ESDRAS 4

1Tejtzun cybinte ke aj k'oj cyi'j aj Judá ex cyi'j aj Benjamín, ka otok che etz tuj Babilonia ex in che ak'nantok tu'n tjaw binchet juntl maj tja Dios, aju Cydios aj Israel, 2e je'x que'yil cye Zorobabel ex Jesúa ex ke nejenel cye junjun c'loj cyiyjil aj Israel ex cyma: —K'ontza ambil keye tu'n konine cyuc'ile tu'n tjaw binchet tja Dios, porque ako'ye ex akeye in ko c'ulun twitz Dios aju Cydiose, ex in xi kk'o'ne chojbil te atxix tuj tk'ijlalil Esar-hadón, aju rey cye aj Asiria, aju ul k'inte keye tzalu. 3Atzun cye Zorobabel, Jesúa ex ke nejenel cye junjun c'loj cyiyjil aj Israel xi cytzak'we'n: —Minti' cyoclene tu'n cyak'nane junx kuc'ile tu'n tjaw binchet tja Kdiose. O'cx keye ko jawil binchante te juntl maj, porque o'cx keye ma tzaj k'o'n orden tu'n rey Ciro tu'n tjaw kbincha'ne. 4Atzun cye xjal najlke tuj lugar lu e oc ten xobtzal cye aj Judá tu'n t-xi cycolin ak'untl ti'j tja Dios. 5Ax icx e oc ten ke xjal lu k'ol pwak cye junjun xjal ma' cyoclen ttxlaj rey, tu'ntzun t-xi cycolin aj Judá ak'untl ti'j tja Dios. O cybincha jlu tuj tcyakil tk'ijlalil Ciro aju rey cye aj Persia, ex max tuj tk'ijlalil tej tcawin rey Darío aju rey cye aj Persia. 6Matok in tzyet tcawin rey Asuero, e pon ke xjal tuc'il k'malte yol mya ba'n cyi'j aj Judá ex cyi'j aj Jerusalén. 7Ex tuj tk'ijlalil Artajerjes aju rey cye aj Persia, ate Bislam tuc'ix Mitrídates, Tabeel ex mastl cyuc'il, cub cytz'iban jun u'j ex xi cysama'n te rey Artajerjes. Aju u'j lu tz'ibantok tuj yol aramey. 8Ate Rehum aju gobernador toc tu'n rey, tuc'ix Simsai aju aj tz'ibal, xi cytz'iban jun u'j te rey Artajerjes, jatum in yolin mya ba'n cyi'j cycyakil xjal najlke tuj Jerusalén. 9Atzunju u'j lu xi cysama'n Rehum aju gobernador, tuc'ix Simsai aju aj tz'ibal ex ke mastl cyuc'il akeju jwes ke, cyuc'ix mastl gobernador, ex ke xjal ma' cyoclen otok che tzaj tuj Persia, tuj Erec, tuj Babilonia ex tuj Susa ex ka tuj Elam, ex ke mastl xjal te junjun tnam e ul k'i'n tu'n rey Asnapar aju ma' toclen, tu'n cynajan tuj tx'otx' Samaria ex cyuj mastl tx'otx' tcubsa'n tuj telex k'ij te nima Éufrates. Atzun tyol u'j lu, aju xi cysama'n: Aya Tat Rey Artajerjes, ako'ye tmajena najlko'ye jlajtzi nima Éufrates in xi kk'olbe'ne: 12Kajbile tu'n tbinteya Tat Rey: Ke xjal judiy ẍe tzaj tuc'ila tu'n cyul kuc'ile ma che ul tuj Jerusalén, jumajx tx'u'j cywi' ex miban che bin. Ma tzyet tu'n tjaw cybincha'n juntl maj tnam tuc'ix muro toc ti'jele, ex niban t-xi cybincha'n ke t-simyentil muro. 13Ax icx kaje tu'n tbinteya Tat Rey, ka ma jaw bincha'n juntl maj tnam lu, ex ka ma jaw bincha'ntl muro ti'jele, entons ke xjal lu mlay chjet chojenj cyu'n, ax icx mastl chojbil aju il ti'j tu'n tchjet, ex tu'n jlu cbel lak'e' tk'inumabla. 14Ex tu'nju in ko ajbene teya Tat Rey, mi'n kaje tu'n ttzaj jun mya ba'n ti'ja ic tza'n jlu. Tu'ntzunju in xi ksama'ne tkanil lu teya. 15Ba'n tu'n tcu'x jyet cyuj ke libro jatum tz'iban tcyakil tx'olbaben cyu'n ktzan t-xe'chela, ex octzun tcnet tu'na aju tz'iban tuj libro, c'eleltzun tnic'a ti'j, akeju tnam xjal lu miban che bin ex jawni ke cyi'j ke rey ex cyi'j ke xjal ate' cyuj mastl tnam. Tuj tyemp ojtxi jaw cyi'n cyib tu'n cyk'ojin cyi'j ke rey, ex tu'ntzun jlu cub xitun cytanmi. 16Cyja'tzun in xi kk'one tkanil lu teya Tat Rey; ka ma jaw bincha'n juntl maj tnam lu ex ka ma jaw bincha'n juntl maj muro ti'jele, c'elel k'i'n toclena tu'n tcawina tuj tx'otx' tuj telex k'ij te nima Éufrates, chi tuj u'j. 17Atzunte rey Artajerjes aj tk'o'n tzak'webl cyja': Aya Rehum aju gobernador, tuc'ix Simsai aju aj tz'ibal, ex ke mastl cyuc'ile najlke tuj Samaria ex tuj tx'otx' tuj telex k'ij te nima Éufrates: In che'x nk'olbe'ne. 18Aju u'j tzaj cysama'ne weye ma baj pju'n ti'j ex ma jaw sch'i'n nwitze, 19ex ma txi nk'o'ne orden tu'n tcu'x jyet ka ax toc jlu. Ax toc ma cnet cypaltil tnam xjal lu. Ela' maj jaw cyi'n cyib cyi'j ke rey ojtxi, ex bant ti'j cyu'n tu'n cyk'ojin cyi'j ke rey cye junjun nasyon, 20ex e ten junjun rey nimxix cyipumal tuj Jerusalén, cub cyi'j ke tnam cyu'n, cycubsa'n tuj tumlal telex k'ij te nima Éufrates ex akeju tnam lu o chjet tcyakil txcaj chojenj cyu'n cye ke rey te Jerusalén. 21Ja'lotzun cyk'onxe orden cye ke xinak lu tu'n twe' ak'untl cyu'n, tu'n mi'n tjaw binchet tnam juntl maj; maxi cjawil binchet ocxi t-xi nk'o'ne juntl ac'aj orden. 22Mi'n tzic' tna'l jlu cyu'ne, tu'ntzun mi'n ttzaj jun mya ba'n ti'j ncawbile, chi tuj u'j. 23Tejtzun tpon u'j lu tu'n Artajerjes, jaw sch'i'n cywitz Rehum, Simsai aju aj tz'ibal, ex ke mastl cyuc'il; cycyakiltzun ke e je'x naj tuj Jerusalén ex lajwers e oc ke xjal judiy cyu'n tu'n t-xi cycolin ak'untl. 24Tu'ntzun jlu cyaj colin ak'untl ti'j tja Dios tu'n mi'n tjaw binchet tuj Jerusalén; maxi tuj tcabin abk'i ttzyetlen tcawin Darío aju rey cye aj Persia, tzaj cyna'ntl juntl maj tu'n tjaw binchet tja Dios.

will be added

X\