ESDRAS 5

1Ate Hageo aju t-sanjel Dios, tuc'ix Zacarías aju tcy'ajal Iddo, xi cyma'n cye xjal judiy akeju najl tuj Judá ex tuj Jerusalén, akeju tkanil in tzaj tma'n Kman cye, aju Cydios aj Israel. 2Atzunte Zorobabel aju tcy'ajal Salatiel, tuc'ix Jesúa aju tcy'ajal Josadac, tzyet juntl maj ak'untl cyu'n tu'n tjaw binchet tja Dios tuj Jerusalén, ex e ten t-sanjel Dios cyuc'il tu'n cyonin cyi'j. 3Tzajtzun Tatnai aju gobernador tuj tx'otx' ta' tuj tumlal telex k'ij te nima Éufrates, tuc'ix Setar-boznai ex cyuc'ix mastl cyuc'il, e je'x k'malte cye cyja': ¿Alcye ma txi k'onte orden cyeye tu'n tjaw cybincha'ne tja Dios lu ex tu'n tbaj cybincha'ne tcyakil tuj? 4Ax icx tzaj cykanin: ¿Ti cybi ke xjal in che ak'nan ti'j ja lu? 5Masque icju, pero axte Dios o cwentin cye ke nejenel cye xjal Judiy, cyja'tzun minti' o we' ak'untl cyu'n. Xi t-sama'n Tatnai tkanil lu tuc'il Darío aju rey cye aj Persia, ex e ayon tu'n cyc'monte alcye tzak'webl tu'n rey. 6Atzun jun copya lu te u'j tu'n Tatnai aju gobernador te tx'otx' tcubsa'n tuj tumlal telex k'ij te nima Éufrates, ex tu'n Setar-boznai ex ke mastl cyuc'il ex ke xjal ma' cyoclen tu'n rey, akeju ate'tok tuj tumlal telex k'ij te nima Éufrates, aju xi cysama'n te rey Darío. 7Chitzun in tma'n cyja': Tat Rey, cuchiwt ba'n ta'ya. 8Kaje tu'n tbinteya jlu: O kox aje tuj tx'otx' Judá, ex aju tja Dios aju Dios ma'xix toclen, niban tjaw cybincha'n xjal cyu'n ke nmak abj xpelimaj ex niban cyjax naj ke tkul; cyuwxix in che ak'nan ti'j ak'untl lu ex aju ak'untl in bet-xix wen. 9Xi kkanine cye nejenel cye xjal judiy al u'n otok txi k'o'n orden cye tu'n tjaw binchet juntl maj tja Dios ex tu'n tjax cyk'o'n tkul, 10xi kkanine ti cybi ke xjal nejenel ti'j ak'untl, tu'ntzun t-xi ksama'ne cybi tuc'ila. 11Atzun cye tzaj cytzak'we'n: Keye in ko ajbene te Dios, aju Dios tajaw cya'j ex tajaw tx'otx', ex in ko ak'nane tu'n tjaw binchet juntl maj tja, aju jaw bincha'n tu'n jun nintz rey cye aj Israel ojtxi. 12Pero ke ktzan kxe'chele cybincha mya ba'n, ex tu'ntzunju tzaj nimxix tk'oj Dios cyi'j, aju tajaw cya'j; e je'x k'o'n tu'n tuj tk'ab rey Nabucodonosor aju rey cye aj Babilonia aju aj Caldey, ex aju rey lu cub t-xitun tja Dios ex e je'x ti'n nimcu xjal aj Israel tuj Babilonia. 13Te tibajxi tzaj tk'o'n Ciro orden tu'n tjaw binchet juntl maj tja Dios tuj tnejel abk'i ttzyetlen tcawin tuj Babilonia. 14Ax icx etz ti'n Ciro tuj tja cydios xjal aj Babilonia ke macbil k'an pwak ex sak pwak in che ajbentok nej tuj tja Dios tuj Jerusalén, akeju otok che pon ti'n rey Nabucodonosor tuj Babilonia, ex e je'x tk'o'n tuj tcwent jun xjal Sesbasar tbi, aju otok tz'oc tk'o'n te gobernador. 15Ex xi k'o'n orden te tu'n cyajtz ti'n ke macbil, tu'ntzun cyul meltz'aj juntl maj tuj Jerusalén, ex tu'n tjaw bincha'n juntl maj tja Dios tujx tlugaril jatum tcubsa'n nej. 16Tejtzun tul Sesbasar tuj Jerusalén cub ke' t-simyentil tja Dios tu'n; atxixtzun ttzyetlen tu'n tjaw binchet juntl maj tja Dios, pero na'nx tbant, che chi xjal judiy keye. 17Ja'lo ka ba'n tuj twitza, Tat Rey, kajbile tu'n tcu'x jyet cyuj ke libro cye ke rey cye aj Babilonia, tu'ntzun kbinteye ka ax toc o tma Ciro tu'n tjaw binchet juntl maj tja Dios tuj Jerusalén, ex kajbile tu'n kbinteye alcye teya t-ximbetz ti'j jlu, Tat Rey, chi tuj u'j.

will be added

X\