EZEQUIEL 5

1Ex tzaj tma'n Kman weye cyja': Atzun ja'lo aya xjal, k'intza jun cchil banin ttzi' ic tza'n jun navaj in ajben te k'ibl xmatzbaj, k'i'mela ttzmal twi'ya tuc'ix t-xmatza tu'n cchil lu. Ex jurat k'intza jun balans, ex aju ttzmal twi'ya ox pa'n tz'e'la tu'na. 2Octzun tbaj k'oj ti'j tnam, patun cuba tuj tnam jun pa'n cyxol ke ox pa'n ttzmal twi'ya; te tibajxi k'intza jun cchil ex kesin cuba juntl pa'n ttzmal twi'ya ti'jele tnam, ex aju toxin pa'n ttzmal twi'ya chitunxa tuj cyk'ik'. Akine chin xele k'ojlel cyi'j xjal ate' tuj tnam tuc'il jun spad tocxsa'n tuj nk'abe. 3K'in jawa junjun ttzmal twi'ya ex c'alo'nca ttxa'n t-xbaluna. 4Ex ax cyi'j jlu k'i'n ela junjuntl ex k'o'ncxa tuj k'ak' tu'n ttz'e'y; cyi'jtzun jlu c'elel k'ak' tu'n cynaj cycyakil xjal aj Israel. 5Akine Dios in chin k'mante jlu: Atzun tnam Jerusalén lu, akine in cub k'onte te cymijil ke tnam ex cyxol mastl nasyon ate' ti'jele. 6Pero ke xjal lu ma tz'el cypa'n cyib cyi'j ke nleye ex cyi'j ke nmandamyente, ex mas pyor ma che oc cywitz ke tnam ex ke nasyon ate' cyi'jele, ma tz'el cyic'un ke nleye ex minti' ma che japun ke nmandamyente cyu'n. 7Cyja'tzun, akine Dios in chin k'mante jlu: Akeye nimxix ma jaw cyi'n cyibe cywitz ke nasyon ate' cyi'jeleye, ex minti' ma txi cynimane ke nmandamyente ex nleye, ex minti'lpe ma japun cyu'ne cyley ke tnam ate' cyi'jeleye. 8Cyja'tzun akine Dios in chin k'mante jlu: Ax icx weye chin oquele aj k'oj cyi'je, akeye aj Jerusalén; cbel cysentense wu'ne cywitzx ke mastl nasyon; 9cbel jun cycastiwoye wu'ne tu'n tlaj tcyakil cybinchbene ic'bilxix; na'nx nbinchanteye jun maj icju. Ex mlay nbinchaye juntl maj. 10Cyxolxe at junjun mambaj cxel cychyo'n cyc'wa'l, ex at junjun c'wa'l cxel cychyo'n cyman. Cbel cysentense wu'ne, ex ke xjal che cyjel ank'in che xel nsputune tuj tcyajil pac' twitz tx'otx'. 11Akine Dios cxel nma'ne jun yol axix toc wu'nx wibe, ma baj cytz'ilsa'ne njaye xjan tu'nju ocx cyi'ne ke tilbilal ic'bilxix tuj ex tu'n tcyakil cybinchbene mya ba'n, tu'ntzun jlu ax icx weye che bajel naj wu'ne, mi'n tzaj k'ak'an nc'u'je cyi'je ex mlay tzic'x ti'j tu'n mi'n tcub cycastiwoye. 12Aju toxin c'loj xjal najlke tuj tnam Jerusalén che cymel tu'n tx'u'j yabil ex tu'n we'yaj tujx tnam, ex atzun juntl toxin c'loj byo'n che bel ti'jele tnam cyu'n aj k'oj, ex atzun juntl toxin c'loj che xel nsputune tuj tcyajil pac' twitz tx'otx'. Ax kine chin xe'le k'ojlel cyi'j, tuc'il jun spad tocxsa'n tuj nk'abe. 13Cjawitz baj nk'oje; cbajel ntx'u'jile at cyi'j ex bi'x cchewixtel nc'u'je. Octzun tjatz baj nk'oje cyi'j, cycyakil aj Israel c'elel cynic' ti'j ka otok chin yoline icju tu'nju tzaj nk'oje cyi'j. 14Aya tnam Jerusalén cbel nxitune; ex ke xjal ate' tuja ctzajel cych'ixwi cyxol mastl nasyon ate' ti'jeleya, tu'ntzun toc cyque'yin cycyakil keju che ic'el bet ttxlaja. 15Octzun tcub cysentense wu'ne tuc'il ntx'u'jile ex nk'oje, ex oc tcub cycastiwoye wu'ne cyuwxix wen, cycyakil xjal che oquel ten xmayil cyi'je ex che elel ic'une cyu'n, ex ke nasyon ate' cyi'jele che jawil sec'paj tu'n cyxobil oc cylonte aju castiw ma'xix otok tzaj cyibaje. Akine Dios ma chin k'mante jlu. 16Tzul we'yaj cyi'je wu'ne, mer ic tza'n in che tzaj xo'n ke plech xobajilxix tu'n cynaje cyu'n. Ax toc che najele tu'n we'yaj, ex mlay tzaj cnet cywaye. 17Ax toc tzul we'yaj cyi'je wu'ne, tzul yabil ex tzul camic cyxole, ex mi jun cyc'wa'le cyjel ten cyu'n ke txcup te tjak' c'ul, ex nimcu cyeye che cymel tuj k'oj. Akine Dios ma chin k'mante jlu.

will be added

X\