¿ti cxel kma'ne tibaj tcyakil jlu? Minti' ma che japun ke tmandamyenta ku'ne, 11aju tzaj tma'na cye t-sanjela akeju tmajena. Bi'x tzaj tma'na keye ka nimxix mya ba'n at tuj tx'otx' jatum tu'n kocxe tuj, aju tu'n toc te ketzbile. Tu'n tlaj cybinchben xjal najlke tuj lugar lu ex tu'nju cycostumr puro ic'bilxix, nojni twitz tx'otx' tu'n mya ba'n. 12Ax icx tzaj tma'na keye tu'n mi'n t-xi kk'o'ne kme'jele tu'n cymoje' cyuc'il cycy'ajal ke xjal lu, ex tu'n mi'n t-xi kk'o'ne ambil tu'n cymoje' ke cyme'jel cyuc'il kcy'ajale, ex tu'n mi'n k-onine cyi'j ke xjal lu tu'n cyank'in tuj txubtxaj; tu'ntzun tocxix kipune ex tu'n kwa'ne ti'j cywitz awal in tzaj tk'o'n tx'otx', ex te tibajxi tu'n tcyaj ten tx'otx' lu te cyetzbil ke kiyjile te jumajx. 13Te tibajxi tcyakilju ma tzaj ki'je tu'n tlaj kbinchbene mya ba'n ex kile nimxix, minti' ma cub tk'o'na kcastiwoye ic tza'nx kile, nok o'cx ma tzaj tk'o'na ambil keye, jun byuj kbete, tu'n kule tzalu. 14¿Ba'npetzun tuj twitza tu'n mi'n t-xi knimane tmandamyenta ex tu'n kmoje'ye cyuc'il ke xjal ic'unxix cycostumr tu'na? ¿Mlaypetzun tzaj tk'oja ki'je ex mlaypetzun ko cub baj tbyo'na tu'n mi'n tcyaj ank'in jun keye? 15Aya Nman aju Cydios aj Israel tz'aklxixa kuc'ile; nok tu'n t-xtalbila ma cyaj ank'in jun byuj kbete ic tza'n in kile ja'lo. Keye ax toc aj il ko'ye twitza; tu'ntzunju minti' koclene tu'n ktene twitza, nchiye tuj nna'j Diose.

will be added

X\