EZEQUIEL 44

1Inx k'i'ne tu'n xinak juntl maj ttzi ja tcub tetz ti'jxi tja Dios, aju cyja' xi'yni twitz tuj tjawitz k'ij, ex lamo'ntok. 2Atzun tzaj tma'n Kman weye cyja': Aju ttzi ja lu cucx cyjel ten lamo'n; mi'n jaket. Mi jun c'oquex tuj, porque atzun ma chin ocxe, akine Cydios aj Israel. Cyja'tzun cucx cyjel ten lamo'n. 3O'cx te cawil c'oquex tuj, tu'n tcub ke' nwitze wa'l ti'j pan xjansamaj. Atzun c'oquex ttzi ja ex c'oquex tuj tal cwart ex ax c'eletz jatum otok tz'ocx, chi Kman. 4Te tibajxi inx k'i'ne tu'n xinak tu'n wocxe ttzi ja tcub tuj tumlal tbank'ab k'ij, tu'n npone twitz tja Dios. Ex o wile tajwalil Kman otok baj noj tuj tja tu'n, in cubtzun ẍmeje'ye tejxi tpon tacl tibaj nwitze twitz tx'otx'. 5Tzajtzun tma'n Kman weye cyja': Aya xinak, que'yintza ex k'onca cwent ti'j tcyakilju cxel nma'ne teya cyi'j ke tumel ex ke ley ti'j njaye. K'onca cwent ti'j alcye ke at cyoclen tu'n cyocx tuj ex alcye ke minti' cyoclen tu'n cyocx. 6K'manxa cye aj Israel akeju miban che bin: Atzun jlu in tma'n Kman: Nimxix cybinchbene mya ba'n, akeye aj Israel. 7Ma baj cytz'ilsa'ne njaye tu'nju ma txi cyk'o'ne ambil cye stranjer xjal tu'n cyocx tuj, akeju mya sircunsidarimaj ke ex miban che niman nyole; ma baj cytz'ilsa'ne tu'nju in cub cyk'o'ne nwitze ic tza'n wabj aju seb ex chic' nne'l ti'j chojbil, ex tu'n tcyakil cybinchbene mya ba'n ma che ic'e tibaj ju yol cyaj bant ti'j wu'ne cyuc'ile. 8Minti' ma che japun ke nleye cyu'ne tu'n cybinchet ke ti'xti xjan o txi nma'ne cyeye, nok o'cx ma txi cyk'o'ne tuj cycwent stranjer xjal. 9Cyja'tzun akine Dios cxel nma'ne jlu: Mi jun stranjer xjal c'oquex tuj njaye ka mya sircunsidarimaj ex ka miban niman nyole; ex milpe jun stranjer xjal c'oquex tuj, aju ax najl cyxol aj Israel. 10Ke aj Leví, akeju el cypa'n cyib wi'je junx cyuc'il ke mastl aj Israel, ex in cyaj coline cyu'n tej cyxi' c'ulul cywitz tilbilal, il ti'j cbel cycastiw tu'n tlaj cyil. 11Atzun ke che bel ten xk'ukil cytzi' ke tpwertil njaye ex che ak'nal ti'j mastl ak'untl at tuj; atzun ke ba'n tu'n cycub byonte cye alumaj in che cub patit, ex keju nnu'l cyi'n xjal te chojbil; ax icx list che tel tu'n cyonin cyi'j xjal. 12Atzun ke e ajben cyxol aj Israel tej cyc'ulun cywitz tilbilal, ex nok cyu'n aj Leví e binchan aj Israel il. Cyja'tzun akine Dios in xi nma'ne jun yol axix toc, cbel cycastiw tu'n tlaj il o cybincha. 13Mlay che oc te pal tu'n cyajben weye ex mi tu'n toc cymaco'n ke ti'xti xjan mi keju mas xjanxix. Il ti'j ctzajel cych'ixwi tu'n tlaj cybinchben ic'bilxix. 14O'cx cxel nk'o'ne cyoclen tu'n toc cycwentin tcyakilju at tuj njaye, ex tu'n cybinchante ke ak'untl ch'in cyoclen in che bant tuj. 15Ke pal aj Leví akeju tiyjil Sadoc, ex akeju cucx e ajben tuj njaye tej tel cypan cyib mastl aj Israel wi'je, at cyoclen tu'n cyajben weye. Atzun ke ba'n tu'n cycub ten nwitze tu'n ttzaj cyk'o'n cysebyil ex cychc'el ke chojbil weye. Akine Dios in chin k'mante jlu. 16O'cx ke jlu ba'n tu'n cyocx tuj njaye ex tu'n cypon lak'e' ti'j n-altare tu'ntzun cyajben weye, ex tuj cycwent cyjel ten ju ak'untl at tuj njaye. 17Oc cyocx ttzi pwert tu'n cyocpun tuj tcabin ttxa'n pe'n, il ti'j tu'n toc cyk'o'n cyxbalun sak que'yin ex tz'umin twitz. Octzun cyajben tuj tcabin ttxa'n pe'n ex ka tuj njaye, mlay tz'oc cyk'o'n cyxbalun lan. 18Ex c'oquel cyk'o'n jun xbalun c'albil cywi' sak que'yin ex tz'umin twitz, ax icx c'oquel cyk'o'n cycalsonsiy xbalun sak que'yin ex tz'umin twitz, ex mi'n tz'oc cyk'o'n c'albil cyc'u'j tu'ntzun mi'n ttzaj a' cyi'j. 19Ex na'nxtok cyelel tuj tnejel ttxa'n pe'n jatum in che cub ten xjal, il ti'j c'elel cyi'n cyxbalun aju toc cyi'j oc cyajben tuj njaye, tu'ntzun mi'n cyxjanset xjal tu'n cyxbalun, ax cyjel cyk'o'n cyuj cwart ate' tuj njaye, ex c'oquel cyk'o'n juntl cyxbalun. 20Mi'n tz'el cyc'o'xin ti'j cywi' ex mi'n cub cych'isun, nok o'cx tu'n tel ch'inak ttxa'n cyu'n. 21Mi jun pal cxel tc'a'n ta'l twitz uva oc tocx tuj tcabin ttxa'n pe'n. 22Minti' tu'n tmoje' tuc'il jun meba xu'j ex mi tuc'il jun xu'j otok cub tpa'n tib tuc'il tchmil, o'cx tu'n tmoje' tuc'il jun xu'j aj Israel na'nxtok tlonte xinak ex ka tuc'il jun meba xu'j t-xu'jilben jun ktzan pal. 23Il ti'j tu'n t-xi cyk'o'n pal xnak'tzbil cye xjal etzan wu'ne, tu'n tel cynic' ti'j alcye xjan ex alcye mya xjan, ex tu'n tel cynic' ti'j alcye sak ex alcye tz'il. 24Oc cyjaw k'ojl xjal, atzun ke pal che oquel te jwes tu'n t-xi binchet cyi'j ic tza'n in tma'n nleye. Che japunel cycyakil nleye cyu'n, ex ke nxnak'tzbile aju in yolin cyi'j cycyakil nink'ij k'mamaj wu'ne, ex cxel cyniman ke k'ij te ojlabl xjansa'maj wu'ne. 25Mi'n tz'oc cymaco'n pal jun cyimni tu'ntzun mi'n tbaj cytz'ilsan cyib. Katzun ka a cyman ma cyim, ex ka cytxu', ex ka jun cycy'ajal, ex ka jun cyme'jel, ex ka jun cyerman xinak ex ka jun cyanb na'nx tmoje'; ba'ntzun tu'n toc cymaco'n. 26Ka ma tz'oc cymaco'n, il ti'j tu'n tbaj cytx'jon cyib, ex te tibajxi che ayol wuk k'ijtl. 27Octzun cyocx juntl maj tuj tcabin ttxa'n pe'n twitz njaye tu'n cyajben, cxel cyk'o'n jun chojbil cyil. Akine Dios ma chin k'mante jlu. 28O'cxcu akine chin oquel te cyetzbil ke pal. Minti' jun etzbil cxel k'o'n cye cyxol aj Israel. Akine aju cyetzbil. 29Ba'n t-xi cywa'n twitz awal aju in tzaj cyk'o'n aj Israel te oyaj weye, ex ba'n t-xi cychyo'n tchibjal alumaj aju in tzaj k'o'n weye te chojbil cyil xjal ex cypaltil, ax icx tcyakilju ma tz'el cypa'n aj Israel tu'n ttzaj cyk'o'n weye, ba'n tu'n t-xi cynic'ben. 30Ax icx cxel cyk'o'ne cye pal aju tnejel twitz awal tbanilxix, ex cycyakil txcaj oyaj tbanilxix. Ex oc tbant tten tk'otjil pan cyu'ne, aju tbanilxix, cxel cyk'o'ne cye ke pal tu'ntzun cycub ncy'iwla'ne keju ate' tuj cyjaye. 31Mi'n txi cychyo'n pal jun chyu'j ex ka jun alumaj tajx otok cyim, ex ka otok baj tzakin cyu'n txcup te tjak' c'ul.

will be added

X\