ESDRAS 10

1Tej toc ten Esdras na'l Dios ex k'malte cyil xjal te Dios, in ok' wen ex cub mutze' twitz tja Dios, baj cytxolban cyib nimcu xjal aj Israel ti'jele, tza'nx ke xinak icx ke xu'j ex ke c'wa'l ax icx in che ok'tok cyuwxix. 2Xitzun tma'n Secanías aju tcy'ajal Jehiel ex tiyjil Elam te Esdras cyja': Ma ko binchane il twitz Dios tu'nju ma ko moje'ye cyuc'il ke xu'j mya judiy ke, te junxitl nasyon ke, pero masque icju, atx oybil cye aj Israel. 3Cxel ktziyane tu'n cyex klajo'ne kxu'jile, akeju mya judiy ke, cyuc'ix ke cyal, tu'ntzun tjapun aju ley, ic tza'nx o tmaya ex o cyma keju in che nimante tmandamyent Kman. 4We'ctza, porque aya at toclen tu'n tbinchante jlu; atzun keye jacu ko onine ti'ja. Cyuwx tc'u'ja ex binchama jlu. 5Jawtzun we' Esdras cyxol, ex xi tma'n cye nejenel cye pal, cye aj Leví ex cye cycyakil xjal aj Israel, tu'n t-xi cytziyan jun yol axix toc twitz Kman, tu'n tjapun cyu'n ic tza'nx otok tma Secanías; cycyakil xjal ba'n e'la tuj cywitz ex xi cytziyan tu'n tbant cyu'n. 6Ic'tzun Esdras twitz tja Dios ex xi' tuj tcwart Johanán aju tcy'ajal Eliasib; minti' o wa'n ex minti' o c'an tu'n tbis, tu'n tlaj mya ba'n otok cybincha ke xjal otok che etz tuj Babilonia ex otok che ul meltz'aj tuj Jerusalén. 7Te tibajxi ex jun txocbil cye cycyakil xjal tuj Judá ex tuj Jerusalén, akeju otok che etz tuj Babilonia, tu'n toc cychmon cyib tuj Jerusalén; 8katzun at jun minti' ma txi tniman tu'n tpon tuj toxin k'ij, ic tza'nx otok cyaj bant ti'j cyu'n ke nejenel ex ke tij xjal, c'elel k'it ttx'otx' aju ma cub tetzan, ex bi'x c'elex lajet cyxol ke xjal ma che ul tuj Jerusalén. 9Cyja'tzun, tuj toxin k'ij tuj winkin tajlal tbelajin xjaw, cycyakil ke xinak tiyjil Judá ex tiyjil Benjamín oc cychmon cyib tuj Jerusalén. Cycyakiltzun pon baj cychmon cyib tuj lugar jatum in pon cychmon cyib xjal twitz tja Dios, in che lu'lun tu'n tchi aju at tu'n tbant ti'j ex tu'n tlaj jbal in cubtok cyibaj. 10Jawtzun we' Esdras aju pal, ex xi tma'n cye cyja': —Akeye ma che binchane il tu'nju ma che moje'ye cyuc'il ke xu'j mya judiy ke, ex tu'n jlu ma ch'iy mastl cyil aj Israel cyu'ne. 11Ja'lotzun cypa'n jatz cyile twitz Dios, aju Cydios ktzan cyxe'chele, ex japunx cyu'ne aju tajbil Kman. Cypa'mil cyibe cyi'j ke xjal mya nimal Dios, ex cylajo'n ele ke cyxu'jile mya judiy, chi Esdras. 12Cycyakiltzun xjal xi cytzak'we'n tuc'il tk'ajk'ajel cywi' cyuwxix: —Cbantel ku'ne nok alcyex ctzajel tma'na keye. 13Pero nimxix kbete ato'ye tzalu, minti' tu'n tic' jbal ex mlay bant ax tu'n kcyaj tene tuj cay. Aju yol lu mlay bant ti'j tuj jun ex mi tuj cab k'ij, tu'nju nimxix kbete o ko binchane il lu. 14Mas ba'n tu'n cycyaj ten ke nejenel keye te kxele, ex cycyakil keju najlke tuj ktanmiye, akeju o che moje' cyuc'il ke xu'j mya judiy, ba'n tu'n cyul tuj jun k'ij cyjel bant ti'j ex ctzajel cyuc'in cyib cyuc'il ke nejenel ex ke jwes ate' tuj cytanmi, ocxi tel tpa'n tib tk'oj Kman ki'je tu'n tlaj kbinchbene mya ba'n, che chi xjal. 15Cycyakiltzun keju otok che ul tuj Jerusalén ba'n ela tuj cywitz tu'n tbant icju, nok o'cx Jonatán aju tcy'ajal Asael, tuc'ix Jahazías aju tcy'ajal Ticva, minti' cub tuj cywitz tu'n tbant icju, ex o cyuwsanjtz cyyol tu'n Mesulam ex Sabetai, akeju aj Leví. Entons acu pal Esdras jaw sc'onte junjun xinak nejenel ke cye junjun c'loj xjal at cyxilen cyxolx ex oc tk'o'n cyoclen, ex tuj tnejel k'ij te tlajin xjaw, cycyakiltzun keju otok tz'oc k'o'n cyoclen oc cychmon cyib tu'n tbant ti'j jlu cyu'n. 17Ex tuj tnejel k'ij te tnejel xjaw, pon baj twi' cyu'n tu'n t-xi cybincha'n cyi'j ke xinak otok che moje' cyuc'il ke xu'j mya judiy ke. 18Ke pal e moje' cyuc'il ke xu'j mya judiy ke, atzun ke jlu: Cyxol tiyjil Jesúa aju tcy'ajal Josadac, ex cyxol keju at cyxilen tuc'il, atzun cybi jlu: Maasías, Eliezer, Jarib ex Gedalías, 19atzun ke jlu xi cytziyan jun yol axix toc tu'n tex cylajo'n ke cyxu'jil mya judiy ke, ex teyle junjun xi tk'o'n jun tman ẍne'l te jun oyaj te chojbil til. 20Cyxol tiyjil Imer, atzun ke jlu: Hanani ex Zebadías. 21Cyxol tiyjil Harim, atzun ke jlu: Maasías, Elías, Semaías, Jehiel ex Uzías. 22Cyxol tiyjil Pasur, atzun ke jlu: Elioenai, Maasías, Ismael, Natanael, Jozabad ex Elasa. 23Cyxol cyiyjil aj Leví, atzun ke jlu: Jozabad, Simei, Kelaía (ex ka Kelita), Petaías, Judá ex Eliezer. 24Cyxol cyiyjil ke bitzal, atzun Eliasib. Cyxol cyiyjil ke xk'ukil ttzi tja Dios, atzun ke jlu: Salum, Telem ex Uri. 25Akeju mastl xjal aj Israel e binchante ax il lu, atzun ke jlu: Cyxol tiyjil Paros, atzun: Ramía, Jezías, Malquías, Mijamín, Eleazar, Malquías ex Benaía. 26Cyxol tiyjil Elam, atzun ke jlu: Matanías, Zacarías, Jehiel, Abdi, Jeremot ex Elías. 27Cyxol tiyjil Zatu, atzun ke jlu: Elioenai, Eliasib, Matanías, Jeremot, Zabad ex Aziza. 28Cyxol tiyjil Bebai, atzun ke jlu: Johanán, Hananías, Zabai ex Atlai. 29Cyxol tiyjil Bani, atzun ke jlu: Mesulam, Maluc, Adaía, Jasub, Seal ex Ramot. 30Cyxol tiyjil Pahat-moab, atzun ke jlu: Adna, Quelal, Benaía, Maasías, Matanías, Bezaleel, Binúi ex Manasés. 31Cyxol tiyjil Harim, atzun ke jlu: Eliezer, Isías, Malquías, Semaías, Simeón, 32Benjamín, Maluc ex Semarías. 33Cyxol tiyjil Hasum, atzun ke jlu: Matenai, Matata, Zabad, Elifelet, Jeremai, Manasés ex Simei. 34Cyxol tiyjil Bani, atzun ke jlu: Madai, Amram, Uel, 35Benaía, Bedías, Quelúhi, 36Vanías, Meremot, Eliasib, 37Matanías, Matenai ex Jaasai. 38Cyxol tiyjil Binúi, atzun ke jlu: Simei, 39Selemías, Natán, Adaía, 40Macnadebai, Sasai, Sarai, 41Azareel, Selemías, Semarías, 42Salum, Amarías ex José. 43Cyxol tiyjil Nebo, atzun ke jlu: Jeiel, Matatías, Zabad, Zebina, Jadau, Joel ex Benaía. 44Cycyakil ke xjal lu otok che jaw moje' cyuc'il ke xu'j mya judiy ke, ex cyxol ke xu'j lu at junjun otok tzul itz'j cyal.

will be added

X\