ESDRAS 8

1Atzun cybi ke nejenel cye junjun c'loj xjal at cyxilen cyxolx, ic tza'nx in cnet tuj libro jatum tz'iban cybi cyxe'chel, akeju e je'tz tuj Babilonia junx wuc'ile, tu'n cyul tuj Jerusalén tuj tk'ijlalil tej in cawintok rey Artajerjes: 2Gersón aju nejenel cye tiyjil Finees; Daniel aju nejenel cye tiyjil Itamar; Hatús aju tcy'ajal Secanías, nejenel cye tiyjil David; Zacarías aju nejenel cye tiyjil Paros, ex uc'in jun syent tuc' 50 xinak tu'n, tz'ibantok cybi tuj list; 4Elioenai aju tcy'ajal Seraías, nejenel cye tiyjil Pahat-moab, uc'in cab syent xinak tu'n; 5Secanías aju tcy'ajal Jahaziel, nejenel cye tiyjil Zatu, uc'in ox syent xinak tu'n; 6Ebed aju tcy'ajal Jonatán, nejenel cye tiyjil Adín, uc'in 50 xinak tu'n; 7Jesaías aju tcy'ajal Atalías, nejenel cye tiyjil Elam, uc'in 70 xinak tu'n; 8Zebadías aju tcy'ajal Micael, nejenel cye tiyjil Sefatías, uc'in 80 xinak tu'n; 9Obadías aju tcy'ajal Jehiel, nejenel cye tiyjil Joab, uc'in cabe syent tuc' wajxaklaj xinak tu'n; 10Selomit aju tcy'ajal Josifías, nejenel cye tiyjil Bani, uc'in jun syent tuc' 60 xinak tu'n; 11Zacarías aju tcy'ajal Bebai, nejenel cye tiyjil Bebai, uc'in 28 xinak tu'n; 12Johanán aju tcy'ajal Hacatán, nejenel cye tiyjil Azgad, uc'in jun syent tuc' laj xinak tu'n; 13Elifelet, Jeiel ex Semaías, nejenel cye tiyjil Adonicam, uc'in 60 xinak cyu'n, ake jlu yajxi e je'tz tuj Babilonia. 14Utai ex Zabud, nejenel cye tiyjil Bigvai, ex uc'in 70 xinak cyu'n. 15Akine Esdras e oc nchmo'ne cycyakil xjal lu ttzi' tbe a' in pon tuj nima Ahava, ex ox k'ij o tene ma chixin. Tejtzun tjaw list wu'ne cyi'j ke xjal ex cyi'j ke pal, minti' jun aj Leví cnet wu'ne cyxol. 16Tu'ntzun jlu e je'x nsama'ne junjun xjal ma' cyoclen ex atzun ke jlu: Eliezer, Ariel, Semaías, Elnatán, Jarib, Elnatán, Natán, Zacarías ex Mesulam, tuc'ix Joiarib ex Elnatán, akeju k'ol xnak'tzbil, 17e je'x nsama'ne tu'n cyxi' yolil tuc'il Iddo aju nejenel te lugar Casifia, ex xi nma'ne cye alcye yol tu'n t-xi cyma'n te Iddo ex cye ke tuc'il, akeju ajbel tuj tja Dios otok che pon tuj Casifia, tu'n ttzaj cyi'n junjun xjal tu'n cyajben junx kuc'ile tuj tja Dios. 18Ex chjonte Dios ul cyi'n jun xinak at nimxix tnabl, Serebías tbi, cyuc'ix ke tc'wa'l ex ke terman, wajxaklaj cybet tu'n cycyakil; a jlu tiyjil jun aj Leví Mahli tbi. 19Ax icx ul cyi'n Hasabías ex Jesaías cyuc'ix ke cyc'wa'l ex ke cyerman, tu'n cycyakil japun winkin cybaj, ex ake jlu tiyjil Merari ke. 20Cyxol cyiyjil ke xjal e ajben tuj tja Dios, akeju e oc tk'o'n David ex cyu'n ke nejenel tu'n cyonin cyi'j ke aj Leví, attok cabe syent tuc' winkin cybet, ex cycyakiltzun ke jlu cu'x tz'ibet cybi. 21Te tibajxi xi nma'ne tu'n tcub kyo'ne we'yaj ttzi nima Ahava, tu'ntzun ttzaj kna'ne aju kpaltile twitz Dios ex tu'n t-xi kkanine te tu'n koc cwentine tu'n tuj be, cyuc'ix ke kc'wa'le ex tcyakilju at keye. 22Tzaj nch'ixwiye tu'n t-xi nkanine te rey tu'n cytzaj tk'o'n ke soldad cyjax cyibaj chej te cwentil keye cywitz ke aj k'oj tuj be, porque otok txi nma'ne te rey ka ate Dios cwentil cye keju k'ukl cyc'u'j ti'j, pero ax icx in tzaj nim tk'oj ex ttx'u'jil cyi'j ke xjal nne'l cypa'n cyib ti'j. 23Cyja'tzun, cub kyo'ne we'yaj ex o cubsane twitz Dios ti'j tcyakil jlu, ex tzaj tbi'n Dios kkanbetze. 24Ex jaw nsc'o'ne cablaj nejenel cye pal, cyuc'ix Serebías, Hasabías ex lajtl cyuc'il, 25baj nmalo'ne sak pwak, k'an pwak ex ke macbil otok che tzaj k'o'n tu'n rey ex cyu'n ke xjal onil te rey tuj tcawbil, ex cyu'n ke xjal ma' cyoclen ttxlaj, ex cyu'n cycyakil aj Israel akeju otok tz'oc cychmon cyib. Cycyakil ke oyaj lu tuj tja Dios tu'n cyajben. 26E cub nmalo'ne ke oyaj lu ex xi nk'o'ne jwe' syent quintal sak pwak cye, cyuc'ix jun syent macbil sak pwak cytx'otx'il, 75 quintal cyalil, 75 quintal k'an pwak; 27tuc'ix winkin lak k'an pwak cytx'otx'il te belajlaj libr cyalil, ex cabe macbil k'an c'uxbil cytx'otx'il in che koptz'aj wen, mas tbanil che que'yin cywitz ke mastl ex wi'yilxix ke, mer ic tza'n k'an pwak. 28Ex xitzun nma'ne cye: Akeye ma che el pa'ne tu'n cyajbene o'cx te Kman, ax icx ke macbil. Aju sak pwak ex k'an pwak jun oyaj te Kman ke, aju Cydios ktzan kxe'chel. 29Cycwentin oque ex cyc'u'nxe maxi ocxi tbaj cymalo'ne cywitz ke nejenel cye pal, cywitz aj Leví ex cywitz ke nejenel cye xjal aj Israel, cyuj ke cwart ate' tuj tja Kman tuj Jerusalén, nchiye cye. 30Atzun cye pal cyuc'ix aj Leví xi cyc'mo'n aju sak pwak, k'an pwak ex ke macbil, akeju otok che baj malo'n tu'n t-xi cyi'n tuj Jerusalén, tu'n cyocx k'ot tuj tja Kman. 31Tuj tcablajin k'ij te tnejel xjaw tzyet be ku'ne ttzi nima Ahava tu'n kpone tuj Jerusalén; a Dios onin keye, o ko clete tu'n tuj kbeye tuj cyk'ab ke aj k'oj ki'je ex tuj cyk'ab xjal elek'. 32Tejtzun kpone tuj Jerusalén, o ojlane ox k'ij. 33Tuj tcyajin k'ij kponlene, baj kmalo'ne sak pwak twitz tja Dios, tuc'ix k'an pwak ex ke macbil, ex xitzun kk'o'ne tcyakil te pal Meremot aju tcy'ajal Urías. Atok Eleazar tuc'il, aju tcy'ajal Finees, cyuc'ix ke aj Leví, ex atzun ke jlu: Jozabad aju tcy'ajal Jesúa ex Noadías aju tcy'ajal Binúi. 34Ax k'ij lu baj malet ex baj ajlet tcyakil ex cyaj tz'ibet tcyakil tajlal iktz. 35Te tibajxi, akeju e etz tuj Babilonia ex otok che ul tuj Jerusalén xi cyk'o'n ke oyaj patun in che cub te Dios aju Cydios aj Israel, ex xi cyk'o'n cablaj tal tor te jun oyaj te ak'bil chjonte cyu'n cycyakil aj Israel; ax icx xi cyk'o'n 96 tman ẍne'l, 77 tal tman ẍne'l ex cablaj chip te chojbil il. Tcyakil jlu patun cub te nimbil te Kman. 36Ex xitzun cyk'o'n aju u'j jatum tz'iban orden tu'n rey cye ke cawil ex gobernador tuj tx'otx' tcubsa'n tuj tumlal telex k'ij te nima Éufrates; ex atzun ke jlu e onin cyuc'il tnam xjal tu'n tjaw binchet tja Dios.

will be added

X\