EZEQUIEL 47

1Te tibajxi inx k'i'ne juntl maj tu'n xinak ttzi tja Dios. Ex o wile in pulwin tjatz a' ttzi tja Dios, in bet tex tumlal tjawitz k'ij, porque aju twitz tja Dios cyja' xi'yni tumlal tjawitz k'ij. Aju a' cyja' in cu'x tuj tumlal tbank'ab tja Dios, cyja' nne'x bet ttxlaj altar tuj tumlal tnayaj k'ij. 2Ex in etz k'i'ne tu'n tuj tcabin ttxa'n pe'n te tja Dios ex in elpune ti'jxi ttzi ja tcub tuj tumlal tbank'ab k'ij, ex in ajtz k'one welt tu'n ti'jele, tejxi npone ttzi ja tcub ti'jxi tnejel ttxa'n pe'n, aju cyja' xi'yni twitz tumlal tjawitz k'ij. Ex o wile a' nne'tz bet ttxlaj ttzi ja tuj tumlal tnayaj k'ij. 3Etz xinak k'i'n jun cy'jaj tu'n ex xi' tumlal tjawitz k'ij, xi techan 500 metro ex in ic'x ti'n tuj a'; ex japun a' ti'j tmopil nkane. 4Ex xi techan juntl 500 metro ex in ic'x ti'n tuj a': japun a' twi' nch'eque. Xi techan juntl 500 metro ex in ic'x ti'n tuj a'; ex japun a' nmije. 5Xi techan juntl 500 metro, ex otok tz'oc a' te jun nima ex minti' bant tu'n wic'xe tuj; otok tz'oc te jun nima ma'xix t-xe', o'cx tu'n xnu'xin jacu tzic'x jun xjal tuj. 6Tzajtzun tma'n xinak weye cyja': K'onca cwent ti'j ju ma tila. Te tibajxi in ajtz meltz'aje tu'n ttzi'yile nima, 7ex o wile tuj cycabil pac' ttzi'yile nima attok nimcu tze'. 8Ax icx tzaj tma'n weye cyja': Aju a' lu cyja' in xi bet tumlal tjawitz k'ij ex in pon tuj nima Jordán, in ic'tl ex in pon baj max tuj mar at nim atz'an tuj. Octzun tpon nima lu tuj mar at nim atz'an tuj, c'oquel aju mar ba'n tc'anjtz. 9Nok alcyex part jatum cpol a' lu, che ank'il nim cyiẍ tuj ex cycyakil txcaj jil najlke tuj a'. Porque tu'n nima lu aju mar at nim atz'an tuj c'oquel te ba'n tc'anjtz, ex che tel cycyakil txcaj jil tuj. 10Che tel ke tzyul cyiẍ ttzi'yile mar, cxel ke' tuj lugar En-gadi ex cpol baj max tuj lugar En-eglaim, ex ax cbel cytzkijsa'n cyxuyb. Ex che tel nimcu txcaj cyiẍ tuj ic tza'n tuj Nintz Mar. 11Pero ke lugar soban ex ke laguna ate' nikayin ttzi'yile mar, mi'n ten a' ba'n tc'anjtz cyuj; cucx che cyjel ten at atz'an cyuj, tu'ntzun cyajben tu'n tjatz atz'an. 12Tuj cycabil pac' ttzi nima che ch'iyil cycyakil txcaj tze' nno'c cywitz. Mlay che tzkij cyxak ex mlay txi cycolin tu'n toc cywitz. Tcyakil xjaw c'oquel cywitz, porque ctel a' cyxe', aju nne'tz tuj tja Dios. Aju cywitz c'ajbel te cylo' xjal, atzun cyxak c'ajbel te k'anbil. 13Akine Dios in chin k'mante jlu: Atzun ke tmojonil tx'otx' lu, aju oc cyc'ma' ke cablaj c'loj cyiyjil aj Israel te cyetzbil. Oc tc'ma' José cabe piẍ tx'otx' te tetzbil. 14Xi ntziyane tu'n t-xi nk'o'ne tx'otx' lu cye ktzan cyxe'chele. Cysipancuye parej. Atzunju tx'otx' lu c'oquel te cyetzbile. 15Ke tmojonil tx'otx' tuj tumlal tbank'ab k'ij, cxel ke' ti'j Nintz Mar, c'ic'el tuj be in xi' tuj tnam Hetlón, c'ic'el tuj tnam Zedad, 16tuj tnam Hamat, tuj tnam Berota ex tuj tnam Sibraim, akeju cycubsa'n tuj mojon cyxol tnam Damasco ex Hamat, ex c'ic'el tuj Hazar-haticón, aju tmojonin tib tuc'il Haurán. 17Cyja'tzun aju mojon tuj tbank'ab k'ij, cxel ke' tij Nintz mar ex cpol baj ti'j tnam Hasar-enan, atzunju tx'otx' Damasco ex Hamat che cyjel ten tuj tumlal tbank'ab k'ij. 18Aju mojon tuj tumlal tjawitz k'ij ctzajel ke' cyxol tnam Haurán ex Damasco, cbeletz ttzi'yile nima Jordán ex ttzi'yile mar at nim atz'an tuj, tu'n tcu'pun baj ti'j tnam Tamar, ex atzun nima Jordán c'ajbel te tmojonil cytx'otx' aj Israel tuc'il cytx'otx' aj Galaad. 19Aju mojon tuj tumlal tnayaj k'ij cxel ke' ti'j tnam Tamar, c'elex jatum ta' twi a' tuj Meriba-cades, ex c'elex ttzi'yile nima te Ejipt tu'n tpon baj ti'j Nintz Mar. 20Aju tmojonil tx'otx' tuj telex k'ij, atzun Nintz Mar, cxelx ke' ti'j mojon te Ejipt ex cpol baj jatum nno'cx be tu'n tpon tuj tnam Hamat. 21Atzun tx'otx' lu cbel sipet cyxol cablaj c'loj cyiyjil aj Israel. 22Atzun etzbil lu at cyoclene ti'j, ax icx ke stranjer xjal najlke cyxole, cyuc'ix ke cyc'wa'l ax otok che itz'j cyxole. Ex che oquel cyk'o'ne mer ic tza'n ax aj Israel ke. Oc tcub sipet tx'otx' cyxol aj Israel, ax icx cye at cyoclen ti'j tx'otx'. 23Nok alcyex c'loj cyiyjil aj Israel najlke stranjer xjal cyxol, axtzun cxel k'ot cytx'otx'. Akine Dios in chin k'mante jlu.

will be added

X\