ESDRAS 3

1Tejtzun toc twukin xjaw tej otok bant cyten aj Israel tujile cytanmi, cycyakil xjal oc cychmon cyib tuj Jerusalén. 2Ate Jesúa aju tcy'ajal Josadac, cyuc'ix ke mastl pal akeju tuc'il, tuc'ix Zorobabel aju tcy'ajal Salatiel ex ke xjal at cyxilen tuc'il, e oc ten binchalte altar te Cydios aj Israel, tu'ntzun cycub patit ke alumaj te chojbil, ic tza'nx in tma'n tley Moisés aju tmajen Dios. 3Jaw cybincha'n aju altar ax jatum cub ten nej tibaj tk'ukbil, masque in che xobtok cywitz ke xjal najlke nikayin; tcyakil prim ex tcyakil kale in cub cypatun ke chojbil tibaj altar te nimbil te Kman. 4Ax icx cub cyic'sa'n nink'ij, tk'ijlalil tu'n cyjaw binchet ke tal ja t-xak tze'yin cywi', ic tza'n tz'iban tuj ley, ex tcyakil k'ij xi cyk'o'n chojbil ic tza'nx otok k'manjtz cye tu'n tbant cyu'n, ex ic tza'nx tajlal banimaj ti'j tu'n t-xi cyk'o'n tuj junjun k'ij, 5ax icx xi cyk'o'n ke chojbil in che cub patit tcyakil k'ij, ex ke oyaj in xi cyk'o'n oc in tzaj que'yin juntl ac'aj xjaw, cyuc'ix ke mastl chojbil in xi cyk'o'n tuj junjun nink'ij banimaj ti'j, ex ke oyaj tu'n cyex cygan in xi cyk'o'n te Kman. 6Atxix tuj tnejel k'ij te twukin xjaw tzaj xe't tu'n t-xi cyk'o'n chojbil in cub patit te Kman, masque na'nxtok tcub ke' t-simyentil tja Dios. 7Xitzun k'o'n pwak cye albañil ex cye calpinter, ax icx xi k'o'n wabj, c'abj ex chibj aseyt cye aj Tiro ex cye aj Sidón, tu'ntzun ttzaj cyi'n ke tze' wi'ten max twi witz Líbano, ex tu'n ttzaj cyi'n tibaj mar, tu'n tpon max tuj tnam Jope, ic tza'nx permis otok k'onjtz cye tu'n Ciro aju rey cye aj Persia. 8Tuj tcabin xjaw te tcabin abk'i tponlen Zorobabel aju tcy'ajal Salatiel tuj Jerusalén, tuc'ix Jesúa aju tcy'ajal Josadac ex ke terman akeju pal ex ke aj Leví, cyuc'ix cycyakil keju otok che etz tuj Babilonia ex otok che ul tuj Jerusalén, tzyet ak'untl cyu'n tu'n tjaw binchet juntl maj tja Dios, ex cyaj ten ak'untl tuj cycwent ke aj Leví, akeju otok japun winkin abk'i cyu'n ex ka mas. 9Ate Jesúa cyuc'ix ke tc'wa'l ex ke terman, tuc'ix Cadmiel ex ke tc'wa'l, akeju tiyjil Judá, ex ke tiyjil Henadad cyuc'ix ke tc'wa'l ex ke terman akeju aj Leví, jun c'lojx bant cybaj ex e oc k'o'n te nejenel cyxol ke ak'nal ti'j tja Dios. 10Tejtzun tcub ke' t-simyentil tja Dios cyu'n ke albañil, e cub we' ke pal tuj cylugar, toc cyxbalun tbanilxix ex k'i'n chun cyu'n, ax icx ke aj Leví akeju tiyjil Asaf, e cub we' tuj cylugar, k'i'n lak c'uxbil cyu'n, tu'n tajben tu'n tjaw nimset tbi Kman, ic tza'n k'ma'maj tu'n David aju rey cye aj Israel. 11E octzun ten bitzal te nimsabl tbi Kman ex xi cyk'o'n chjonte te in cyma'n cyja': Cyk'onxe chjonte te Kman, porque ba'nte ex aju tc'ujlalil cyi'j aj Israel cucx in ten te jumajx. Ex cycyakil xjal e jaw sch'in tu'n tzalajbil ex jaw cynimsa'n tbi Kman, tu'nju tzyet tu'n tcub ke' t-simyentil tja Dios tu'n tjaw binchet juntl maj. 12Pero cyxol ke pal ex ke aj Leví ex ke nejenel cyxol junjun c'loj xjal, akeju otok che tijin ex otok tzic' cywitz ti'j tnejel tja Dios, at nim e oc ten ok'el cyuwxix wen porque o cyil tej ttzyet ak'untl ti'j tja Dios. Atzun txkantl e jaw sch'in tu'n tzalajbil. 13Mi jun el tnic' ti'j tk'ajk'ajel cywi xjal alcye te tzalajbil ex alcye te ok'el, porque najchak k'ajk'aj cywi' wen.

will be added

X\