EZEQUIEL 7

1Tzaj yolin Kman wuc'ile ex tzaj tma'n cyja': 2Aya xjal, akine Dios cxel nma'ne jlu cye aj Israel: Ch'ix tpon canun k'ij tu'n cynaj, ch'ix tpon canun k'ij tu'n tnaj enter nasyon cye aj Israel. 3Ch'ix tpon canun k'ij tu'n cynaje akeye aj Israel, cjawitz baj nk'oje cyi'je; che oquele tuj xjel wu'ne ti'j cybinchbene mya ba'n, ex tu'n tcub cycastiwoye wu'ne ti'j tcyakil cybinchbene ic'bilxix. 4Mlay tzaj k'ak'an nc'u'je cyi'je, cbel cycastiwoye wu'ne tu'n tlaj cybinchbene mya ba'n ex tu'n tchjet cyu'ne aju cybinchbene ic'bilxix. C'eleltzun cynic'e ti'j, akine Dios. 5Akine Dios cxel nma'ne jlu: Bintza, ma'xix jun c'ixbisabl tzul. 6Ch'ix tul lak'e' ju bajsbil ti'j tcyakil. Ch'ix tul lak'e' tk'ijlalil tu'n cynaje. 7Ch'ix tul lak'e' tk'ijlalil tu'n cynaje akeye aj Israel. Ch'ix tul lak'e' tk'ijlalil tu'n cyjaw tilje tu'n cyxobile, ex cbajel tk'ijlalil tzalajbil in cybincha'ne cywi witz. 8Bi'x ja'lo nimxix nk'oje tzul cyi'je, cjawitz baj nk'oje cyi'je, che oquele tuj xjel wu'ne ti'j cybinchbene mya ba'n, ex cbel cycastiwoye wu'ne tu'n tlaj tcyakil cybinchbene ic'bilxix. 9Mlay tzaj k'ak'an nc'u'je cyi'je; cbel cycastiwoye wu'ne tu'n tlaj cybinchbene mya ba'n, ex tu'n tchjet cyu'ne aju cybinchbene ic'bilxix. C'eleltzun cynic'e ti'j, akine Dios. 10Lutzun ju k'ij lu. Ma tzul canun. Ma tzul ju xitbil cyi'je tu'n cynaje. Nimcu mya ba'n in bant tuj tcyakil part, ex ke xjal puro jawni ke. 11Ma che chmet ke byol xjal, ex ma che oc ic tza'n jun var te cawbil tu'n tcub cycastiw ke xjal binchal mya ba'n. Mi jun cyjel ank'in masque nim cybaj. Tcyakil cyk'inumabl cbajel naj, tuc'ix cyajwalil. 12Ma tzul canun tk'ijlalil aju lak'ol mi'n jaw tzalaj, ex aju c'ayil mi'n jaw bisun, porque cbel cycastiw cycyakil wu'ne. 13Aju o txi c'ayinte jun piẍ tx'otx' te juntl, mlay tz'oc tete juntl maj masque itz'x ke cycabil. Porque mlay tzic'x ti'j tu'n mi tcub cysentens cycyakil. Ex ke xjal binchal mya ba'n mlay bant cyclonte cyib. 14C'oquel k'ajtza'n chun te txocbil tu'n toc k'oj; cycyakil xjal in bant cyten pero mi jun nne'x k'ojlel porque cbel cycastiw cycyakil xjal lu wu'ne. 15Ti'jxi tnam nno'c k'oj, atzun tujxi tnam at tx'u'j yabil ex we'yaj. Ke xjal ate' tuj cojbil che cymel tuj k'oj, atzun keju ate' tujxi tnam che cymel tu'n we'yaj ex tu'n tx'u'j yabil. 16At junjun che tzokpajel ex che xel ok cywi' ke witz ic tza'n ke paloma otok che etz sec'paj cyuj chk'ajlaj, cycyakil che ok'el tu'n tlaj cybinchben mya ba'n. 17Cycyakil c'elel bakchaj cyk'ab ex ctzajel lu'lun cykan tu'n cyxobil. 18C'oquel cyk'o'n cyxbalun ch'i'x twitz te techal c'ixc'oj cyi'j; tcyakil cyximlal ctzajel lu'lun, ex cycyakil cjapunel tcyakal cywitz tu'n cych'ixwi, ex cycyakil c'elel cymatzo'n ttzmal cywi'. 19Aju sak pwak at cyuc'il c'elex cyxo'n tuj cay; ex aju k'an pwak at cyuc'il c'elex cyxo'n ic tza'n tz'is. Aju k'an pwak ex aju sak pwak at cyuc'il mlay che clet tu'n tuj tk'ijlalil oc ttzaj ttx'u'jil Kman. Cyu'n ke jlu mlayx tz'el we'yaj cyi'j, ex mlay noj cyc'u'j, porque tu'n k'an pwak ex tu'n sak pwak ma che binchan il. 20Tu'n tlaj cy-adorno nno'c cyk'o'n cyi'j tbanil che que'yin ex wi'yilxix, jaw cyniman cyib, ex aju cyk'inumabl ajben cyu'n tu'n cybinchante ke tilbilal nno'c cydiosin, akeju ic'bilxix. Cyja'tzun, ke cy-adorno wi'yilxix che oquel wu'ne te minti' cyajben. 21Che tzajel wi'ne ke stranjer xjal tu'n tex cyelk'a'n cyk'inumabl, ex che tzajel ke xjal ate' twitz tx'otx' jumajx mya ba'n ke, tu'n t-xi cyi'n tcyakil cyk'inumabl, ex c'oquel cyk'o'n te minti' tajben. 22C'elel npa'n wibe cyi'j, ex cxel nk'o'ne ambil cye aj k'oj tu'n tbaj cytz'ilsa'n tuj njaye, aju toctok te nk'inumable. Che ul ke xjal elek' ex cbajel cytz'ilsa'n. 23Cybinchame cyten ke caden, porque cyuj cycyakil cytanmi aj Israel ma che chmet ke byol xjal, ex nim xjal in che c'ixbisanjtz tuj tnam. 24Che tzajel wi'ne ke xjal jumajx mya ba'n ke, ex c'elel cyetzan cyja ke xjal ate' tuj tnam. Cnajel wu'ne aju cynimbil cyib keju at cyipumal; ex cbajel ntz'ilsa'ne ke lugar te cyc'ulbil. 25Ctzajel t-xobil cyi'j; oc cyajbe tu'n cyten tuj txubtxaj pero mlayx che ten. 26Tzul nimcu mya ba'n; ex tzul nimcu tkanil mya ba'n. Nokx gan che jyol ti'j jun t-sanjel Dios tu'n ttzaj tma'n aju otok tma Dios te; mi a'l ke pal che tel tu'n cyk'onte xnak'tzbil cye, ex mi ke tij xjal tu'n ttzaj cyk'o'n cyconsej. 27Cjawil ok' ju rey tu'n tbis, ctzajel nim tbis ju cawil, che tzajel lu'lun cycyakil aj Israel, cbel cycastiw wu'ne ic tza'nx cybinchben mya ba'n, ex cbel cysentens wu'ne ic tza'n cye cub cysentens mastl cyu'n. Cyja'tzun c'elel cynic' ti'j, akine Dios, chi Dios baj tma'n.

will be added

X\