EZEQUIEL 42

1Te tibajxi in pon k'ine tu'n xinak tuj tnejel ttxa'n pe'n ti'jxi tja Dios, aju tcub tuj tumlal tbank'ab k'ij, ex in ocx k'i'ne tu'n cyuj ke cwart cycub tuj tumlal tbank'ab k'ij, twitz ttxa'n pe'n pe'nin ti'j ax icx twitz ja tcub ti'jxi tja Dios. 2Jatum cycub ke ja lu, attok 50 metro tnukbil tuj tumlal tbank'ab k'ij, ex 25 metro twitz. 3Tuj jun pac' cytxlaj cyja' xi'yni tumlal tcabin ttxa'n pe'n aju attok laj metro twitz, atzun juntl pac' cytxlaj cyja' xi'yni tumlal tnejel ttxa'n pe'n aju lo'tzintok xak twitz tx'otx' tuj, attok ox col, ex teyle junjun col attok jatum tu'n kbet twitz ex cycubsa'ntok cywitz juntl ox col. 4Cywitz ke cwart attok jun cay te jwe' metro twitz ex 50 metro tnukbil max tujxi. Ke cypwertil cwart cyja' xi'yni cywitz tuj tumlal tbank'ab k'ij. 5Ke cwart ate' tuj toxin col ja mas ch'in ke cywitz keju ate' tuj tcabin col ex tuj tnejel col, porque aju jatum tu'n kbet cywitz ke cwart tuj toxin col, mas ma' twitz twitz ju tuj tcabin col ex tuj tnejel col. 6Ke cwart lu te ox colin cyten, pero minti'tok cykan ic tza'n ke mastl cwart ate' ttxa'n pe'n, nok o'cx ke cwart te toxin col mas ch'in cyuj cywitz ke cwart te tcabin col ex tnejel col. 7Tcubsa'ntok jun muro ttxa'n tnejel ttxa'n pe'n ex cywitz ke tal cwart, ex attok 25 metro tnukbil. 8Aju tnukbil jatum cycubsa'n ke tal cwart ttxlaj tnejel ttxa'n pe'n attok 25 metro. Atzun tnukbil jatum cycubsa'n ke tal cwart ttxlaj tja Dios attok 50 metro. 9Tuj tnejel col cwart attok jun ttzi ja tcub tumlal tjawitz k'ij jatum in che ocx xjal in che tzaj tuj tnejel ttxa'n pe'n. 10Twitzile muro tuj tnejel ttxa'n pe'n tuj tumlal tnayaj k'ij ax icx attok ke cwart cycubsa'n twitz ttxa'n pe'n pe'nin ti'j, ax twitz ju ja tumlal telex k'ij te tja Dios; 11junx ta' binchben cye ex junx ta' echbin cye ic tza'nx ke cwart ate' tuj tumlal tbank'ab k'ij, ex ke ttzi ja icx cyten ic tza'nx ke ttzi ja ate' tuj tumlal tbank'ab k'ij, ex attok jun cay nno'cx cywitz. 12Tu'n tpon jun xjal jatum ate' ke cwart tuj tumlal tnayaj k'ij, attok jun pwert jatum in tzaj ke' ju cay aju tcub twitz ju muro in ajben te makbil, aju tcub tumlal tjawitz k'ij. 13Tzajtzun tma'n ju xinak weye cyja': Tza'nx keju cwart ate' tuj tumlal tbank'ab k'ij icx keju ate' tuj tumlal tnayaj k'ij, akeju cycub twitz ttxa'n pe'n pe'nin ti'j xjansa'maj ke. Akeju pal in che pon lak'e' twitz Kman in xi cychyo'n ke oyaj mas xjanxix cyuj ke cwart lu. Ax icx cyuj ke cwart lu in cub cyk'o'n ke oyaj mas xjanxix, ic tza'n ke oyaj twitz awal, ex ju oyaj te chojbil il ex ju oyaj te chojbil cypaltil xjal, porque aju lugar lu xjan te. 14Oc cyocx ke pal tuj tja Dios, mlay che etz tu'n cye'lel tuj tnejel ttxa'n pe'n ka na'nxtok tcyaj cych'expu'n cyxbalun, aju in ajben cyu'n oc in che ak'nan tuj tja Dios, porque aju xbalun lu xjan. Oc cye'lel jatum ate' ke xjal, il ti'j c'oquel cyk'o'n juntl cyxbalun. 15Tejtzun tbaj techan xinak tja Dios ex ke mastl cwart ex ke ttxa'n pe'n, in ex k'i'ne tu'n ttzi ju pwert tcub tuj tjawitz k'ij ex in elpune ti'jxi, ex oc ten xinak echil te muro toc ti'jele tx'otx' te tja Dios. 16Tzaj ti'n aju ajlaj in ajben te echbil, ex xi techan ttxlaj tcub tumlal tjawitz k'ij: ex attok 250 metro. 17Icx xi techan ttxlaj tuj tumlal tbank'ab k'ij, ax icx attok 250 metro: 18ex xi techan ttxlaj tcub tuj tumlal tnayaj k'ij, ax icx attok 250 metro; 19ex te bajsbil xi techan ttxlaj tcub tumlal telex k'ij, ax icx attok 250 metro. 20Xi techan tx'otx' tuj cycyajil pac' ttxlaj. Aju tx'otx' jatum tcubsa'n tja Dios attok jun muro toc ti'jele te 250 metro echbin te junjun pac' ttxlaj, ex atzunju nne'l pa'nte tx'otx' xjan tuc'il ju tx'otx' mya xjan.

will be added

X\