EZEQUIEL 38

1Tzaj yolin Kman wuc'ile ex tma cyja': 2Aya xjal, que'yinxa tumlal ju tx'otx' Magog ex k'manxa aju yol cxel nma'ne teya ti'j Gog, aju nejenel ma'xix toclen cye tnam Mesec ex Tubal. 3K'manxa cyja': Atzun jlu in tma'n Kman: Aya Gog nejenel ma'xix toclen cye tnam Mesec ex Tubal, ma chin oque aj k'oj ti'ja. 4C'ajel meltz'aja wu'ne, c'oquex nk'o'ne ganch tuj ttzi'ya, c'eletz wi'ne cyuc'ix ke t-soldadiya cyjax cyibaj chej ex k'i'mlex cyubl; ke soldad lu nimxix cybaj wen, k'i'mlex cyspad cyuc'ix cymakbil te junxilchak txcajin. 5Ke xjal aj Persia, cyuc'ix ke aj Etiopía ex ke aj Libia, che xe'l cyuc'il cycyakil ke jlu, k'i'mlex cymakbil ex cypasbil c'uxbil. 6Ax icx cycyakil soldad te tnam Gomer ex te tnam Bet-togarma che xe'l cyuc'il, akeju mas najchak ate' tuj tx'otx' tuj tbank'ab k'ij, cyuc'ix ke tnam nimxix cybaj wen, akeju mojl cyyol cyuc'il. 7Bincham ttena ex binchama tten tcyakilju c'ajbel tuj k'oj, aya cyuc'ix cycyakil ke soldad ate' tuc'ila; ex toca te nejenel cye. 8Octzun tel nim abk'i oc tc'maya jun tkanil tu'n tk'ojina ti'j jun nasyon o tz'oc k'oj ti'j ojtxi, atzun ja'lo ma we' k'oj ti'j; ke xjal teju tnam lu e baj sputj cyxol nimcu nasyon ex otok che naj te jumajx, pero o tz'oc cychmon cyib juntl maj cywi' ke witz tuj cytx'otx' aj Israel. O che ajtz meltz'aj tuj nimcu nasyon ex in che ank'in cycyakil tuj txubtxaj. 9C'oquel tzokpaja k'ojlel ti'j ic tza'n jun cyk'ik' jbal, ex cbajel noj tuj cyu'n cycyakil t-soldadiya cyuc'ix nimcu tnam tuc'ila, ic c'oquel twitz tx'otx' cyu'n ic tza'n k'ek muj. 10Akine Dios in xi nma'ne jlu: Tuj tk'ijlalil lu tzul tuj t-ximbetza tu'n tbaj tnac'una ti'j tu'n tbinchanteya mya ba'n. 11Ex cxel tma'na cyja': Chin xe'le k'ojlel ti'j jun nasyon minti' tcolbil tib, tuj jun tnam jatum najl ke xjal tuj txubtxaj, cycyakil ke tnam lu minti' muro toc cyi'j, minti' cylamel, ex minti' tranc cyi'j. 12C'eletz welk'a'ne tcyakilju at tuj, chin oquel tzokpaje cyi'j ke tnam o che jaw bincha'n juntl maj, ex cyi'j ke xjal o che ajtz meltz'aj cyxol nimcu nasyon ex o tz'oc cychmon cyib juntl maj, akeju at cywacẍ ex mastl cyetzbil ex najlke tuj tmij enter twitz tx'otx'. 13Ke xjal te tnam Sabá ex te tnam Dedán, cyuc'ix ke comersyant te tnam Tarsis cyuc'ix ke nejenel ate' cyxol, ctzajel cykanin teya cyja': ¿Mape tzaja elk'al? ¿Mape che tzaj tchmo'na ke t-soldadiya tu'n tex ti'na sak pwak, k'an pwak, ke wacẍ ex txkantl cyetzbil xjal, ex tu'n t-xi ti'na jun matij k'inumabl? 14Cyja'tzun, k'manxa te Gog aju yol cxel nma'ne teya, ex k'manxa cyja': Atzun jlu in tma'n Kman: Oc cyank'in aj Israel tuj txubtxaj, akeju etzan wu'ne, octzun tbiya, cbel be tu'na, 15ctzajela tuj ttanmiya najchak tuj tx'otx' tuj tbank'ab k'ij, cyuc'ix nimcu xjal te ela' tnam che tzajel tuc'ila, nimxix cyipun ex cyuc'ix ke soldad cyjax cyibaj chej. 16C'oquel tzokpaja cyi'j aj Israel akeju etzan wu'ne. Ex cbajel noj twitz cytx'otx' tu'na ic tza'n tu'n jun k'ek muj. Aya Gog, tuj mancbil tk'ijlalil ctzajel wi'ne tu'n tk'ojina cyi'j xjal tuj tx'otx' etzan wu'ne, tu'n tel cynic' mastl nasyon wi'je oc t-xi nyec'un wibe cye, ka xjan kine. 17Akine Dios in xi nma'ne jlu: Ti'ja o chin yoline ojtxi tej cyyolin ke nsanjele e ten cyxol aj Israel, o cyma atxix ojtxi ka tu'n ttzaj wi'ne ex tu'n toc tzokpaja ti'j tnam etzan wu'ne, akeju aj Israel. 18Akine Dios in chin k'mante jlu: Tuj tk'ijlalil oc toc tzokpaj Gog ti'j tnam Israel, ctzajel nimxix nk'oje ex ntx'u'jile. 19Tu'nju otok tzaj nimxix nk'oje cxel ntziyane jun yol axix toc, tuj tk'ijlalil lu ctzajel jun cyaknajnab cyuwxix tuj tx'otx' cye aj Israel. 20Che tzajel lu'lun nwitze ke cyiẍ tuj mar, ke jil in che lipan twitz cya'j, ke txcup te tjak' c'ul ex ke jil in xi cyjaku'n cyc'u'j twitz tx'otx', ax icx cycyakil xjal ate' twitz tx'otx'. Che bel tilj ke witz, che tzajel tz'ak ke pic, ex cycyakil ke muro toc cyi'jele tnam che bel tilj twitz tx'otx'. 21Akine Dios in xi nma'ne jlu: Che tzajel ntxco'ne ke xjal tu'n cyk'ojin ti'j Gog cywi'yile ke witz etzan wu'ne, ex che oquel tzokpaj ke t-soldad k'ojlel tu'n spad cywitzx cyib. 22Chin k'ojile cyi'j tu'n tx'u'j yabil ex che bel byo'n, ctzajel nk'o'ne cyk'ik' jbal tuc'ix sakbakun ex asufre tibaj ex cyibaj t-soldad ex cyibaj nimcu xjal uc'in tu'n. 23Cyja'tzun tten cxel nyec'une cye nimcu nasyon aju woclene ma'xix ex ka xjanxix kine. Cxel nyec'un wibe cye, ex c'eleltzun cynic' ti'j, akine Dios.

will be added

X\